Том 7 (Вторая половина XV века, литература эпохи исторических размышлений)

В лето 76. Князь великий Иван Васильевич посылал под Казань царевича Каисыма,[647] да с ним князя Ивана Юрьевича, да князя Ивана Васильевича Стригу,[648] и дворъ князя великого. И сташя у Волги втаи. И татарове была на них были вышли из судовъ, а наши хотели их заскочити от брега, и некто юноша, именем Айдаръ, постелник великого князя, наполнився духа ратна, и не отпустя их нимало от судна, и кликну на них, они же устрашившеся, и вметашашась в суды, и побегоша на Волгу; в той день сдеяся спасение велико татаром здоровиемъ Айдаровым Григорьева сына Карповича. Тое же осени Филипп митрополит Възнесение свящалъ въ городе каменое. Тогды же и рать была на черемису. Тое же осени поставили архимандрита Спасовьского Васияна Рыла[649] въ архиепископью на Ростовъ, декабря 13.

В лето 977. Месяца майа 27, в неделю Слепаго, князь Андрей Васильевичь Болшей женилъся, понял княжну Елену, мизоцьского князя дщерь.[650] Тое же весны князь велики Иван Васильевичь послалъ на Казань рать судовую, а берегомъ послал брата своего,[651] князя Юрья Васильевичя, да князя Андреа Болшего, да с ними все князи и воеводы свои, и двор свой весь.

И судовая рать наперед пришла, маа 21, в неделю 50-ю, на ранней зори, и взяти имъ было Казань, пришли безвестно. И пожаловал ихъ наш воевода, именем Иван Дмитреевич, нарицаемый Руно,[652] отбилъ их от ворот прочь, а татаром спящим.

И после того, месяца июня 4, Хрипунъ княжь Семеновъ сынъ Ряполовьского[653] бил татаръ на берегу за Волгою и уби лиходеа татарина Колупая, всехъ пуще татаръ, и ординьских и казаньскихъ. Того же лета князя великого дети боарьские со устюжаны шли в судехъ Волгою мимо Казань, а чаяли, что рать великого князя подъ Казанью, и татарове переняли ихъ в судех, да с ними былъ бой велми крепок, и детей боярьскихъ и устюжан побили, а иных поимали, а князя великого рать в ту пору была в Новегороде в Нижнем, понеже бо татарове всю рать судовую исподъ Казани отбили. А убили тогды на Волзе князя Данила Васильевичя Ярославьского да Никиту Костянтинова сына Бровцина, да устюжанъ много, а Тимофея Плещеева Юрлища полонили[654] и иныхъ много <...>.

В лето 978. Месяца сентебря 1 князь Юрьи Васильевичь прийде под Казань со всеми силами: и судовые рати поидоша пеши под городом; татарове же выехавше из града и побившеся мало, и побегоша во град, а русь погониша ихъ и сташа подъ городомъ, и окружывше ихъ, якоже силный лесъ, и воду отъаша у нихъ. Царь же Обреимъ, видя себе в велице беде, и нача посылати послы ко князю Юрью Васильевичю, прося мира, князь же Юрьи помирися с нимъ на всей своей воли[655] и какъ надобе брату его, великому князю. Того же лета, месяца августа 30, погоре град Москва нутрь весь.

В лето 979. Ноабря 8 преставися архиепископъ Иона Новуграду. Тое же осени поставленъ Прохоръ игуменъ на епископью на Сарайскую.[656] Тое же весны, месяца майя 9 князь Борисъ Васильевичь женилъся на Москве, а понялъ княжну Ульяну, дщерь князя Михаила Дмитреевичя Холмьского. Того же лета, месяца иуня 20, князь велики Иванъ Васильевичь, з братьею и со всеми силами, поиде к Новугороду к Великому со вси страны, воюючи и пленяющи за ихъ измену и неисправление. Новогородци же, собравше силу велику, и поидоша к реце Шелоне на бой противъ великаго князя. А в то время случися туто быти князя великого воеводамъ: князю Данилу Дмитреевичю Холмьскому, да Феодору Давидовичю, и княжю Юрьеву воеводе Василью Феодоровичю Вельяминову, и воеводы, видевьше новогородцкую рать, и поидоша на нихъ за реку Шелону и, перебредше, начяша битися. Новогородци же, мало бившеся, и побегоша. Москвичи же погониша их, бьюще и секуще, и пленяюще, бе бо пришло ихъ мьножество зело, якоже и лесъ, а москвичь мало велми, понеже бо не единимъ местомъ князя великого рать пошла, но многими дорогами. И ту поимавше посадниковъ лучшихъ и людей добрых новогородцевъ, окупъ с нихъ имаху, а посадниковъ приведоша к великому князю, он же, разьярився за их измену, и повеле казнити их: кнутьемь бити и главы их отсещи. Сий же бой былъ месяца иуля <...>.

Того же лета вятчане Сарай взяли. Того же лета князя великого воеводы: Василей Феодорович Образець да Борисъ Тютшевъ Слепець, а с ними устюжане, да вологжане, да вятчяне пришли на Двину в судехъ, и срете ихъ князь Василей Васильевичь Суздальский со многою силою новогородскою и со всеми двиняны в судехъ же, и обославшеся межь себе, излюбиша, вышед на берегь, битися, и бысть им бой великъ зело, и победиша князя Василья, и новогородцкую силу побили, мало ихъ осталось, а князь Василей утече. Везде бо Бог помогаше великому князю за его исправление.[657]