Проскинитарий. Хождение строителя старца Арсения Суханова в 7157 (1649) году в Иерусалим

Бысть некто царь во Египте, именем Сид; той убо Сид, изшед от Египта и страну хананейскую приим, иже ныне нарицаемую Палестину, и вселися в ню и созда град и нарече его, во имя свое, Сидон. Той убо Сидон славен бысть в старое время, и противился Тиру славою и силою, о нем же рече Господь во Евангелии: обаче Тиру и Сидону отраднее будет в день судный. И ныне тот град Сидон мало не весь пуст, живут мало немногие люди и зовут его Саит. И на том месте прежде того хананеи жили: о сем Давид пророк рече: тебе дам землю ханааню, уже достояния вашего. А во Евангелии пишет: изшед Иисус от земли гергесинския и отъиде во страны Тирския и Сидонския, и се жена Хананейска от предел тех изшедши. Таже от народа сидоня бысть Мелхий, той же Седек, бысть иерей и царь, наречен Мелхиседек, — отец тем; сей убо сый иерей Божий и царь хананеом, созда град на горе глаголемой Сион, нарече его Салим, еже сказуется мир, в нем же царствова лет 113; неродословен бо наречен бысть Мелхиседек, занеже, не сый от семени Авраамля, ни Моисеом родословен бысть; бысть же от хананеова рода, и от проклятого семени изшед, тем ни родословию сподобися; сего ради без матери и без отца быти ему, недостойных поведая праотец, зане в родословии не нарек, коего отца, или матери которые, или когда умре. Сего ради ни начатка днем, ни жизни конца имея; от наченших язык сый, от жития их книга яви: сей бо Мелхиседек царь салимский, иерей Бога вышнего, той срете Авраама от посечения царей, изнесе ему хлеб и вино, и благослови его, ему же и десятину уделив от всего Авраам. О сем пишет и святой апостол Павел ко Евреям, зач. 315: «Сей бо Мелхиседек, царь Салимский, священник Бога Вышнего, срете Авраама возвращшася от сечи царей и благослови его, емуже и десятину от всех удели Авраам, первое убо сказуется царь правды, потом же царь Салимский, еже есть, царь мира, без отца, без матери, без причта рода, ни начала днем, ни животу конца имея, уподоблен Сыну Божию, пребывает священник выну». А пророк Давид во псалме 109 пишет: «Ты еси священник во веки по чину Мелхиседекову». Нецыи же сице глаголют ему имя: яко бысть некто царь Салим и созда град; по совершении же града того, созда в нем церковь, еллинским языком зовется Иеро, еже есть святилище, или священие; и тое церковное имя Иеро совокуплено с царским именем Салим, и нарече имя граду тому Иеросалим, еже есть священный мир. Блаженный бо Ириней Лионский, во еже на ереси пятым словом утверждает, яко в три чины и уставы спасаемые разделяются: иже во сто плод принесших, иже в 60, иже в 30. От них же бо овии на небеса вознесении будут, овии же в раи поживут, овии же во святой град Иеросалим вселятся. Сего ради и рече Господь: «в дому Отца моего обители многи суть», вся бо обители Божии, иже всем по подобию жилище подаст, просвещая и славля вечно, по реченному от Исаии: «и будет тебе Господь свет вечен и Богу слава твоя». Сию же благую и вожделенную землю, от нее же первый человек бысть, и пророцы все и апостолы возрастоша, и та самая, яже всех небесных и земных тварей превысшая Богородица прозябе, и всяческим Господа и Владыку роди и мирскому спасению бысть ходатайца, и святую убо гору Сионскую, и священную митрополию Царя Великого и Бога и Спаса нашего Иерусалим язы́цы наследствуют. О сей же горе Сионе пишет царь и пророк Давид; «благословит тя Господь от Сиона, сотворивый небо и землю»; «Тебе подобает песнь Боже в