Том 15 (XVII век)

И царь Пор рече: «Готов есми бьтися с ним острым мечемъ». И царица рече: «Соломанъ, выступай!» И Соломан выступил и не поклонился царю и емълетъ свою царицу за руку и говорит тако: «Моя царица!» А царь Пор рече: «То моя жена, а толко бы твоя царица была, ино бы у тебя во царьстве была. Премудр еси ты, царь Соломан, два медведя в одном берлоге не уживутся, а два мужа у одное жены не могут ужится. Коей ты смерти хощешь?» И Соломан рече: «Ведаешь ты, государь царь Пор, у тебя в рукахъ, твоя воля царьская». И царь Поръ рече: «Пошлю тебя к белевежи[1534] и велю с тебя голову снять острымъ мечем, или по улицам розмыкать, или красной смерти: повесить велю тебя». И Соломанъ рече: «Дай мне красную смерть повешеную». И царь дастъ его пилату[1535], и пилат поставил на царя Соломана прясла[1536]. Воспалив же ся царь Поръ на царя Соломана и велелъ на пряслах поставить три осила[1537]: осилъ шелковой, а другой осил — серебряной, а сверхъ техъ золотой осил. И пилат рече: «Государь царь Пор, твоя страшная и грозная смерть поставлена на царя Соломана». И царь Поръ рече: «Поведите его на страшную смерть». И поведе пилат царя Соломана повесить. И выехал царь Пор и с царицею и весь миръ учели смотреть, какъ поведут на смерть Соломана царя. И Соломанъ рече: «Брате пилать, молви своему царю Пору, что царь Соломанъ просит ворона меду испити, чтобы не страшна смерть была царева Порова, и попроси у него златыя трубы: смала был есми охочь в трубную игру играть ратную». И принесе скоро кубецъ ворона меду и златую трубу. И Соломан испивает ворона меду ис купца и емлет златую трубу, у шелкова осила стоячи. И заиграл в златую трубу, ратъным рострубом трубитъ, и земля воздвигнется от трубнаго гласа, темъ рострубом своим слово молвит: «Седлайте добрых коней и поспешите, цари и уланы и силныя князи и крепкие воеводы!»

И пилат рече: «Царь Соломанъ, видишь, в коем месте смерть будет?» И Соломан рече: «Брате пилат, не сойду азъ от осиловъ даром, вижу в коем месте смерть моя будет». И взошел на другой восход — осилъ серебреной — и вострубил ратным голосом, а труба златая говорит тако: «Поспешите мои милыя друзи, и не жалейте добрых коней. А царь Поръ стоит и сь царицею у моей у страшныя смерти, а вы, цари и уланы, и силныя князи, и крепкия воеводы поспешите ко мне скоро». И от Соломанова войска земля дрожит.

А сам Соломанъ идет на третей восход к золоту осилу, а у царя Пора просит ворона меду испити, и испивает царь Соломан ворона меду, и узрил ясных соколов и белых кречат, то ти своих силных воевод, вострубил ратным голосом, а труба златая говорит, что плачет: «Напущайте и секите и топчите, живота не давайте, милости не кажите, поворотите свирлу к земли». И царь Соломанъ в велицей радости идетъ к земле на третей исход с первые своея смерти. И его цари и уланы, и крепкие воеводы и все силное войско падают предъ царемъ Соломаном о сыру землю и держатъ царя Пора и с царицею во своих, полках. И царь Пор с царицею падаютъ на свои царские колени предъ царемъ Соломаном. И рече царь Соломан: «Царю Поре, царица глупая и неразумная погубитъ человека вскоре, велела на меня три осила поставить: осил шелъковой, а другой осил сребряной, а третей сверхъ техъ осиловъ златой. Перевил бы осил веревкою лыченою, лапотною и в том бы удавился, такова же смерть.

И царь Пор повесилъ главу свою буйную и не могъ видеть себя, да не пособить. И царь Соломан скоро велитъ с обеихъ головы снять вострым мечемъ и велит раздергнуть скоро, а Поровых людей, кои старыя и не могли битись, и велелъ с собою взять, а то всех прибили и присекли, злато же и сребро и многое имение велелъ к себе перевозити, и добрыхъ коней велелъ стадами выгонити, а Порово царьство попленил, Пора царя и с царицею погубил, предалъ злой смерти и оттого ему многие цари и князи подклонились подь его руку, слышачи ему премудрость, а царь Соломан сталъ в велицей славе и высокъ. И услышав то царь Давыдъ сына своего премудрость, царя Соломана, что онъ обладал многими землями и всякими ордами и власть над ними взял великую и велми рад бысть тому.

Конец. Аминь.

КОММЕНТАРИЙ