Том 9 (Конец XIV - первая половина XVI века, подъем общественного значения литературы)

Приближившу же ся ему юношьскаго вьзраста, Приамь съобедника его приемъ, мня, яко избегнулъ есть яже от него пакости. Ну беху нерассукана прядена добрыя чясти, и единою реченому не мощно бе погыбнути. Александръ бо, некого от съродник си убивъ неволними убо стръмленми, ну обаче съдъла убийство, отиде къ Менелаю от Троа въ Спартъ. Прият же сего добре онъ, яко друга, почьте его и угости, и вьсечьскыи полюби. Зде твоа игра, мучителю вьсехъ, рекь,[149] зде твоа игра и враждное семя, темже въжеглъ еси великуя пещь брани! Отиде же Менелае, а оста единъ Парие, и виде Менелаову вь клети жену. Бе же жена прекрасна, добровеждна, доброзрачна, добролична, и доброобразна, големоока и, якы снегъ, бела, и даровъ испльнена множьствомъ сущи. Виде убо сию Александръ и вьсхитися добротою ея. И что много дльгословити и писати — вьсхыти я хотящу и бега ся ятъ. И беганиа инако не могы утолити, въ корабь вьшедъ морскый, отиде вь Финикъ, от ведущаго уклонився шествиа въ Трои, гонение бо ожидааше от обиденыихъ. Объят же бывъ ветры крепкыми и многомутными, едва въ некое приста устие Нилово, Кановикъ[150] нарицаемое въ летех последнихъ, идеже създанъ бе храмъ ироа Ираклеа, потребу подавая чловекомъ нескудную. Въ сей убо храмъ прибегше от нужду бежавшей с ним путници и съплававшей многими его облагаху досадами и поношенми, обличающе злая, сътворенная от него, поругание и нечестие еже к странноприемодавшему его, показа о восхищенн жене, паче же о имение. Услыша же сиа воевода обладаяи место, услышав же и Протевсъ, царь египетский, и бывает приведен к нему Парие со женою и со имением, и с путники. И он убо вопрашааше, кто есть жена и чиа есть, и откуду вземъ ю, сюду блудиши; Александръ же составляаше ложная словеса. Протевсь же увидев яже о Елене, сицевая ко Александру изрече словеса: «Аще ся не бы прежде обещал и проуставил, еже ни единаго странна убивати от буря тужаемых лютыя и зде приметаемых, великими тя убо бых и лютыми муками обложил, неблагодетну о благодетели и устав поправша и дружнюю любовь. Ныне же ти имения и жену сию не дамъ, аще и многими мя обидеши подхибами, Елену же тобою напаствованнаму соблюду, ты же от нее останися и от Египта бежи».[151] Протевес убо сь прещенми отгна Париа. Он же тщами руками возратися ко отечеству, сласти вкусивъ краемъ прьста тъкмо, и къ воздуху досяжющи пламянь вьжег, ибо по отшествии его от Спарта и по Еленине восхищении сицевая приключившисе.

Возвратися Менелае от ошьствиа, и уведев бывшее, растерза ризы своя, и с ним Дарие, отець Еленинъ. По среди же приведоша еллинския первие, одрани лици суща и почернела и клятву помянует страшных онех, имиже заклинахуся еллини вси, яко аще прилучитца от некоего Елене въсхищене быти, вси своими телесы о ней да поборетца. Много убо молився и припадавше, увещаша елени воевати на трояни. И убо мнози стекошася от остров и от суша, воскраи сущии моря и далече отстоящее, от Афин и тоземцы, от всякого места: от Феталие и от Архие,[152] и от всее Еллади. Беху же имъ поборници Родь, Ифакь, Скирь и Салам,[153] с ними великий Крит; коринтине уведеше, и аргиане съпособьствоваху, и столъ тьмаме сьставленъ тем сьставльшеся.

Беше Менесфес от Афен, Нестор от Пила, от Итака Дисевсь, от Саламина Еа, от Крита же бе Идоменевсь, Тлиполемъ же от Рода. Вси роди имуще от благородных кровий, мужолепни, доброродни, храбри, добли, добри и ярольвни, мужие кровии вси. Ефиянин же Ахиллей[154] сияше паче всех, человекъ ратем победник, силен и крепкорук. И, собравше многочисленую рать, царя поставиша[155] ратиначалника и военачалника, мужа храбра и добра, ироя крепкаго, и добротою сиаю и мышьцею силы. От отечествь убо своих исходят и другов, и сродникъ, яростию же ополчаютца на брань. И убо вси свещавшася расудиша быти добро, еже пленовати и расиповати сущая под областию Трою, яко да и симъ будет на потребу и трояном ослабеет помощь. Послан убо бывает Ахиллей и от храбрых друзи, и на острови нападоша, и поплениша сушю, и до конца затерше еллика беху супостатная. Услышано же бысть еллини яже о Елене, яко Протевсь царь отяът ю от Пара, и яко у него хранится во граде Мемфе. Нь тьщахуся окрестъ напасти Троа, слышаще о нем, яко сокровищи златыми исполнен есть и многим богатством кипит. Хотеху же и отмстити оскорбившим их, нехрабрость бо, и смирение, и слабость непщеваху, еже не отдати поношению своему мук достойных.