Том 7 (Вторая половина XV века, литература эпохи исторических размышлений)

В лето 6946. <...> Князю великому родися сынъ, князь Юрьи Болшей.[556] Тое же осени князь великы посылалъ братью свою, два князя Дмитреа Юрьевичевъ,[557] и прочихъ князей, и многыхъ воеводъ, с ними же многочисленыя полкы, на царя Махметя на Белеву, а ему же вмале сущу тогда, от иного царя убегшу. И убоявся князей русскых, и нача ся давати имъ въ всю волю ихъ, и въ закладе дети своя давати, и что где взяли, и не в великого князя отчине, полону, то все отдавали, и по тотъ день не чинити имъ пакости. Наши же, видевъше своихъ многое множество, а сихъ худое недостаточьство, и, разгордевшеся, поидоша на нихъ, яко пожрети их хотяще. И припустиша к граду месяца декабря 5, и превозношения ради нашего попустил Бог на нас: малое, худое оное безбожных воиньство одолеша тмочисленым полкомъ нашимъ, неправедне хотящимъ и преже губящимъ. Многое же множество избьено Руси бысть, яко единому агарянину десети или того выше одолети, князи же и выводы вси побегоша. Тогда же убиша князя Андрея Ивановича Лобана Ряполовского, Семена Остафьевича Горстькина, Дмитрея Ивановича Каису, князя Петра Кузминьского,[558] а иных бесчисленое множество побьено бысть и отъ своих хрестьянъ, которыхъ, идучи к бою тому, грабили.

В лето 6947. Приходил царь Магамет[559] к Москве месяца иулиа 3 <...>.

Того же лета князь великы Григорья Протасьевича поимавъ, и очи вымалъ.[560] Царь же стоа у града десять дни и отъиде, а волости и села повоева <...>.

Посады пожже, а христьяньства в полон поведоша много, а граду Москве ничтоже сътвориша.

В лето 949. Митрополит Сидор убежал с Москвы.[561] Тое же осени преставися князь Дмитрей Красной.[562] Тое же зимы князь великы ходил на Новгород, и Демон город взял, а мятля убили порховьского.[563] Тогда же преставися князь Юрьи Болшей, а другий князь Юрьи родися, месяца генваря 22, на Тимофеев день. А дотоле за год на тот же день родился князь велик Иван Васильевич,[564] а крестил его игумен Зиновей[565] троецьскый.

В лето 6950. Князь великы роскынул со княземъ съ Дмитреемъ с Шемякою и поиде на него къ Углечю, онъ же побеже в Бежицкый Верхъ, и князь великы за нимъ; и изгонити было его князю великому, и подалъ ему весть Кулодарь Ирешьскый.[566] Онъ же убеже, а Кулодаря князь великы доличився, да велелъ и́ кнутьемъ бити, по станомъ водя, да и дьячьство отнялъ у него. А самъ до Киясова дошедъ, да воротился, весне бо сущи, и пришедъ на Москву, братью и вси люди распусти по домомъ. А со княземъ с Дмитреемъ князь Иванъ Можайскы въ одиначьстве былъ на Углечи у него, и князь великы его отзвалъ, а далъ ему Суздаль, а преже был за Черторижьскымъ.[567] А князь Дмитрей, а с нимъ князь Александръ Черторижьской, после князя великого пришли ратью ольны до Сергеева манастыря безвестно, и не пусти ихъ игуменъ Зеновей, и еха напередъ самъ игуменъ и помири ихъ.

В лето 6951. Посылалъ князь великы воеводъ своихъ на Рязань, на царевича на Мустофу; они же шедше, и убиша его на речке на Листани. Тогда же убьенъ бысть на томъ бою Василей Ивановичь Жукъ Лыков, коломеньской наместникъ, а Григорья Васильева сына Глебова застрелили в челюсть,[568] тогда же мужьствова Феодоръ Васильевичь Басенокъ.[569] Того же лета князь Иванъ Андреевичь поималъ боярина своего Андреа Дмитреева и с детьми, а жену его Марью сжеглъ безлепъ.[570] Та же зима была студена, а сено дорого.

В лето 6953. Царь прииде к Мурому отъ Новагорода отъ Нижняго, и князь великы поиде противу ему к Володимерю и посла на него воеводы, они же шедше, и побиша татаръ подъ Муромомъ. Тогда же убиша Александра Иванова сына Костяньтиновича въ Гороховце,[571] под Ореховцемъ, въ Новегороде Нижнем, а въ Новомъ затворишася воеводы князя великого, князь Феодоръ Давидовичь[572] да панъ Юшко Драница.[573] А коли князь великы былъ въ Володимери, а тое же зимы пришли литовьскые воеводы: Судивой панъ, Иванъ панъ Гонцевичь, панъ Юрша, Захарья Ивановичь Кошкинъ,[574] а с ними 7000 Литвы, и с Колуги взяли окупъ, а под Козельскомъ стояли неделю; а князь Михайло Ондреевичь[575] слышавъ то, и посла князя Аньдрея Лугвицю,[576] а съ нимъ 300 человекъ, а самъ бе боленъ тогда, чающе не многыхъ людей. Они же сретишася с ними в Суходрови и ударишася на нихъ, и литва побегоша, а наши погнаша. И приведоша ихъ на больше полкы, и ту убиша князя Андрея Васильевича Лугвицу Суздальского, а Судока изымаша[577] и поведоша къ Литве, а сами с техъ местъ възвратишася въ свояси.

Прииде Маматек царевич изгоном съ братом своим съ Ягупом[578] на великого князя Василья Васильевича. И бысть имъ бой и сеча зла у града у Суздаля на поли, и битых бысть обоих много, и поимал царевич князя великого да князя Михаила Андреевича, иуля въ 6, на память отца Сисоя, в пятницю. Того же лета Москва погорела в полночи, город, на съборъ архааггела Гаврила, а в нем осаде сущи, и много людей погорело, а инии потхлися.