Том 7 (Вторая половина XV века, литература эпохи исторических размышлений)

Ино надобе о том подвигь великъ дръжати, егда скончаются лета, а животом еще прцбавитъ Богъ миръ. Ино то еретикомъ, жидовьскаа мудрьствующимь, будеть дръзость, а христианству будеть спона велика. А списавы «Зръцало»,[1037] то яко гаданиемъ положи 7000 лет, глаголя сице: «По домыслу убо реша мнози, глаголюще: понеже въ 6 дней сътворенъ бысть миръ сей, и скончаваеме убо шестой тысящи быти и скончание миру: слъгаша же тии, рече. Глаголють же пакы друзии, яко понеже есть седмориченъ настоящий сей векъ, лепо есть пребыти миру, дондеже и седмаа тысяща скончается, якоже Соломонъ реклъ есть: даждь чясть убо седмым, и тогда осмому, седмь бо век деланиа, осмы же будущаго века образ носить.[1038] Но и се речение не благословно ми мнится. И пакы покаряюся, рече, Григорию Богослову, глаголющу: егда горний миръ наплънится, тогда ожидай скончаниа».

А что Шестокрилъ они себе изучивъ, да темь прелщают христианство,[1039] мня, яко съ небесе знамение сводять; ино то не их съставлениа бысть! Шестокрил бо взятъ от астрономии, яко капля от моря. А то звездозаконие дано бысть Сифу, третиему сыну Адаамову. Да потомь Енох списалъ праведны дни, и часы, и лета, и потомъ Ной последнему роду предаде. Авраамъ в Египетъ вшел, египтяна учи землемериа, да и росчет земны. Да потомъ и жидова от них по тому навыкли.

Егда же Филаделфь Птоломей по Алексаньдре Македонстемь над Египтомъ царствова, сей посла ко Азарии, иже тогда в жидовьстей стране пръвосвященнику, избрати от художнейших в разуме, иже законъ истлъковати могущих. Архиерей же усмотривъ, иж у него искуснейших жидовъ, иже отечьское и еллинское навыкли беша наказание, и от коегождо племени 70 и два мужей избрал, с радостию посылаеть ко Птоломею. Они же в различных клетех по двема или по единому разделшеся въ Фаре, Александрестемь острове, все божественое Писание и сия псалмы сиречь Псалтырю[1040] истлъковавше, и вси въ тлъковании съгласиша, якоже дивитися Птоломею. Бысть же 70 и двоих сехъ изложение прежде трею сотъ и единого лета Спасова пришествиа. И оттоле распространилося то преведение въ еллиньском языце, и от еллинскаго языка преиде въ латынскы языкъ, за 300 лет до Христова пришествиа. А жидова, какъ распяли Христа, такъ их въ пленение предалъ Богъ, да и книги их истреблени бышя. Тажде в лета Андриана грецкаго самодрьжца Акила от Синопиа от еллиньства въ христианство преложься, таже въ иудейство уклонись, обрадовано жидовом тлъкование изложи. По сем же при Севире, иже от Самариа Симмах еретику Маркиону беседовавъ, и възвестивъ самаритом, и сего ради иудейская избравъ благодействует имъ растленны въ изложении смыслъ. По тех же при Комоде цари Феодотион, иже от Ефеса, священныя книги зле и развращенне изложи. Нам же священномученикъ Лукианъ, при Диоклитиане мучители, жидовьскыя книги в нашу беседу предлагает, добрее же и твердейше.

Мы же таковое изложение почитающе, и 70-тих и двоих прилежимъ паче, яко разно языку преложение сътворшимъ единъ коегождо разумъ и беседу издаше. Ино нынешнее жидова еретическое предание дрьжать, псалмы Давыдовы или пророчьства испревращали по тому, как имъ еретици предали — Акила, и Симмах, и Феодотионъ[1041] уже по Христове пришествии и по пленении их, а не якоже нам предали святии апостоли и святии отци тех отъ мудрых, еже превели жидовьскы законъ на еллинскы за 300 лет преже Христова пришествиа; ино то и достоверно есть, ниже тогда еретици быша. По Христове бо пришествии и по проповеданию святых апостолъ, сие предание, еже есть 70-тих и двоих преложение, истолковаша святии отци, Давидом реченнаа в псалмех, и еже пророцы глаголаша, о Христе.

Ино мнит ми ся, по Еноху векъ работает человечьству, а седмь тысящь лет человечьска ради пременениа положена. А по Богуслову, и намъ на всякъ часъ ждати сканчаниа.

Да и то ми ся мнит: однова будут еретици у нас украли лет! Занеже у латыны нашего болши осмию леты.[1042] Да еще говорят: «У нас, деи, писано седмь тысящ лет да 8 до скончаниа века». И язъ ихъ съпросил: «Что ж тлъкуется 8?» И они млъвят: «То, деи, тому слову имя: аще будете добри, придам вам, аще ли будете зли, уйму у вас». А татарове сказывают: еще у них до скончаниа миру, сииречь до второго пришествиа Христова, 100 лет да два.[1043]

А се писано: «Седмь век деланья, осмый же будущаго». Ино нам 6 день в недели велено делати, а седмы покой приимати от трудов. И будет однова в нашей паскалии деланиа время не исполнилося, и ты бы о том с Пасеем да с Нилом накрепко поговорил, чтобы есте и ко мне отписали о том.