Том 9 (Конец XIV - первая половина XVI века, подъем общественного значения литературы)

Ино тако говорит Петръ, волоский воевода: «Таковому силному государю годится со всего царьства своего доходы себе в казну имати, и из казны своея воинником серца веселити, ино казне ево конца не будет. Который воинникъ лют будет против недруга государева смертною игрою играти и крепко будет за веру християнскую стояти, ино таковым воинником имяна возвышати и серца имъ веселити, и жалованья имъ из казны своея государевы прибавливати, и иным воинником серца возвращати, и к себе ихъ блиско припущати, и во всем имъ верити и жаловати ихъ, послушати во всем и любити ихъ, аки отцу детей своих, и быти до них щедру. Щедрая рука николиже не оскудевает и славу царю собирает. Что государю щедрость к воинником, то его и мудрость».

А про тебя, про государя, про великого царя благоверного говорит Петръ, волоский воевода: «Таковому государю годится держати дватцать тысячь юнаков храбрых со огненною стрельбою[784] гораздо ученою и стрельбы поляницъ со украины[785] на поле при крепостехъ от недруга, от крымского царя, и оброчивши их из казны своим жалованьемъ государевым годовым. И оне навыкнут в поле жити и от недруга, от крымского царя, воевати. Ино та ему дватцать тысечь лутчи будет ста тысящ, а украины его будут всемъ богаты и не оскужены от недругов. А мочно ему таковому сильному царю то все учинити».

Тако говоритъ Петръ волоский воевода, про греческое царьство: «Велможи греческия при царе Констянтине Ивановиче царьством обладали[786] и крестное целование ни во чтоже ставили, и изменяли, и царьство измытарили своими неправедными суды, от слез и от крови християнския богатели и богатство свое наполнили нечистым собранием. А сами обленивели, за веру християнскую крепко не стояли и царя укротили от воинства своими вражбами, и прелестными путми, и ерестными чародействы. И темъ царьство греческое, и веру християнскую, и красоту церковную выдали иноплемянником турскимъ на поругание. А ныне сами греки за свою гордость и за беззаконие, и за ленивство свое веру християнскую у царя у турсково откупают: и великие оброки даютъ царю турскому, а сами в неволе у царя у турсково за свою гордость и за ленивство живут. Греки и сербы наймуются овецъ пасти и верблюдов у турского царя, и лутчие греки, и они торгуютъ».

Говорит Петръ, волоский воевода, с великими слезами про ту веру християнскую руского царьства. И просят у Бога все, государь, во умножение веры християнския от восточнаго царьства, от рускаго царя благовернаго и великого князя Ивана Васильевича всеа Русии. Темъ царьством руским ныне и хвалится вся греческая вера, и надеются от Бога великого милосердия и помощи Божии свободити руским царемъ от насильства турскаго царя-иноплемянника.[787]

И говорит Петръ, волоский воевода: «Таковое силное, и славное, и всемъ богатое то царьство Московское! Есть ли в том царьстве правда?» Ино у него служит москвитинъ Васка Мерцалов, и он того спрашивал: «Ты гораздо знаешь про то царьство Московское, скажи ми подлинно!» И он стал сказывати Петру, волоскому воеводе: «Вера, государь, християнская добра, всемъ сполна и красота церковная велика, а правды нету».[788] Ктому Петръ волоский воевода заплакал и рекъ тако: «Коли правды нетъ, ино то и всего нету».

Тако говорит Петръ, волоский воевода: «Истинная правда Христос есть, сияет на все небесныя высоты и на земныя ширины, на преисподния глубины многочисленно светлее солнца. Все ему колена поклонилися небесныя и земныя, и преисподния, и все его святое имя восхвалили и прославили, яко святъ Господь Богъ нашь, силен и крепок, и безсмертенъ, и велик Богъ християнский, и чюдна дела его, долготерпелив и многомилостивъ. И в котором царьстве правда, в том царстве и Богь пребывает и гневъ Божий не воздвизается на то царьство. Нетъ сильнее правды в божественном Писании. Правда Богу сердечная радость, а царю великая мудрость и сила. Помилуй, Господь, веры християнския тоя от неправды. Тако боролся диявол всеми неправдами з греки, не любячи веры християнския, для тово что вера християнская Богу люба; всехъ веръ лутчи, Богь ее любит, и диявол изборол всякою неправдою. Ино ныне на то надеются, что пишут мудрыя философи и дохтуры о благоверном царе и великом князе Иване Васильевиче всеа Русии, что он будет мудръ и введет правду во свое царство».

И тако говорит Петръ, волоский воевода, и просит у Бога милости, моляся: «Боже, дай милосердие свое великое, чтобы та его мудрость не обинулася благовернаго и великого царя, и толко бы по нашимъ грехом да не то царство руское осталося, и просияло верою християнскою волное царство, и нам было нечим говорити греческой вере, яко жидом и ормяном нечим говорити, что нетъ у них волнаго царя и царства волнаго. А мы темъ царством християнским руским греческой вере хвалимся». И тако говорит Петръ, волоский воевода: «Поблюди его, Господи, многолетно и на умножение веры християнской».