Вирши

А

(Первый пастух):

О небеса, что долго зазорите,
Адамантовых врат[154] не отворите,
Удержуете нам обещанного
Агнца славнаго?
Спустете радость ненасыщенную,
Кропете свыше росу спасенную,
Оживляющу изсохшия души
В греховней суши.

В

(Второй пастух):

Что за глас слышу, о юноше красный,
Сниш ветка в новой благодати ясный?
Почто на небо вопль возсылаеши,
Агнца чаеши?
Уже бо сенный закон пременися,
Обетованный Мессия[155] родися,
Его же вой ангел нам явиша,
Всех устрашиша.
Слава во вышних Богу вопиюще.
Мир человеком весело зовуще,
Нам бегшим в страсе комужде предсташа,
Всех утешаша.
Пророчествия нам откривающе,
Обетованна агнца являюще.
Его же очи воистинну наша
Днес соглядаша.

А

И от нас мнози в нощь сию видеша,
Растворшеся небо, тако реша,
Множество ангел на воздусе крылы
Небо окрили.
Венцы любезно сплетшася летали,
И друг со другом радостно играли,
Умиленными гласы вси пояху,
Песни плетяху.
Инии низско к земли ся спущали
И веселыя вести сказывали,
Вы же в пищалки с ними и в свирели
Согласно пели.
А они скоро посолство сказавше,
Парными крылы в небо (мир вам давше)
Летели, вы же скажете нам ныне
Своей дружине:
Что за посолство, что за вести были,
Радости многи весь свет исполнили,
Чему-то с вами земля радуется,
Небо смеется?

В

Сего посолства отци наши ждали,
Еже мы слышим, они не слыхали,
Обещанно бо от писаний давных
Пророков славных.
Днес исполнися их глагол неложный,
Бог, оставивший свой престол велможный,
Сниде до наших (с небес емпирейских)[156]
Низин земелских.

А

Кая же вина, что творец всемогий
Оставль богатый Олимп[157], в наш убогий
Дол земный сошел и явися вама,
Скажете нама.

В

Склонил монарха, пресветое око
На землю, седя в престоле высоко,
Призрети немощь, его же от века
Создал человека,
И узрел реки слез проливающих,
Воздыхания и вопль рыдающих,
Слыша узами от врага стисненных,
Во тме томленных,
И умилися милосердный Отец,
Видевши людей своих яко овец
Преданных смерти, кроме всея вины,
Туне без цены,
Учинил совет на горнем престоле,
В страшном своего величества поле,
З равнопрестолным Сыном и пречистым
Духом си и святым,
Что бы за окуп дати, да не туне
Человек погибнет, рекл: тебе есть уне
Единородие, мой Сыне, от века
Спасти человека.
Слово же словом от Отца рожденно,
Словом приемлет плот неизреченно,
Действом Святаго Духа стался человек,
Бог прежде всех век.
Ныне от Девы чистыя родися
И нам неложно во плоти явися,
Его же мы вси видехом очима
Ныне своима.
Свидехом царей з Востока пришедших,
Многоценные ему дары несших
От Тирских конец и от Аравитцких
И стран Персидских[158].
С теми то вестми ангели сходили
И то посолство нам благовестили,
Мы же видехом Слово, вы грядите
Сами узрите.

А

Камо же пойдем, пути не ведуще,
Како обрящем, места не знающе,
Ни града того, где есть обитаяй
Бог, мир спасаяй?

В

Идите путем к Вифлеому прямо,
Узрите звезду стоящую тамо
Верху вертепа, з Востока пришедшу,
Волхвы приведшу.
Вшедше во вертеп, смотрите седящу
Деву, отрока на лону держащу,
Ему же дары царие отдают
И припадают.

А

Понеже ему цари ся кланяют
И венцы своя под ноги складают,
Нам же простячком како можно смети
На царя зрети?
Како отворим уста буи суще,
Что проглаголем вежства не знающе,
Ненаучени красомовства, а ни
Книжных писаний?
Обыкохом бо со безсловесными
Скоты в пустынях и фавны лесными
Пастушки суще, мудрости не знаем,
Вся просто чаем,
Не видехом николиже можных
Монархов нигде, ни царей велможных
Не имеем же цветных от виссона
Риз[159], ни хитона,
Ни многоцветных подарков имамы
Ему достойных, убози бо сами
Скудным же везде между богатыми
Несть части с ними.

