Том 7 (Вторая половина XV века, литература эпохи исторических размышлений)

В лето 69. Преставися князь велик Борисъ Александрович Тферскый, февраля 18. А тое же весны преставися Иона митрополит киевский и всея Руси, марта 31. И поставиша на митрополию Феодосиа[625] архиепископа ростовьского, маа 3.

В лето 970. Месяца генуариа 24, в день неделный, у Михаилова Чюда в монастыри,[626] у гроба святаго Алексия митрополита чюдотворца простило черньца Наума, ему же беаше нога отъ рождениа прикорчена, и хожаше на деревяници, и бысть здравъ. Тое же зимы, месяца февраля 1, поставили на Москве владыку на Рязань Давида, казначиа Ионина. Тое же весны, в Великое говейно, на Федоровой недели, прииде весть князю великому, что княжы Васильевы Ярославича дети болярьские и иные дворяне хитростью коею хотеша огосударя князя выняти с Углеча ис поиманиа, и обличися мысль их, и повеле князь велики имать ихъ, Володку Давидова,[627] Парфена Бреина, Луку Посивьева и иных многихъ, казнити, бити и мучити, и конми волочити по всему граду и во всемъ торгом, а последи повеле имь главы отсещи. Множество же народа, видяще сиа, от боляръ и от купець великихъ, и от священиков, и от простых людей во мнозе быша ужасе и удивлении, и жалостно зрение, яко всехъ убо очеса бяху слез исполнени, яко николиже таковая ни слышаша, ниже видеша в руских князехъ бываемо, понеже бо и недостойно бяше православному великому осподарю, по всей подсолнечной сущю, и такими казными казнити, и кровь проливати во святый Великий пост.[628] Тое же весны, не по мнозе времени, в той же во святый пост князь велики повеле у себя на хрепте труд жещи сухотныя ради болести, великая же княгини его и боляре его вси возбраняху ему, он же не послушавъ ихъ, и с техъ местъ разболеся. Того же лета, месяца марта 27, преставися благоверный и христолюбивый великий князь Василей Васильевичь, а княжение великое дасть столъ свой сыну своему, князю великому Иоану Васильевичю. А князю Юрью дасть город Дмитровъ, да Можаескъ, да Серпоховъ, да Хотунь,[629] да бабины села и волости, великие княгини Софии. А князю Андрею Болшему город Углечь Поле, да Бежецский Верхъ, да Звенигород, да мати его, великая княгини Мариа, после великого князя жывота придала ему Романовъ город на Волзе,[630] а прежде того былъ ярославьское княжение. А князю Борису дал город Волок Ламьски, да Ржеву, да Рузу, да после князь велики Иван придалъ ему Вышегород Поротовьский да Марьины села Голтяевы,[631] бабы его, ему же далъ. А сыну своему князю Андрею Меншему далъ городъ Вологду, да Заозерье на Кубене, да князь велики Иоан после придалъ ему городокъ Торусу,[632] да Городець на Поротве. Того же лета князь велики Иоанъ Васильевичь седе на столе отца своего на великомъ княжении в Володимири и на великомъ княжении в Новегороде Великом и Нижнемъ, и на всей Руской земли <...>

В лето 971. Во граде Ярославли, при князи Александре Феодоровиче Ярославьскомъ,[633] у Святаго Спаса в монастыри[634] во общине явися чюдотворець, князь велики Феодоръ Ростиславичь Смоленский, и з детми, со княземъ Костянтиномъ и з Давидомъ,[635] почало от ихъ гроба прощати множество людей[636] безчислено. Сии бо чюдотворци явишася не на добро всем княземъ ярославскимъ:[637] простилися со всеми своими отчинами на векъ, подавали ихъ великому князю Ивану Васильевичю, а князь велики противъ ихъ отчины подавалъ имъ волости и села; а изъ старины печаловался о них князю великому старому Алекси Полуектович,[638] дьяк великого князя, чтобы отчина та не за ними была. А после того в том же граде Ярославли явися новый чюдотворець, Иоанъ Огафоновичь, сущей созиратай[639] Ярославьской земли: у кого село добро, инъ отнялъ, а у кого деревня добра, инъ отнялъ да отписалъ на великого князя ю, а кто будеть сам добръ, боаринъ или сынъ боярьской, инъ его самого записал; а иныхъ его чюдесъ множество не мощно исписати ни счести, понеже бо во плоти суще цьяшосъ.[640]

В лето 972. Месяца генуаря 28 князь велики <...> рязаньский женися на Москве,[641] у великого князя Ивана Васильевичя, поятъ у него сестру, княжну Анну. Тоа же зимы, месяца марта, поставили на Москве Иосифа Грека архиепископом в Кесарию Филиппову[642] <...>.

В лето 973. Феодосий митрополит остави митрополию[643] сентебря 13. Тое же осени, месяца ноабря 11 поставли на Москве в митрополиты владыку суздальскаго Филипа.[644]

В лето 975. Месяца апреля 22 преставися великаа княгини Марьа тферянка,[645] въ 3 час нощи. Того же лета Трифонъ остави архиепископью ростовьскую.[646] Того же лета церковь каменую святое Вознесение обновлено внутри града <...>.