Том 17 (XVII век, литература раннего старообрядчества)

А что вы ... выпись из Псалтыри прислали, псалма 9: «Сиру ты буди помощник», и прочая, и толк-от Афанасиев правь[1586], а на Григорья това Амиритскаго[1587] солгал некто вор, именем ево безделицу утвержает, яко и Федор-отступник. Статное ли дело душю Божию дьяволам обладати? Смерть и телом не обладала, нежели душею. Сам Господь нас научает, рече: «Никтоже душю мою возмет от мене, но сам полагаю ю о себе; область[1588] имам положите ю и паки область имам прияти ю»[1589]. Да умирая, рече: «Отче, в руце твои предаю дух мой»[1590], — а не ко дьяволам во ад. Во ад со славою иде, возстав от гроба телом и душею, Божески. Все богословцы так научают: ад, рече, огорчися, человека зря обожена, — а не нагую душю. Писывал преже сего о том.

В книгах тех писмяных надобе разуметь. Иван Ексарх[1591] пишет: «Еретики, де, и Григория Нисскаго правила развратили, многия, их, де, и чести, не подобает». А и Климентовы книги, — помниш, в Кормъчей[1592] напечатано, не велено их чести, — развращены от еретик. Так то и тут, сицевой же Федор или никониян, жалеют ли оне книг тех? Что взбрело на ум, то и творят. Во Псалтырях тех толковых есть всячина, толковщиков тех много. Полно о том.

Какой то будет Бог, что душю свою от разбойников отнять не смог?

ПИСЬМО «ОТЦАМ СВЯТЫМ» И «ПРЕПОДОБНЫМ МАТКАМ» {38}

Благословите, отцы святии, благословите, преподобныя матки! Како пребываетете, и все ли по-здорову? Дерзнул, нагой грешник, из земли приити в недра ваша. Освятите мя молитвами своими, понеже пришлец есмь из сквернаго мира. Ну, творите же о мне молитву: «Благослови благословящая тя, Господи, и святи уповающая на тя», и прочая.

Спаси Бог, миленькие батюшки, очистники всего мира, и меня очистили, поганца. Ей, право, от грех осквернен есмь.

Ведаете ли, отцы и матки, есть ли любовь между вами? Скажите ми кратко: «Скажем ти, отче Аввакум, яко Богу: „Люблю брата, яко фусточку, себя же вменяю пред ним, яко онучку”». Оле, чюдо! Нашол достояния нашего образ — Христа, превечнаго Бога. Ей, добро так! Всяк бо возносяяйся да смирится, а смиряяйся вознесется[1593]. Смирение бо побеждает всяк грех, отцы святии, понеже Христос смирил себе, послушлив быв, даже до смерти, смерти же крестной; темъже и Бог его превознесе, и дарова ему имя, еже паче всякаго имени[1594].

Простите, батки, пошол я к маткам-старицам в кельи.

Благословите, преподобныя, небесных красот смотряющии! Како труждаетеся, со страстьми и похотьми бравшеся[1595],[1596] и молящеся о благосостоянии святых Божиих церквах, и о царе Феодоре, и иже с ним, пекущихся о исправлении православныя веры? Рцыти ми, по-здорову ли душа и телеса ваша о Христе Исусе? — «Здрав будь, отец Аввакум, со всеми православными християны! Мы ж живем, десницею Божиею покровени[1597], взирающе на начальника вере и совершителя Исуса[1598], ходяще в заповедех Божиих и оправданиях Господних беспорочно».

Слава Господу Богу! Веселитеся о Господе и радуйтеся, праведнии, хвалитеся все правии[1599] сердцем[1600]. Простите и молите о мне Бога.

Мир вам всем и благословение со гражданы. Повидался с вами.

ПИСЬМО СТАРИЦЕ КАПТЕЛИНЕ {39}

Старица Каптелина Мелентьевна, Гликерьина дочь! Не ты ли со отцем и с материю жила во дворе[1601] моем, девушка? Помниш, я у вас бывал, возлюбих бо тя паче всех ваших домашних красот? Мать твоя меня подчивает, а ты, утенька маленькая в те поры была, поглядела на меня, да воздухнула. Ну, вздыхай же и ныне о мне, да и всем матушкам тем обо мне бей челом: я твой, ты моя.

Миленкая моя чернушечька, как тя назову? Виноград едемский именую тя и Ноев славный ковчег, рай словесный, крин[1602] краснопеснивый, голубица нескверная, ластовица[1603] сладкоглаголивая[1604]! А как ты подвизаесься на борителя врага и душеядца дьявола?

Каптелина, а Каптелина! Люби бесчестие, люби укорение, досаду, понос[1605] и уничижение, люби худость ризную, пищу тонкую[1606], неумовение, труды и молитву беспрестанную.

Каптелина, а Каптелина! Егда тя обыдут внутреннии «скимни[1607] рыкающе восхитити, и испросити у Бога пищу себе»[1608], еже есть бесове и лукавии помыслы, в то время стани крепце лицем душевным пред Господа и воззови: «Боже! За молитв святых отец наших, помилуй мя и горемыки ради, отца моего, радосте моя, избави мя ото обышедших мя». Да лбом о землю: «Заступнице християном, Мати Царя вышних сил, заступи мя и избави от сети чюжаго». Да паки лбом о землю.

Я все так-то деруся с разбойниками теми. Да на левую ту страну и плюну, рекше: «Отступи, неприязнь, и иди тамо, идеже человек не живет, но токмо един Бог призирает. А есмь раб грешный Исуса Христа, распятаго за нас, обещахся язвы его носити на себе, а не блудить»[1609]. Да милость Божия бывает, Каптелина. Дьяволи те во мне и уснут домашние, сиречь мысли те поганые.