Сионе»; «Благословен Господь от Сиона живый во Иерусалиме». И та гора Сион стоит, якоже мы видехом, между двух оврагов, сиречь потоков; имя единому, иже с восточной страны, еллинским языком: о клавтмос тон дакрион[196], а по-словенски: юдоль плачевная, а по другую сторону, с западной страны, поток называемый еллинским языком: о пуринос о потамос[197], а по-словенски: река огненная. На той горе Сионе, между тех двух потоков устроен бысть град Иерусалим; и спустя 40 лет по Воскресении Христове римский Тит, Веспасианов сын, пришед и тот град весь разори; и потом поставлен бысть град Иерусалим новый, иже днесь стоит, и Сионская гора выкинута вон из града, а в то место гора Голгофа принята внутрь града. Мера же граду сему: восточная стена, иже от потока Кедрского, начен от полунощи, от наугольной башни до врат гефсиманских 210 сажен; а оттоле до врат, которыми Христос въехал на жребяти осли от Вифании во Иерусалим, 150 сажен; и те врата ныне заделаны; а от тех врат до другого угла, иже на конце стены, что́ против святых, 207 сажен; и всего нижней стены, иже с востока от потока Кедрского, от угла до угла 567 сажен степенных, ходячих; а западная стена мнится мало покороче восточной, а полунощная и полуденная длиннее; и те стены не мерены, понеже кривы, но по смете положены, присматриваяся к восточной стене, но токмо изнутри града, поперек, с востока на запад от гефсиманских врат прямо по улице, по мере, 393 сажени степенных; о том писано пространнее на ином месте. И бысть убо гора Сион, в старом законе, внутрь града, а гора Голгофа на той же горе Сионе вне града, на ней же волею нас ради и нашего ради спасения пострада Христос Бог, пречистые руки свои на кресте распростре, и предаде нам новый закон; на ней же и церковь старая, называется Сион, понеже пишет св. апостол Павел: «аще бо первый закон непорочен был, не бы второму искалося место, и аще упразднися закон, упразднися и церковь законная, и вместо той законной церкви, воста нового закона церковь, Христова Воскресения. И егда убо ветхий закон бысть, тогда Сион гора честна бе у жидов и внутрь града бе; а гора Голгофа тогда бесчестна бе у жидов, и вне града бе, на ней же разбойников и прочих повинных смерти на кресте распинаху, и смерти предаваху; ныне же в новом законе гора Голгофа у христиан честна и славна, страсти ради Христовы, ее же от всех четырех стран всего света, иже именуются христиане, аще и еретицы мнози, но все, приходяще, целуют и поклоняются; и есть ныне внутрь града Иерусалима; и на той Голгофе, идеже Спаситель наш распялся, благочестивая царица Елена, по совету сына своего, первого христианского царя Константина, на месте краниеве созда церковь преславну, велию зело и дивну, еже есть новый Сион, иже и днесь стоит всеми зрима, ее же нарицает Божественное Писание святый Сион, мати церквам, Божие жилище. Мера ей описана в ином месте. Мню же, яко преподобный отец Иоанн Дамаскин о ней же пишет в степенных своих песнях: «ненавидящие Сиона да будут убо прежде восторжения яко трава, ссечет бо Христос выи их усечением мук». Давид же пророк о ней вопиет, сице глаголя: «любит Господь врата Сиона, паче всех селений Иаковлих». И паки он же рече: «избра Господь Сиона, и изволи в жилище Себе»; понеже на том месте, идеже ныне та церковь стоит, на горе Голгофе Христос Бог наш на кресте волею нас ради пречистые Свои руки распростер, и во Гробе положен бысть, и в третий день воскресе, и дарова нам живот вечный. А о Голгофе горе пророк Давид вопиет, глаголя: «явится