Том 7 (Вторая половина XV века, литература эпохи исторических размышлений)

В лето 6942. Князь великы, слышавъ измену дяди своего князя Юрья, что детемъ своимъ помочь посылалъ на великого князя заставу, и поиде князь великы Галича воевати на зиме той, а князь Юрьи побеже на Белоозеро;[539] князь великы Галичь повоевалъ и пожеглъ, и в полонъ повел. Тое же зимы князь Юрьи посла по дети и по вятчан и, собравъ силу велику, поиде на великого князя; и срете его князь великы въ Ростовьской области, у Николы на горе, и бысть имъ бой в суботу Лазареву.[540] И победи князь Юрьи, а войска его побили много, и прииде к Москве на Страстной недели въ среду, и стоялъ под городомъ неделю, а на Святой недели городъ ему отворили в среду же[541] <...>.

И переможе князь Юрий и поиде к Москве. И пришед, Москву взя и княгини великие поимал и послал в Рузу,[542] а сам седе на великом княжении; князь же велик убежал съ бою в Новгород Великый, и оттоле иде на Мологу, и къ Костроме, и к Новугороду Нижнему. Князь же Юрьи посла за ним дву князей Дмитреев съ силою. Того ж лета преставись князь Юрьи Дмитреевич на великом княжении на Москве. А сын его князь Василей после отца седе на великом княжении на Москве; и седе един месяць. А князи Димитреи смиришась с великим князем и согнаша князя Василья с Москвы. А князь велик Василей Васильевич седе на своей отчине, великом княжении московьском. А князь Василей поиде к Новугороду Великому и оттоле къ Костроме. А Шемяке дал князь велик Углич да Ржеву, а меньшему дал князю Дмитрею Бежицкой Верхъ.[543] А князь Василей Юрьевич Косой нача сбирати воя на Костроме на великого князя.

В лето 6943. Князь Василей Юрьевичь собра силу велику и поиде с Костромы на великого князя, похваляся, съ многыми силами. Князь же великы противу ему поиде, и сретошася у Кузмы Демьяны на Которосли,[544] в Ярославьской отчине, месяца генваря 6; и бысть им бой, и поможе Богь князю великому, а князь Василей убеже в Кашинъ,[545] а рати его побили много. И князь великы посла за нимъ в погоню воеводъ своихъ: Феодора Михайловича Челядню, Василья Михайловича Шею, Андрея Феодоровича Голтяева,[546] Володимера Андреевича Зворыкина, Михаила Чепечкына, и многыхъ людей двора своего; они же не угониша его и, пришедъ, сташа на Вологде, переимая вести про князя. Князь же Василей, окопився и пригнавъ на Вологду, и техъ всехъ воеводъ князя великого поималъ, и со всеми людьми, и оттоле иде въ Заозерье и, пришедъ, ста у Дмитрея святаго на Устьи. И прииде на него изгономъ,[547] безъ вести, князь Феодоръ Дмитреевичь Заозерьскы, со многыми людми; он же поби ихъ и посече многых, и угони на Волочке княгиню Марью. с дочерью и съ снохами, княжю Дмитрееву, а князю Федорову матерь, а самъ князь Феодоръ утеклъ. И оттоле поиде князь Василей на Устюгъ, и там на Устюзе хотели его убити, на порании Велика дни, на заутрени, и бысть ему весть. Онъ же единъ перебеже межи коръ Сухону, на Дымкову сторону, а кто не поспелъ людей его за нимъ, и устюжане техъ побили, а что были иманци князя великого бояре, техъ всехъ отполонили у него.[548] Князь же Василей поиде в велице безверямении, и посла по вятчанъ, и прииде на Кострому с вятчаны. Князь же великы то слышавъ, и собрав воя, поиде на него и, пришедъ, ста у Елпатия святаго на мысе; и нельзе имъ битися о реце Костроме, и помиришася: князь великы дастъ ему городъ Дмитров; и былъ въ Дмитрове единъ месяць <...>.

В лето 6944. Князь Василей Юрьевичь поиде изъ Дмитрова опять на Кострому, а к великому князю розметные послалъ, и владыку ростовьскаго, идучи, пограбилъ,[549] и живе на Костроме до пути, и поиде къ Галичю, а из Галича на Устюг, а вятчане с нимъ. И стоя подъ городомъ 9 недель, и городъ взялъ, а князя великого воеводу Глеба Ивановича убилъ Оболеньского,[550] и десятинника владычня Иева Булатова повесилъ, и многихъ устюжанъ, бояръ и гостей, посеклъ и повешалъ, поминая имъ ту злобу, что хотели его самого изъимати, а людей у него много побили; а бояръ князя великого отполонили.

Тое же зимы князю Дмитрею Шемяке жинитися было на Углече, а поняти дщерь князя Дмитрея Заозерьского;[551] и приехал на Москву князя великого звати на свадбу. И князь велик его поимал и послал на Коломну, а пристав у него Иван Старков, а Коломна за ним же.[552]

А князь Василей Юрьевичь поиде со Устюга на Вологду, и ту его наехаша княжи Дмитреевы братии дворяне 500 человекъ.

И срети его князь велик у святого Покрова на Скорятине в Ростовьской области, а с ним князь Дмитрей Юрьевич Менший,[553] да в ту же пору служил князю великому Иван Баба дрюцьских князей,[554] и зрядив копиа и поидоша вместо и бишась, и побеже князь Василей.

А князя Василья яша и, приведше на Москву, ослепиша его.

В лето 6945. Прииде на Москву Сидоръ митрополитъ[555] <...>.