Том 7 (Вторая половина XV века, литература эпохи исторических размышлений)

И какъ избрание сътвори господинъ нашь и отець Геронтей митрополит всея Руси с вами, архиепископы и епископы, и еже о нем священный съборъ, и съ благоволением и с советом сына своего, государя нашего великаго князя Ивана Васильевичя всея Руси, послали мене на архиепископью[1017] Великаго Новагорода и Пьскова, не по моему достоиньству, еже не ослушати ми ся было своего господина и отца Геронтиа митрополита всея Руси. И обретох здесе новугородскых еретиковъ, жидовьскаа мудрьствующих, покрыты же суть онехь еретикъ клятвеною укоризною, марькианьскиа глаголю и месалианскиа.[1018] Сии бо, егда въпрашаеми, от своих велений отметници бывают, и безстудно и усръдно кленутся, и проклинают вся тако мудрьствующаа или мудръствовавших, и ротятся без страха, яко таковаа повелениа ненавидящим. Сице и сии еретици говорят явьственно и учат православное христианство своей злобе, и какъ их спроси, и онъ говорит: «Яз, деи, православной христианинъ», а того всего своего лихово дела запрелся. Ино то в них не одно июдейство — смешано с месалианскою ересью: сиа главы в правилех у себе изнайдешь,[1019] а то ми накрепко высказал их товарищь поп Наум.[1020] Да и псалмы ко мне принесъ, по чему они себе правили по жидовскы.[1021] И те яз псалмы послал к митрополиту же съ подлинником.

Да потом государь мой князь великый приказал своим бояромъ, Якову да Юрью Захариичем,[1022] со мною и своим богомольцемь обыскати того накрепко. И как мы тех еретиковъ велели пред собою поставити, и они те все своих действъ позапрелися да почали съ безстрашиемь клятись, а называют ся христиане православные. Ино было как то все уведати по их клятве, как они отметаются своих велений? И попы их завтрокавъ и пивъ до обеда, обедню служат. А что они кленутся без страха, а то въ 19 главе тех же ересей месалианскых явлено.[1023] А что недостойно служать божественую литургию, а то явлено въ 12 главе тех же ересей.[1024] Да что ни есть ересей месалианскых, то все они мудрьствують, толко то жидовскым десятословиемь людей прелщают, яко чествующе мнятся.[1025]

Да та прелесть здесе распрострелася не токмо въ граде, но и по селом. А все от поповъ, которые еретики ставились в попы. Да егда будут где православных, и они таковых же себе являют. Аще ли видят кого от простых, и они готова себе на ловъ имеют. Да того ради и в попы ся ставят, чтобы кого, какъ мощно, въ свою ересь привести, зане ж уже дети духовныя имут дръжати. И кто будет верою огражденъ и въ православии христианства крепокъ, и они того таятся, а ему таковы ся являют. Аще ли кто слабъ, и леностенъ, и удобь къ греховному игу прекланяем, сего они, яко слаба, отступника вере проказуют и приимают его въ свою ересь. Да что он согрешил, или блуд, или прелюбодейство, или ины грех сътворилъ, то удобь пращают, церковным каноном не последующе. Аще ли пакы кто от православных въ обличение въсхощет стати на них про их ересь, и они отметници бывают своих ересей, да и проклинают всех таковаа творящих, да и ротятся без страха. А сами то творят, да греха себе в твой клятве не ставят. Ино как же их мощно было доити, аще бы князь великый не приказал своим бояромъ со мною, своим богомолцем, того обыскати? И молитвами пречистыя Богоматере и его государьскою грозою, съ его бояры, съ Яковом да съ Юрьем Захариичи, того есмя обыскали накрепко, да и явьственно то учинили своему государю великому князю, да и отцу своему митрополиту, да и вамъ, своей братии, архиепископом и епископом. И какъ мню, ныне вы положили то дело ни за что, какъ бы вам мнится, Новъгород с Москвою не едино православие;[1026] не поболезновали есте о томъ ни мала!