Проскинитарий. Хождение строителя старца Арсения Суханова в 7157 (1649) году в Иерусалим

Из великой же церкви вышед вон, притвор, из притвора налево, сиречь на полдни двери невелики же; тут посторонь великой церкви огород армянских старцев и митрополита вифлеемского, из того огорода под великую церковь лествица, якоб в погреб; тут палатки учинены многие, поделаны, а в них яко закрома великие, а все полны костей человеческих; которые истлеют телеса, ино кости в особую палатку собирают, а плоть во иную, та тленная плоть яко земля черная; а иные многие лежат кости и жилы и тело сухо и не развалилося, а тело бело, а иные истлели, а иной человек лежит весь цел, и руце, и нозе, и глава, и утроба, и на них тело все сухо и бело, и все составы части целы, токмо уста мало и нос отпал; а что на нем саван, и то все яко прах тленно, а цело; да и много их под исподом лежат, а смраду от них отнюдь нимало нет, токмо дух тяжек, яко сырая земля, как бы в земляном сыром погребе. Тут же в первой палатке, что́ с приходу, учинен престол, к восточной стене приделан, и тут бывает служба. Около огорода того стена каменная армянская, и тем огородом идти на запад, и как миновав всю великую церковь, и тут монастырь армянский учинен, весь нов, церковь и палаты хороши и пространен гораздо с великим покоем. От того ж великого монастыря на зимний восток яко вержением камени пещера великая, а двери тесны гораздо, как можно человеку согнувшись пролезть, а внутрь две их велики, украшены были хорошо, столпы мраморные, из единого камени учинены; тут престол учинен и бывает служба, как кто захочет; двери той пещеры закладывают каменем от скота; а сказывают, что в том вертепе Богородица со Христом и со Иосифом жила два лета, в тоежде пещеру и волхвы приидоша поклонитися Христу с дары, из той пещеры бежала Богородица во Египет от Ирода; и тут де над теми пещерами был иной монастырь великий, а ныне и места не знать, арабы тут хлеб топчут, сиречь гумна учинены. И оттуда на летний восток есть поле ровное под горою, от Вифлеема версты с полторы; на том месте во время пречистого Рождества Христова пастыри бяху в ночь, и стражаху паству свою. Лук. зач. 5: «изыде повеление от Августа Кесаря написати всю вселенную; се написание первое бысть, владящу Сириею Киринию; идяху вси написатися кождо в свой град. Взыде же Иосиф от Галилеи, из града Назарета во Иудею, во град Давидов, иже нарицается Вифлеем, зане быти ему от дому и отечества Давидова, написатися с Мариею обрученною ему женою, сущею непраздною; бысть же, егда быста ту, исполнишася дние родити ей, и роди Сына своего Первенца, и повит Его, и положи Его в яслех, зане не бе има места в обители; и пастырие бяху в той стране бдяще... и се Ангел Господень ста в них, и слава Господня осия их, они же убояшася... и рече им Ангел: не бойтеся, се благовествую вам радость велию, яже будет всем людем, яко родися вам Спас, Иже есть Христос Господь, во граде Давидове, и се вам знамя, се обрящете Младенец повит лежащ в яслех; и внезапу бысть со Ангелом множество вой небесных хвалящих Бога и глаголющих: слава в вышних Богу, и на земли мир, в человецех благоволение; и бысть яко отъидоша от них на небо Ангели, пастырие реша в себе друг ко другу: прейдем до Вифлеема, и видим глагол сей бывший, иже Господь сказа нам; и приидоша поспешшеся, и обретоша Мариам и Иосифа, и Младенец лежащ в яслех; видевше же сказаша о глаголе глаголаннем им о Отрочате сем; и вси слышавше и дивишася о глаголанных от пастырей к ним... и возвратишася пастырие славяще и хваляще Бога». Матф. зач. 3 сице пишет: «Иисусу рождшуся в Вифлееме Иудейстем во дни Ирода царя, се волсви от восток приидоша во Иерусалим, глаголюще: где есть рождейся Царь Иудейский? видехом бо звезду Его на востоце, и приидохом поклонитися Ему; слышав же Ирод царь смутися и вся Иерусалима с ним, и собра вся первосвященники и книжники людския, вопрошаше от них: где Христос рождается? они же рекоша ему: в Вифлееме Иудейстем, тако бо писано есть пророком: и ты Вифлееме земле Иудова, ничим же менши еси во владыках Иудовых, из тебе бо изыдет Вождь, Иже упасет люди Моя Израиля; тогда Ирод тай призва волхвы, испытоваше от них время явльшияся звезды; и послав их в Вифлеем, рече: шедше испытайте известно о Отрочати, егда же обрящете, возвестите ми, яко да и аз шед поклонюся Ему; они же послушавше царя идоша; и се звезда, юже видеша на востоце, идяше пред ними, дóндеже пришед ста верху, идеже бе Отроча; видевше же звезду возрадовашася радостию великою зело; и пришедше в храмину видеша Отроча с Мариею Материю Его, и падше поклонишася Ему, и отверзше сокровища своя, принесоша Ему дары, злато, ливан и смирну; и весть приимше во сне не возвратитися ко Ироду, инем путем отъидоша в страну свою. Отшедшим же им, и се Ангел Господень во сне явися Иосифу, глаголя: востав поими Отроча и Матерь Его, и бежи во Египет и буди тамо, дóндеже реку ти, хощет бо Ирод искати Отрочате да погубит Е; он же востав, поят Отроча и Матерь Его нощию, и отъиде во Египет, и бе тамо до умертвия Иродова, да сбудется реченное от Господа пророком глаголющим: от Египта воззвах Сына Моего. Тогда Ирод виде, яко поруган бысть от волхвов, разгневася зело и посла изби вся дети сущия в Вифлееме, и во всех пределех его, от двою лету и нижайше, по времени, еже известно испыта от волхвов; тогда сбытся реченное Иеремием пророком глаголющим: глас в Раме слышан бысть, плачь и рыдание и вопль мног, Рахиль плачущися чад своих, и не хотяше утешитися, яко не суть. Умершу же Ироду, се Ангел Господень во сне явися Иосифу во Египте, глаголя: востав поими Отроча и Матерь Его, и иди в землю Израилеву, изомроша бо вси ищущии души Отрочате; он же востав, поят Отроча и Матерь Его, и прииде в землю Израилеву; слышав же, яко Архелай царствует во Иудеи вместо Ирода отца своего, убояся тамо идти, весть же прием во сне, отъиде в пределы Галилейския, и пришед вселися во граде нарицаемом Назарете». Якоже глаголет Епифаний кипрский, пять лет поживе Христос во Египте.