Том 8 (XIV - первая половина XVI века, переводная литература)

Отшедшим же намъ оттуде, въ жилища святыхъ идяхом. И се бесчислении, имже не бе числа зело от солнечныхъ лучь, от виса[343] и перфиры сианиа и лучь и от инехь многихь ваповъ красных божественых бесплотныхъ, иже просвещають просвещениемъ и страшнымъ сианием святыхь обители рукою Божиею несказанною. Въ нихъже и ти доидоша на поле едемское въ благодуховную пажить, идеже истекаше вода умнаа, вода животнаа, въ месте покойне, въ местех святыхъ почивалныхъ. Си же вся бываахуть яко полаты прекрасны, жилища и храми, онии же десницею Господнею ухитришася. И другъ друга святыхъ зряще, дивяахуся от страшныа красоты не насытящеся. Поприсну бо бяхуть апостоли, присно же пророцы, присно же мученицы, присно же святители, присно же преподобнии и праведнии. Когождо ихъ приготова жилище себе, иже суть в долготу и в ширину яко царьстии гради,[344] от нихже она отшла есть и в нихже вселятся. Вси же убо святии, выходящеи от своихь жилищь, духомъ умнымъ целоваахуть мя, веселящеся и радующеся о моем спасении.

И доидохом же до ядръ Авраамовехъ, и се исполнь славы нестареющаяся ядро его. Не телеснаа бо ядра его, но место отлучено есть. Ядро то дивъно бывааше, исполнена воня духовныа, и вонею цветною и доброуханною, и ароматы духовными и небесными, и пажитьми вышними утешена, и възлюблена, и исполнена; ихже благовъздушно видение и доброты, аще исповедаю ти, земными словесы съвершити не можемъ. Ту бо платы умныа от светлых лучь с особными патриархи духовными хитростьми состроены от Господа Вседержителя, умножениемь лучь и страшными светлостьми измечтана и украшена, добраа лепотнаа. Въ нихже младенцы христианстии, елико же ихь есть банею бытийскою, по разрешению связаниа плотьскаго окрестъ его славою неизреченною ликующе, реку, окрестъ Авраама, Исаака и Якова.[345] Ибо и ти ту пребываахуть и со обеманадесяте из нихъже обенадесяте племени Израилеви на столехь дивъных почивающе. Имже образомъ видиши солнечныа лучя светящася, обиати бо сихь не можеши, тако приравнающихся души святыхь видимыхь убо от техь подобныхь святыхь душь образомь телеснымь изменение имущи безвеществены, якоже солнечныа лучя обьяти плотней руце не могуще.

И тако, о чядо, многаа оставивше, прешедше окрестнаа раа и долнейшняа и сокровища адова, иже сокруши тамо Господь Богъ нашь Исус Христос, възвратившем же ся намъ на запад, идеже горькиа муки и страсть ждуть убогихъ, такових же, якоже азъ, грешныи. Сиа вся показаша ми аггели Господни и рекоша ко мне: “Видиши _Ли, от великиа беды избави тя Господь?” Ибо видехомь сокровища темнаа она, въ нихже въ тмахъ и сени смертьней всяки душа иже от века заключяются, якоже песок, иже при краи морьстем, или паче персти земныхъ. И в забытие иже тамо суть лукавых не могуще света сладкаго видети в веце ономъ, ини выну въпиють: “Увы мне!” И бес престани въсклицають горце, алчюще разумне и жаждуще питиа спасенаго, и обнажены от всякиа одежда духовныа, и скверными прегрешении изьядаеми: “Охъ, ох, увы!” Выну, о чядо, якоже прежде рекохъ, душевное просвещение, и не ктому ини плотьски въпиють, и несть помилующаго. Егда когда душа мимоходитъ, тамо светъ суще, аггелы Господни просвещають она, въ нихже они мимоидут, показающе душа праведныхъ, иже тамо вся да видети иматъ, в каки тмы горки уклонихомся. И на десный путь чисте повелением Господнимъ възвратившемся и на уньший живот.

И киимъ образомъ преходит? Сиа вся преходить в четыредесяте дний, отнелиже отидох от убогаго моего телеси и к сему покою, въ немже мя видиши сущу, не моего, но преподобнаго отца иже въ святыхь Василиа угодника Божиа, иже еще живет в мире оном, душя гиблющаа зело и блудящаа и приведетъ Господеви Богу жертвы духовныа в воню благоуханиа.[346] Ибо ины многи душя быша зде со мною, ихже прежде мене восприят от пути безакониа ихъ и очисти ихъ добре и спасе о Господе. Ибо ведаю зде господина Иоанна духа и оспожю Елении,[347] подружие его, иже добре послужисте ему в мире ономъ, прочихъ душа суть зде, от далнихъ временъ не ведомо зде. Но обаче прииди въкупе со мною, и въ внутреняа внидемъ, да увеси, въ нихже пребываю. Ибо господинъ нашь избрал ны преподобный отець в чяс сей духомь своимъ зде пришед».