Том 7 (Вторая половина XV века, литература эпохи исторических размышлений)

В лето 960. Князь велики Василей Васильевич посылалъ сына своего, князя великого Иоана Васильевичя, Кокшенги воевати.[595] Того же лета и женися князь велики Иванъ Васильевич, месяца июня 4, и поятъ княжну Марью,[596] дщерь князя великаго Бориса Александровча Тферьского. Того же лета князю великому родися сынъ у великие княгини, князь Андрей Меньший,[597] месяца августа 18.

В лето 61. Месяца апреля в 9 выгоре Москва город от Беклемишова двора. Того же лета преставися великаа княгини Софья[598] въ черницах у Вознесениа, иуня 15. Того же лета князь Дмитрей Шемяка Юрьевич умре со отравы[599] в Великом Новегороде. Того же лета царь турскы Царьгород взял.[600]

В лето 962. Преставися Ефрем,[601] архиепископъ ростовьский и арославский. Того же лета поставленъ бысть Феодосий Бывалцевъ[602] епископомъ граду Ростову. Того же лета князь велики Василей Васильевич городъ Можаескъ взялъ, а князь Иванъ Андреевичь побежалъ в Литву[603] к королю служыти.

В лето 963. Владыку Питирима Пермьского вогуличи[604] убили. Того же лета приходили татарове от Сидиахметевы орды, и прелез Оку, грабили и полон имали, и прочь ушли; а Иван Васильевич Ощера[605] изъстоялъ с коломенскою силою, да их упустил, не смел на них ударитися; тогды же убили те татарове князя Семена Бабича.[606] И пришед Феодоръ Басенокъ[607] съ великого князя дворомъ, татар бил, а полон отимал.

В лето 964. Князь велики Василей Васильевич ходилъ ратью на Великий Новгород; новогородци же, собравъ силу многу, и пошли противу великого князя и пришли под Русу,[608] а туто лучилися князя великого воеводы: князь Иоанъ Васильевичь Оболеньский Стрига з братьею, да Феодоръ Васильевичь Басенок, удалый воевода, новогородцевъ смердовъ били,[609] а иных поимали <...>. А князь велики тогды во Ажелобицахъ[610] стоялъ, и приеха к нему архиепископъ Еуфимий[611] с лучшими людми и доби и челом великому князю на всей его воли. Того же лета преставися князь велики Иоанъ Феодорович Рязанский.[612] Того же лета князь велики Василей Васильевич поималъ шурина своего, князя Васильа Ярославича,[613] месяца иуля въ 10.

В лето 66. Месяца сентября 29 сгоре город Муромъ. Тое же осени, месяца октября 22, треть Москвы сгоре. Тое же зимы, февраля месяца 15, родися великому князю Ивану Васильевичу сынъ, и нарекоша имя ему Иванъ.[614] Того же лета преставися Еуфимий архиепископъ новгородски. Того же лета князь велики посылалъ на Вятку Ряпаловьских,[615] и Григорей Перфушков у вятчан посулы поимал, да имъ норовил,[616] ини Вяткы не взяли. Того же лета поставили церковь кирпичну святое Ведение на Симановьскомъ дворе в городе.[617]

В лето 967. Поставили на Москве Иону архиепископомъ Новугороду Великому. Того же лета Иона митрополитъ у Пречистые поставилъ приделъ, церковь камену во имя Похвалы святыя Богородица. Того же лета князь велики, слышавъ, что Григоре Перхушковъ вятчаномъ норовил, и повеле его изымати, и вести в Муромъ, и посадити в железа, а на Вятку послалъ в свое место князя Ивана Юрьевичя,[618] а с нимъ воеводы свои и дворъ с нимъ свой весь. Он же, шед, городы поималъ Орловъ да Котельничь, а под Хилинымъ стоялъ долго,[619] бьяся на всякъ день; вятчяне же, видяще себе побеждаемы всегда, и добиша челом князю Иоану на всей его воли, чего хотелъ государь князь велики.

В лето 968. Князь велики Василей Васильевчь былъ в Новегороде Великомъ миром. Тогды же Феодоръ Васильевич Басенокъ пил у посадника и поеха ночи на Городище, и удариша на него шилники,[620] и убиша у него слугу, именем Илейку Усатого, рязанца, а сам едва утече на Городище и с товарищи. Новогородци же, слышавше голку, и возмятошася, и приидоша всемъ Новым городомъ на великого князя к Городищу: чаяли, что князя великого сынъ пришелъ ратью на нихъ, и едва утолишася, мало упасе Богъ от кропопролития. Того же лета, месяца июля 14, буря была страшна велми, лесъ ломило и хоромы рвало, а во 18 день солнце гибло того же месяца. Того же лета царь Ахмутъ Большые Орды,[621] Кичи-Ахметевъ сынъ, приходилъ ратью к Переяславьлю к Рязаньскому[622] и стоалъ под городомъ три недели, на всяк день приступая ко граду, бьющеся, граждане же, милостью Божиею и Пречистыя его матери, одолеваху ему и много у него татаръ побили, а отъ гражан ни единъ врежденъ бысть; и поиде прочь с великим срамом, а на Казат улана мирзу[623] велико нелюбие држа, тотъ бо бяше привелъ его, не чающе от Руси ничего съпротивления. Того же лета на монастырьском дворе на Троецкомъ Сергиева манастыря поставлена бысть церковь камена святое Богоявление, да того же лета перед княжимъ двором Васильевича, в Боровитьскихъ воротехъ, заложили церковь камену святаго Иоана Предтечи.[624]