Проскинитарий. Хождение строителя старца Арсения Суханова в 7157 (1649) году в Иерусалим

Глава 45. О Успении Пречистой Богородицы сказание преп. Епифания

О Успении Богородичном пишет преподобный отец Епифаний Кипрский архиепископ сице: Препетая же и Приснодевая и Всенепорочная Богородица, прежде пятинадесяти дней пророчествоваше о отшествии Своем ко Господу, прежде трех дней архангел Гавриил предста и возвести еже из мира сего отшествие ко Господу, посла, призва вся апостолы; они же приидоша к Ней, приидоша же и жены Мария Магдалина, дщи Иосифова и ины многи в роде ее бывающии, многи словеса·изложив; и Та изложи им тайны страшные, яже в сердце Своем слагающи храняше, и целование ангела, и привидение его, и прежнее явление, яже бяше видела молящися в церкви, якоже во апостольских писаниях сказует, и завет творя, якоже вещает апостол Варфоломей, бяше удручена первого ради воздержания, и егда же прииде·час Ее, всем яви себе Христос, и от слова, и от просияния еже о Нем света, вси падоша на землю, быша яко мертвы, и рече им Иисус: мир вам! Они же от радости устрашившеся, пение же ангельское слыша невидимо. Апостолы же стояху унывше чудеси дивящеся, таже воспевша апостоли, яко сном сладким, разверсши уста предает дух Сыну Своему и Богу, сущи лет семьдесят и два, и паки ангелы воспевша отъидоша с Господем на небеса. Святые же апостолы, якоже ареопагитский Дионисий глаголет, свою песнь кождо их воспеша, а не вкупе все, ерофееву же пению все удивишися; и по отпении устроивше Ю, положиша во гроб в Гефсимании. По мале всем ту сущим зрящим еще восхитися святое Ее и нескверное и непорочное тело от очию их. Егда же и Божественный Суд неверного восхищнима дерость руце его отпасти сотвори, и похвальше божественни апостолы тако прославльшего и почтившего Бога, отъидоша кождо их во своя си. Чтут же ся лета Ее сице: семи лет принесоста Ю родителя Ее к Господеви во Иерусалим, сотвори же в церкви Господни полседма лета, в дому обручника Иосифа 6 месяц, идеже всемирная благовестися Ей радость; в пятоенадесять лето возраста Своего роди Бога Господа, с сыном же Своим с Господом нашим Иисусом Христом сотвори лет 33 и месяца 4, яже бывают счисляема 48, по Сыновнем же Вознесении, в дому Иоанна Богослова во святем Сионе пребысть лет 24, всех лет бывающих 72. По Успении же святой Богородицы, все апостолы рассеяшася. О Успении же Дионисий ареопагитский глаголет, быв у Нее с Тимофеем и со Иерофеем и прочими; сей же Дионисий и Тимофей ученика быста Павла апостола; Павел же по 6 летех и по 6 месяцех по Христове Воскресении крестися, по трех же летех начат проповедати, по 9 летех учити. Дионисий же глаголет: блаженный Павел по четыренадасятих летех взыти ему во Иерусалим по проявлению, якоже быти ему всем летом 24. Се же откровение обретохом в неких поминаниях, яко от Ефеса восхищен был Павел апостол Успения ради святой Богородицы, и глаголанное им к коринфяном, яко явися боле братии Христове, единаче по воскресении, и сему быти на Успении святой Богородицы.

Мнит же некто пресвитер добродетелен и богобоязлив делом и словом, божественные проходя сказания, глаголя: яко пребывающу ми сице, во едину нощь, предста ми некто глаголя: яко апостол Павел от Ефеса восхищен бысть на облацех на Успение святой Богородицы, и взыде до третьего пояса звездного, и узре яже обон моря океана и самого рая, и слыша глаголы неизреченные и пение ангельское; нецыи же глаголют: яко елицы от апостол быша во Иерусалиме, вси на облацех приидоша, но и Дионисий ареопагитский быв ту, паче же по некоему смотрению прежде исхода Ее собрашася.

О предании Господни на распятие