Бог богом в Сионе и Господь твой в род и род». И паки он же рече: «гора, юже благоволи Бог жити в ней». Понеже писано: «яко живоносец, яко рая зело краснейший, и всякого чертога царска явися светлейший, Христе, Гроб Твой, источник нашему воскресению». И той убо живоносный Гроб Христа Бога нашего, источник нашему воскресению, и ныне в той великой церкви зрим всеми нами приходящими тамо. И о церкви убо Воскресения Христова, еже есть новый Сион, довольно сказахом; хощу же поведать о горе Голгофе, и о Гробе Христове, и о воскресении. Бысть убо во время страсти Христовы гора Голгофа вне града, якоже прежде рекохом, на ней же Спаситель наш распялся; и на том убо месте Животворящий Крест стоял; близь от того места с боку горы изсечен бысть Гроб, по изволению евреина Иосифа, иже от села Аримафея, ради погребения его. Егда сконча живот свой, в том убо Гробе, по испрошении у Пилата тело Иисусово положено бысть. Гроб же той изсечен бысть из камени, якобы палаточка невелика, из самородного камени, а не известию составными каменьми смазана, но высечена в горе; ему же мера описана будет на ином месте. И как царица Елена пришла во Иерусалим, и поклонися тому Гробу Христову, и снискав животворящий Крест Христов, под тою же горою Голгофою сохраненный от еврей, якобы в бояраке под брегом тояж горы, изволила потом на тех местах святых поставить церковь, и повеле гору сечь камень и опусти низко, дабы помост церковный ровен и прям был, идеже церковь та хощет основана быти, а самое место, на нем же Крест Христов стоял и прочих два, то́ повеле недвижимо оставити и не вредити ничем нимало, но токмо гору меж их и около их повеле высечь и вычистить камень, и на том месте повеле основать церковь. А Гроб Христов, и самая Голгофа, идеже Животворящий Крест стоял, стали внутрь тоя церкви, недвижимы ничем, но токмо промеж их и около их гора вся высечена, колико потребует место величеством под основание церковное. И повеле царица учинить Гроб Господень, на образец Гроба сына Давидова, царевича Авессалома, его же уби Иоав, иже ныне стоит вне града Иерусалима, во Юдоли плачевне, прямо к горе Елеонстей. Такожде Иакова брата Божия Гроб тутож недалеко от того Авессаломова Гроба. Подобно тому и евангелисты пишут о Гробе Христове, и о Воскресении. Лук. зач. 111: «И се муж именем Иосиф, советник сый, муж благ и праведен; сей не бе пристал совету и делу их, от Аримафея града Иудейска, чаяше и той Царствия Божия; сей приступил к Пилату, проси тело Иисусово; и снем е, обвит плащаницею, и положи е во Гробе изсеченне, в нем же не бе никтоже никогдаже положен. И день бе пяток, и суббота свиташе; во след шедшия жены, яже бяху пришли с ним от Галилеи, видеша Гроб, и яко положено бысть тело Его; возвращшеся уготоваша ароматы и миро; и в субботу убо умолчаша по заповеди. Иоанна зач. 62: Моли Пилата Иосиф, иже от Аримафеа, сый ученик Иисусов, потаен же страха ради Иудейска, да возмет тело Иисусово. Прииде же и Никодим, пришедый ко Иисусови нощию прежде, нося смешение смирнено и алойно яко литр сто; прияста же тело Иисусово, и обвиста е ризами со ароматы, якоже обычай Иудеом погребати; бе же на месте, идеже распятся, верт, и в верте Гроб нов, в нем же николиже никтоже положен бе; ту убо пятка ради Иудейска, яко близ бяше Гроб, положиша Иисуса. Матф. зач. 113: Позде же бывшу, прииде человек богат от Аримафеа, именем Иосиф, иже и той учися у Иисуса; сей приступил к Пилату, проси тела Иисусова; тогда Пилат повеле дати тело; и прием тело Иосиф, и обвит