Том 9 (Конец XIV - первая половина XVI века, подъем общественного значения литературы)

Животное же ни едино живяше на земляных широтах, ни по воде пловущее, ни по суху ходящее, ниже по аеру летящее. Но всесвершеный Богъ водному естеству крепость вложив одушевленую и силу рождественную, живи души оттуле повеле произыти, яко из чрева внове зачатымъ младенцемъ болящаго и обременена рожествомъ свершена отрочате, яко семя бо Божие повеления спадши, водоточныя струя творяше многоплодны. От сего простокрилнии птице аеропарнии, имеяху свободно перо, на летании борзаа, и легцы возвышахуся к ширинамъ воздушнымъ, обтичюще пролития его тонкопролитная. Ово убо великокрилни и великобедри, и ключатаноктии, и яко стрелы нокте протяжуще, остри клюнове имуще паче ножев, имъже хотяше снедь мяса быти, и дружина быти на снидение плотемъ птицами владущи орел, ястребы суровоядцы, и все, имъже и нестъ потребен огнь, плоть ядущимъ. От сего птица песнивыя и былия ядущия, малоперие и худотрупие; различно возглашаху дрозгове, славие, бригорие, синице, скворцы и всяко перо, селная былие обходящее и оттуду нетрудную снедь и красную збирающе. Тогда и зверие на земли явишася страшнии: львове частогривии, медведи, пардуси, тигры, кози стремозубые,[145] птищонозеи заецы, и пси острозубии, твердоперсий елифантинъ, и всяка птица, и всяко ползающее, елико в водах живет, и елико в мори, и в горах вкупе елико. Толиким же животными мокрую исполнив и сушу, еще же и нерукотканную одежду, аер, егоже божественых испрядоша перстъ тонкоделания, яко град твердонырен и простран распространив плотосниднымъ птицамъ и былия ядущимъ, дне соверши течения пятого.

ДЕНЬ ШЕСТЫЙ

Шестый же день паки облистоваше шипкозрачен, и вертоград добродревен Богъ насаждаше, не мотыками раскопав, ни рылми, ни разорав доброту прекрасные земля, ниже дланми насадителными, но словомъ единым. И древо всяко прозябаше доброплодно тамо, благовонно, добросенно, листвено, доброветвено и сладкоуханно. И кто убо доброту едемскую пред лицемъ представит? Ово бо стеблия садовиямь беху овощноноснымъ, ово же множество древес, благоуханнымъ и присноцветущих, ово медоточныя прозябаху овощия, ово же на красоту изращаху небесемъ точныя высотою древеса: елешия водами питаемая, и островерхое елие, превысокая тополия, и кипарисия, и брестия. Листвия сражахуся вкупе древняя, веия смешахуся и соединяхуся стеблия. Подобляхуся якоже самохотне древняя листвия пригренующася друг со другомъ сплетенми любезнейшими. Солнце восияваше и к садовию приближашеся, сметаше долу тихо листвие их кротко, елико же частина отверзашеся листвию. Восияваху шипкими доброты, и крином святяшеся белость. Небодливии же и бес трении шипцы они, елико багро и белозрачно в нихъ, яко звезда луча испущающи сияющи от земля. Ово же земленое лице зеленяшеся травами, ово же мудрияшеся росокаплеными цветовы и многоразличными доброзрачнии. Зефир тиходыходателнии подыховаше отвсюду, и цветными вонями наполняше воздух. <...>

II

ЗДЕ ПОВЕДАЕТ, КАКО ВЕЧЕРНЫИ ЕЛЛИНЕ И ВОСТОЧНЫЕ МЕЖДУСОБНУЮ РАТЬ СОТВОРШЕ ВЕЛИКУЮ НЕКОГДА

Давыду же обладующу еще иноплеменными,[146] яже кь троям брань составлена бысть ради Еллини, жени Менелаови. Сию аз восхотев брань списати, якоже писавшими прежде пишетца о ней, и хотя глаголати о ней, не якоже Омирь списует, прощения прося от благоразумных. Омир бо, сладкий языком и доброумный, различными шарови премудрости украшает словеса, инужду многая обращает и прелагает.[147] Но се убо прочее сиа да сповемыи.

Цареву сыну, обладающу Троем, Приаму, супружница беше Екава, дщи Киссова, и мати бысть от сего многим детем. Имущи убо в чреве и близ рожества сущии, страхованми устрашися ношьных снов; видети бо мняшеся главню, горящую огнем, из чрева ея проничющу и попаляющу град весь вкупе. Услыша же Приамъ сиа и волхвом предложи; разуме, яко полезно есть ему и граду, аще раждаемое зверем дано будет или во огнь палящий на погибель ввержено будет. По мале же Александръ[148] изыде на светъ, младенец радостен, благообразен, добролепен. Подобаше убо Приаму не разложити никако, но абие проникшее из чрева отроча погубити. Он же естеством побежден быв, пощаде рождьшеася: мню же премудрити дръзость добрыя чясти, иныимъ на вьспитание пометну е на селъ, еже от самого Парида Париемъ прозванное. Повръжено убо бе небрегомо, обретошу же е пастырие, и ущедришу, и вьзяшу, и пощудешу отрочя, и яко младенца вьскръмишу е, Париемъ нарекше.