Проскинитарий. Хождение строителя старца Арсения Суханова в 7157 (1649) году в Иерусалим

В том же дому вечерял Христос со ученики своими, тут же Иоанн возлеже на перси Его и рече: Господи, кто есть предаяй Тя? Он же рече ему: омочивый рукою со Мною в солило, якоже пишется о сем во Евангелии Матфея, зач. 107: «рече Господь учеником Своим: весте, яко по двою дню Пасха будет и Сын Человеческий предан будет на пропятие; тогда собрашася архиереи и книжники со старцы людстии во двор архиереов глаголемаго Каиафы, и совещаша, да Иисуса лестию имут и убиют; глаголаху же, но не в праздник, да не молва будет в людях. Иисусу же бывшу в Вифании, в дому Симона прокаженнаго, приступи.... В первый же день опресночный приступиша ученицы ко Иисусови, глаголюще Ему: где хощеши да уготоваем Ти ясти Пасху? Он же рече: идите во град ко онсице, и рцыте ему: Учитель глаголет, время Мое близ есть, у тебе сотворю пасху со ученики Моими; и сотвориша ученицы, якоже повеле им Иисус, уготоваша пасху; вечеру бывшу возлежаще со обеманадесяте ученикома Своима, и ядущим им рече: аминь глаголю вам, яко един от вас предаст Мя; и скорбяще зело, начаша глаголати Ему один же кождо: еда аз есмь Господи? Он же отвещав рече: омочивый со Мною в солило руку, той Мя предаст. Сын же Человеческий идет, якоже писано есть о Нем: горе же человеку тому, имже Сын Человеческий предается, добре бы было ему, аще ся не бы родил человек той; отвещав Иуда, предаяй Его: еда аз есмь, Равви? глагола ему: ты рече. Ядущим же им, приим Иисус хлеб, и благословив, и преломи, и даяше учеником, и рече: приимите и ядите, се есть Тело Мое, и прием чашу, хвалу воздав, дает им, глаголя: пийте от нея вси, се бо есть Кровь Моя Новаго Завета, яже за многия изливаема во оставление грехов; глаголю же вам, яко не имам пити от ныне от сего плода лознаго до дне того, егда испию с вами ново во Царствии Отца Моего; и воспевше отъидоша в гору Елеонскую; тогда глагола им Иисус: вси вы соблазнитеся о Мне в нощь сию, писано бо есть: поражу пастыря и разыдутся овцы стада»[227].

Тут был дом Иоанна Богослова и Иакова брата его, о нем же пишется сице: Иоанн убо, якоже истории свидетельствуют, по смерти Заведея, отца своего, со Иаковом братом своим, продавше дом отца своего во граде галилейстем[228], и пришедше во Иерусалим, купиша святый Сион, высочайша бо страна бе обону страну Иерусалима, яко Каиафа тогдашний архиерей просил у Иоанна в купление дом, повелением же старшего брата своего, Иакова, даде Иоанн полдома архиерею Каиафе в пребывание, сего ради Евангелие воспоминает, яко ученик той знаем бе архиерею, а полдома себе остави, в нем же и вечерю тайную со ученики Своими Господь наш яде. Святой же Епифаний Кипрский в слове о житии Пречистой Богородицы пишет сице: Иоанн же Заведеев, по умертвии отца своего, продаде все имение свое, из Галилеи пришед во Иерусалим купи Сион, в том де дому Иоаннове было сошествие Святого Духа в день пятидесятый на святых апостолов, в той же храмине другая храмина долу наземли низко, в ту де храмину прииде Иисус по Воскресении Своем ко учеником Своим, дверем затворенным, и став посреде их и глагола им: мир вам, писано во Евангелии зач. 65 от Иоанна: «сушу позде во едину от суббот, и дверем затворенным, идеже бяху ученицы Его собрани страха ради Иудейска, прииде Иисус и ста посреде их, и глагола им: мир вам, и се рек, показа им руце и нозе и ребра Своя; возрадовашася ученицы, яко видеша Господа; рече им паки: мир вам, якоже посла Мя Отец, и Аз посылаю вы; и се рек дуну, и глагола им: приимите Дух Свят, им же отпустите грехи, отпустятся им, и им же держите, держатся. Фома же от обоюнадесяти глаголемый Близнец не бе ту с ними, егда прииде Иисус; глаголаху же друзии ученицы, яко видехом Господа; он же рече им: аще не вижду на руку Его язвы гвоздинныя, и вложу перста моего в язвы гвоздинныя, и вложу руку мою в ребра Его, не иму веры. И по днех осмих паки бяху внутрь ученицы Его, и Фома с ними; прииде Иисус, дверем затворенным, и ста посреде их, и рече: мир вам, потом глагола Фоме: принеси перст твой семо, и виждь руце Мои, и принеси руку твою и вложи в ребра Моя, и не буди неверен, но верен; и отвеща Фома, и рече: Господь мой и Бог мой; глагола ему Иисус: яко видев Мя веровал еси: блажени не видевшии и веровавше». А о сошествии Святого Духа пишет в Деяниях апостольских Лука Евангелист: «егда скончашася дние Пятидесятницы, беша вси апостоли единодушно вкупе; и бысть внезапу с небесе шум, яко носиму дыханию бурну, и исполни весь дом, идеже бяху седяще, и явишася им разделении язы́цы яко огненни, седе же на едином кождо их, и исполнишася вси Духа Свята, и начаша глаголати иными языки, якоже Дух даяше им провещавати». А все то было в дому Заведееве, отца Иоанна Богослова; в том дому жила Богородица, по распятии Христове, якоже писано в Евангелии: «Стояху же при кресте Иисусове Мати Его, и сестра Матере Его, Мария Клеопова и Мария Магдалыня; Иисус же видев Матерь и ученика стояща, егоже любляше, глагола Матери Своей: Жено, се сын Твой, потом глагола ученику: се Мати твоя; и от того часа поят Ю ученик во своя си».