В

Братие, и мы тоже пастушкове,
Якоже и вы и вси простачкове,
Неучени же буквам, ни выдворных
Слов красомовных,
Но яко чин наш есть, сице приидохом
И с миром к нему во вертеп внидохом,
Поклонившеся в простоте, что знахом,
То глаголахом.
Ни щитахомся с велможи о месте,
Их должно чтити везде, сами весте,
Особ же ставши, кланяхомся низко
При яслех блиско.
Не имехом же ни даров богатых,
Кроме овчаток, ниже одежд златых,
Не в чин бо и есть пастухом богаты
Одежды златы,
Не у Мессии видехом таковых
Златотканных риз, ниже виссонновых,
Но смиренными повит пеленами,
Узрите сами.
Сище убо ради нас мирился.
Остави небо (в яслех положился),
Престол велможный и светлы Трионы[160],
Скипетр, короны.
Оставил тмы тем ангел предстоящых,
Пред лицем его с трепетом служащых,
От человеческих же недр (аще и смирился),
Не отлучился.
Изволил же ся со скоты вселити
Во вертеп темный и с ними пребыти,
Да нас посадит в лучезарных тронах,
В златых коронах.
Вол бо и осел двое скотов ему
Греюще слухати владыце своему,
С ними Иосиф старенкий и мати
При отрочати.
Сей вам праведный муж вся тайны скажет
И рождшагося младенца покажет,
Вы же несите дары отрочатку,—
Вси по овчатку.
Он бо любезно и нам исповедал,
Что от ангела таинства уведал,
Идите же с миром, сами вся узрите,
Нас же простите.
Зрети же Христа вси сподобившеся,
Грядуще в дом свой возвеселившеся.
Сию песнь гласно в свирели играйте
И воспевайте:
Hymnus sev rotula[161].
Ныне нам радость явися,
Христос, Сын Божий, родися,
мирови спасение,
Возлюблении внемлете
и греховных приемлете
от уз избавление,
Се бо единородного
Бог сына возлюбленнаго
к нам со небес низпослал,
Дабы от узников ада
в любима своя чада
всех нас к себе собрал.
Дщи рождала Сионова,
что жезла Ааронова
древо сухо процвело[162].
Цветом прозябшим от него,
Бога днесь воплощеннаго
яве преобрасло.
О сем пророков великий
собор и патриарх лики
в законе прогадаша,
Что облацы небес горних
мессию до низин долних
низпустити обещаша.
Днес в Вифлеоме родися
и всем во плоти явися,
как Сын Божий мессиа,
Бог невидим от начатку
днес в маленком отрочатку
видим есть у Мариа.
Дева своими руками
повевает пеленами,
во яслех полагает,
Вол и осел нань дыхают
и от мраза согревают,
Иосиф утешает.
Ангельских началов силы
крылами небо окрили,
друг с другом играюще.
Гласы воздух оглашают
и весело воспевают,
сице возывающе:
Ныне на высоком небе
буди честь и слава тебе,
о Боже наш превечный,
На земли же спасение,
людем благоволение,
мирови мир сердечный;
Ко пастырем прилетают,
во Вифлеом посылают,
радость им вещающе:
Ныне Спас вам ест дарован,
от пророков проповедан,
бежите играюще.
Звезда же приводит цари
от Востока, несут дары
рождшуся царю мирну.
Чисто злато аравицкий,
тирский ливан и персидский,
сей от арамат змирну,
Пастушки же по овчатку
Богу в малом отрочатку
дают рождшуся ныне.
Мы же что принесем ему,
себе от нас смирившему? —
токмо речем в дружине:
О Христе царю, наш Боже,
всяк ум исповести не може
к нам благодатий твоих,
Дай же нам наслаждатися
тебе и радоватися
в светлых чертогах своих.