плащаницею чистою, и положи е в новом своем Гробе, иже бе изсечен из камени; и взвали камень велий над двери Гроба, и отьиде. Бе же Мария Магдалина и другая Мария седящи прямо Гроба». А о Воскресении Христове они же пишут. Иоан. зач. 63: «Во едину от суббот Мария Магдалина прииде заутра, еще сущей тме, на Гроб, и виде камень взят от Гроба; тече убо и прииде к Симону Петру и к другому ученику, его же любляше Иисус, и глагола има: взяша Господа от Гроба, и не вем, где положиша его; изыде же Петр и другий ученик, и идяста ко Гробу; течаста же оба вкупе; и другий ученик тече скорее Петра, и прииде прежде ко Гробу, и приник, виде ризы лежащя, обаче не вниде; прииде же Симон Петр вслед его, и вниде во Гроб, и виде ризы едины лежащя, и сударь, иже бе на главе Его, не с ризами лежащь, но особь свит на единем месте; тогда убо вниде и другий ученик, пришедый прежде ко Гробу, и виде, и верова. Не у бо ведяху Писания, яко подобает Ему из мертвых воскреснути; идоста же паки к себе ученика. Мариа же стояше у Гроба вне плачущи; якоже плакаше, приниче во Гроб, и виде два Ангела в белых ризах седяща, единого у главы, и единого у ногу, идеже бе лежало тело Иисусово; глаголаста она: жено, что плачешися? глагола има, яко взяша Господа моего, и не вем, где положиша; и сия рекше обратися вспять, и виде Иисуса стояща, и не ведяше, яко Иисус есть. Глагола ей Иисус: жено, что плачеши, кого ищеши? Она же мняши, яко вертоградарь есть, глагола Ему: господи, аще ты если взял Его, повеждь ми, где положил еси Его, и аз возьму Его. И глагола ей Иисус: Марие! Она же обращшися глагола ему: Раввуни, еже есть: Учителю; глагола ей Иисус: не прикасайся Мне, не у бо взыдох ко Отцу Моему; иди же ко братии Моей, и рцы им: восхожду ко Отцу Моему и Отцу вашему, и к Богу Моему и Богу вашему. Прииде же Мариа Магдалина поведающе учеником, яко виде Господа, и сия рече ей. Лук. зач. 112: Во едину же от суббот зело рано приидоша на Гроб, носяще, яже уготоваша ароматы, и другие с ними; обретоша же камень отвален от Гроба; и вшедше не обретоша телесе Господа Иисуса; и бысть недомышляющимся има о сем, и се мужа два стаста в них в ризах блещащихся; пристрашным же бывшим и поклоншим лица на землю, рекоста к ним: что ищете живаго с мертвыми? несть зде, но воста; помяните, якоже глагола вам, еще сый в Галилеи: яко подобает Сыну Человеческому предану быти в руце человек грешных, и пропяту быти, и в третий день воскреснути; и помянуша глаголы Его; и возвращшеся от Гроба, возвестиша вся сия единомунадесяте и всем прочиим; бяше же Мария Магдалина, Мария Иоанна, и Мария Иаковля, и прочие с ними, яже глаголаху ко апостолом сия; и явишася пред ними яко лжа глаголы их, и не вероваху им. Петр же встав тече ко Гробу, и приник виде ризы едины лежаща; и отьиде, в себе дивяся бывшему. Марк. зач. 70: Зело заутра во едину от суббот приидоша на Гроб, возсиявшу солнцу; и глаголаху к себе: кто отвалит нам камень от двери Гроба? и воззревше, видеша, яко отвален бе камень; бе бо велий зело, и влезше во Гроб, видеша юношу, седяща в десных, одеяна во одежду белу, и ужасошася; он же глагола им: не ужасайтеся; Иисуса ищете Назарянина пропятого: воста, несть зде; се место, идеже положиша его. Матф. зач. 115. В вечер же субботний, свитающи во едину от суббот, прииде Мария Магдалина и другая Мария видети Гроб; и се трус бысть велий: ангел бо Господень сшед с небесе, приступль отвали камень от двери Гроба, и седяше на нем. Бе же зрак его яко молния, и одеяние его бело яко снег».