Том 7 (Вторая половина XV века, литература эпохи исторических размышлений)

Ты будешь нечто оскорбленъ от кого в телесном деле, да оставил архиепископью, да предал еси овци влъком на расхищение, а слыша таковую беду церковную. А где бы в то время тръпениемь великим въоружитись, аще бы что и пострадати за православие душевныя ради ползы, чая от Господа Бога за то мьзду восприати! Да понезазриши ми, что есми къ твоему боголюбию писал, поминаа рекшаго: «Дай премудрому вину, премудрее будет, обличай премудраго, възлюбит тя».[1027] Да и се въ слух мой пришло, что, деи, посылал по тебе князь великы, и не одинова, и ты, деи, не поехал к нему, а моглъ бы еси и тамо крепость свою подрьжати, за что будешь оставил архиепископью, а государьское бы еси сердце не ожестил. Да не мни: то мал грех сътворил еси. Что ся ни учинит пакость какова христианьству въ твоей архиепископии, или бы еси церкви каковую управу учинил в ту пору, ино то все на твоей голове легло. Да однова нечто государь князь великый въспалу учинит и на монастырь тебе же для, ино тебе и за то ответъ дати. Да не позазриши ми о том, что тебе писал, сердечне жалуя того, что однова от Бога за то въ гресе будешь. Занеже иной тебе того стыдится млъвити или не смеет; а многы люди добрые духовные тому зазрять, — а яз то от слуху же слышелъ. И толко то будет такъ се, и яз советъ тебе даю, однова нечто Богъ положит государю на сердце, пошлет по тебе, и ты бы ся никако не ослушал, тамо пакы приехавъ к нему. Какову себе крепость хочешь о своемъ деле, тако учинишь, толко бы ся князь великы у тебе того не опросил.

А ныне бы еси о государе о великом князи Бога молилъ, чтобы государю Богъ положил на сердце, чтобы управил церковь Божию, а православное бы христианьство от еретичьскаго нападаниа, от тех еретиковъ, жидовьская мудрьствующих, непоколебимо было. Понеже образу Господа нашего Исус Христа и Пречистыя его матери наругалися![1028] А слышел еси в подлиннике, како о них писано.

Да чтобы еси послал по Паисея, да по Нила,[1029] да с ними бы еси о том посоветовал: «Преидут три лета, кончается седмая тысяща». Ино и яз слыхал у Алексея: «И мы, деи, тогды будемь надобны».[1030] Ино еритици себе надежно чинят!

Да и Шестокрилъ[1031] есми училъ того для, и обретох в нем ересь: числа поставлены — от Адама 200 и 70 и 6 девятнадесятиць![1032] Ныне идеть шестаа девятнадесятица, по чему жидова лета чтут. Ино то учинили на прелесть христианьскую. Хотять рещи: «Лета христианьскаго летаписца скратишась, а наша пребывают!» А то хотят ту прельсть явити, како изойдеть наша паскалиа. Занеже я испытно Шестокрил прошелъ, да и написанъ у мене. Ино те числа, что проставлены, 276 девятнадесятниц, лет будеть от Адаама до сех местъ 5000 и 200 и 28.[1033] И потому ино у них еще пришествиа Христова нетъ, ино то они ждуть Антихриста. Ино прелесть великаа!

А Еуангелие кончины не явлено, когда будеть. Да и Енох праведны[1034] писал сице: «Преж даже вся не быша, постави Бог века тварнаго, и потом сътвори всю тварь видимую и невидимую, и по всем томь създа человека въ образ свой. И тогда раздели Богъ векъ человека ради на времена, на лета, и на месяци, и на дни, и на часы, — и да разумеет человекъ временъ премену и чтеть своеа жизни конець. И егда скончается вся тварь, юже сътвори Господь, тогда времена погибнут, и лета не будеть к тому, дние и часы не почтутся. Но станеть векъ единъ, и вси праведници убежат Суда великаго и прикупятся велицем веце, и векъ велик прикупится праведницех», и прочаа. И яз нашел в писании, что которой царь по котором был, и колко лет которы царь жил, также которой патриархъ по котором был, да колко кто лет жил. А пишет их епископы, а не патриархы.[1035] Ино написано сице: мирских лет 5000 и 600 и 21, а от божественаго въплощениа лет 121, римьскы епископъ 9 Угиинъ[1036] лета 4, а Ерусалиму епископъ четвертыйнадесять Иосифъ, лета два, таче Иерусалиму же епископъ 15 Июда, те были крещены от июдей при том Июде Андреяномь, конечное и последнее пленение градное и жидовское бысть. Да по сем пръвый епископъ Марко лет 8 был, от языкъ необрезаных. Ино тамо писано: лет 5000 и 600 лет и 21, в неже лето и пленение их бысть последнее. И оттоле до сех месть 400 лет, да 1000 въ гневе Божии пребывають. Да аще к тому безстудствують, развращающе наше православие, якоже о них писано: «Ни сами входяще, ни хотящих внити оставляюще». Да что которые лета у нас украли еретици жидовьскыми числы, и в те лета которые цари, или папы, или патриархи, писаны по именомь, ино тех где вмещати?