Том 9 (Конец XIV - первая половина XVI века, подъем общественного значения литературы)

А яз, холопъ твой, Ивашко Пересветов, одиннатцать летъ минуло, не могу доступити тебя, государя благоверного царя великого князя. Кому ни подамъ память, и оне до тебя, государя, велможи твои, не донесутъ. А на приезде, государь, приказал еси меня, холопа своего, боярину своему Михайлу Юрьевичю во всем. И вскоре, государь, после твоего государева приказу Михайло Юрьевич преставился, а яз, государь, без приказу и по ся места живу, до тебя, государя, доступити не могу, побити челомъ о приказе. А приезжему, государь, человеку без приказу и без береженья пробыти не мочно в твоем государеве царьстве. И доступил есми тебя, государя, у празника в церкве на Рожество пречистыя Богородицы,[771] и подал есми тебе, государю, две книжки с твоими речми царьскими, что есми вывез из ыных королевствъ, служачи тебе, государю благоверному царю и великому князю. И ты, государь, меня, холопа своего, не приказал никому. И будетъ тебе, государю великому царю, не полюбится службишко мое и речи, что яз тебе вывез из ыных земель и королевствъ, слышавъ от многихъ мудрыхъ людей и дохтуров и философов про твое царьское мудрое прирожение, и так пишут о тебе о великом царе по небесному знамению о твоем царьстве и о мудром воинстве беречи веры християнския и умножати, и неверных в веру приводити, и славу Божию возвышати, и правду во царьство свое ввести, Богу сердечную радость ввезсти, и ты, государь, те книшки обе вели отдать назад. Да и сию книжку прочетши вели мне же отдати,[772] и только тебе не полюбится, благоверному царю.

Ехал есми, государь, из Югор на Волоскую землю[773] и был есми пять месець у Петра, волоского воеводы, в Сочаеве.[774] И он про тебя, государя благоверного царя, и про твое царьство говорит на всяк день, и у Бога просит во умножение веры християнские. И онъ говорит: «Такова была вера греческая силна и мы ся ею хвалилися, а ныне рускимъ царьством хвалимся». Да говоритъ так: «Боже, поблюди ее от неверныхъ и от ереси вражия». Да того не хвалит, что крестъ целуютъ, да изменяют,[775] то есть велия ересь, что за веру християнскую не стоятъ, а государю верно не служат. Да и того не хвалит, что усобную войну на царство свое напускаетъ, дает городы и волости держати вельможам своимъ,[776] и вельможи от слез и от крови рода християнского богатеют нечистым собраньем, и как сьедут с кормленей и с волостей, а в обидах присужают имъ поле,[777] и в том на обе страны много греха сотворяют. Крестъ целуют на виновате оба исца,[778] — истецъ и ответчик: один приложивши ищет в своей обиде, а другой всего запирается, и в том оба ихъ во гресе погибают, и в великую ересь впадают, и на Бога хулу кладут, и не крепко крестъное целованье держат, темъ Бога всемъ гневят. Чемъ вера християнская украшена, а они того крепко не держат.

Тако говоритъ Петръ, волоский воевода, про первого царя турского Махмет-салтана:[779] «Неверный царь, да Богу угодно учинил: великую мудрость и правду во царьство свое ввел, по всему царьству своему розослал верныя своя судьи, и пооброчивши их ис казны своим жалованьемъ,[780] чемъ им мочно прожити з году на год. А судъ дал полатный во всем царство свое судити без противня, а присуд велел имати на себя в казну, чтоб не искушалися и в грехъ не впадали, Бога не разгневили. Да какова вельможу пожалует за ево верную службу каким городом или волостью, и онъ пошлет к судьямъ своим и велит по доходному списку выдати ис казны вдруг.[781] А просудится судья, ино им пишется такова смерть по уставу Махметеву: возведет его высоко, да бьет его взашей надол, да речет тако: «Не умелъ еси в доброй славе жити, а верно государю служити». А иныхъ живых одираютъ, да речет тако: «Обростешь телом, отдастъ ти ся вина та». По уставу Махметеву с великою грозною мудростию а нынешнии цари живут.[782] А виноватому смерти розписаны, а нашедши виноватого не пощадити лутчаго, а казнят ихъ по делу дел ихъ. Да рекут тако: «От Бога написано: комуждо по деломъ его».

А тако говорит Петръ, волоский воевода: «Знаменуется в мудрых книгах, пишут философи и дохтуры о благоверном великом царе руском и великом князе Иване Васильевиче всеа Русии, что будет у него во царьстве таковая великая мудрость и правда неправедным судьямъ от его мудрости великия, от Бога прироженныя».

А тако говорит Петръ, волоский воевода, про руское царьство, что: «Вельможи руского царя сами богатеют а ленивеют, а царьство оскужают его. И тем ему слуги называются, что цветно и конно и людно выезжают на службу его, а крепко за веру християнскую не стоят и люто против недруга смертною игрою не играют, тем Богу лгут и государю».

Ино тако говорит Петръ, волоский воевода: «Что ихъ много, коли у нихъ сердца доброго нету и смерти боятся, не хотят умрети. Всегда богатые о войне не мыслят, а мыслят о упокое. Хотя и богатырь обогатеет, и онъ обленивеетъ».

Тако говорит Петръ, волоский воевода: «Воинника держати, как сокола чредити:[783] и всегда сердца имъ веселити, а ни в чем на него кручины не напускати».