Том 7 (Вторая половина XV века, литература эпохи исторических размышлений)

Балтаулию же приспевшу со многою силою, стретоша его стратиги на полом месте, но не возмогоша удержати его, вниде въ градъ всеми полки и нападе на гражан. И бысть сеча крепчайшая всехъ прежних, и падоша стратиги и мегистаны и вси велможи, яко ото многых мало отъидоша на извещение цесарю, тако и гражан и турков, имже не бе числа. Тритысящники же рыстаху и совахуся на все страны, аки дивии звери, ища себе лову цесаря. Магмет же окааный, паки вскоре урядив, разсылаше всю свою рать по всем улицам и по вратам цесаря бречи, а сам ся оста токмо сь яничаны, обрывся въ обозе, и пушки и пищали уставив, бояше бо ся цесаря. Цесарь же, яко слыша Божие изволение, поиде в Великую церковъ и паде на землю, прося милость Божию и прощенье согрешением, и простився с патриархом и со всеми клирикы и с цесарицею. И, поклонився на все страны, поиде из церкви, и абие возопиша всь клирик и весь народ сущий ту, и жены и дети, имже не бе чила, рыданием и стонанием, яко мнетися церкви оной великой колебатися, и гласи ихъ, мню, до небесъ достигаху.

Идущу же цесарю из церкви, сей едино пререк: «Иже хощет пострадати за Божиа церкви и за православную веру, да поидет со мною!» И всед на фарис, поиде къ Златым вратам, чаяше бо стретити безбожнаго. Всехъ же воин собрашася с ним до трею тысящь, и обрете во вратех множество туркъ, стрегущи его, и побивше их всех, поиде во врата, но не можааше пройти от многаго трупиа. И паки сретоша их множество туркъ, и сечахуся съ ними и до нощи. И тако пострада благоверный царь Костянтин[81] за церкви Божия и за православную веру месяца мая въ 29 день, убив своею рукою, якоже оставшеи сказаша, болма 600 турков. И збысться реченное: Костянтином създася и паки Костянтином и скончася. Зане согрешениемъ осуждение судом Божиим временем бывают, злодеяние бо, — рече, — и безаконие превратит престолы силныих.

О велика сила греховнаго жала! О, колико зла творит преступление! О, горе тобе, Седмохолмий, яко погании тобою обладают, ибо колико благодатей Божиих на тебе восияша, овогда прославляя и величая паче иных градов, овогда многообразне и многократне наказая и наставляя благыми делы и чюдесы преславными, овогда же на врагы победами прославляя, не престааше бо поучая и къ спасению призывая и житейским изообилием утешая и украшая всяческы! Такоже и пренепорочная мати Христа Бога нашего неизреченными благодеянии и неизчетными дарованми помиловаше и храняше во вся времена. Ты же, яко неистовен, еже на тебе милость Божию и щедрот отвращашеся и на злодеяние и безаконие обращашеся. И се ныне открыся гнев Божий на тебе и предасть тебе въ руце врагом твоим. И кто о сем не восплачеться или не возрыдает! Но убо паки да придем къ предлежащому.

Царица же в он же час прия прощение от цесаря и иночство прия.[82] Оставшии же стратиги и боляре, взем царицю и благородных девиц и младых жен многых, отпустиша в Зустунеевы карабли и катарги во островы и в Аммарию къ племянам. Народи же по улицам и по двором не покаряхуся турком, но бьяхуся с ними, и падоша от них того дни много людий, и жен, и детей, а иных полоняху. Такоже и в овнах сущеи воини не предаша овны, но бьяхуся з двоими турки — вне града сущими и внутри града. И в день одолеваеми бежаху и скрывахуся в пропастех, а ночи вылазяху и побиваху турков. А инии люди, и жены, и дети метаху на них сверху полат керамиды и плиты и паки зажигаху кровли полатные древяные и метаху на них со огни, и пакость им деяху велию.

И ужасахуся баши, сензякбеи и не ведаху, что сотворити, но послаша къ салтану: «Аще не сам внидеши во град, не одолен будет град». Он же взыскание сотвори велие о цари и о царици и не смеяше в град ити, и бысть въ размышлении в великом. И позва боляр и стратиг, ихже поимаше на боех и ихже баши взяша на свои рукы, и вда им слово свое крепкое и дары, посла их с баши и санчакбеи рещи гражаном по всем улицам и сущим в овнах слово салтаново с клятвою: «Да престанет брань без всякого страху и убийства и пленения, аще ли же ни — всих вас, и жены и дети ваши меч поясть».