Том 17 (XVII век, литература раннего старообрядчества)

И абие[3037]приидох яко к некоим вратом темным — тамо мрачно. И рече ми вож мой: „Вниди”. И я постоях мало, и внидох, и ‘‘чюх грешным плоти моея состав, яко еси отерпоша, и не [мо]гох двигнути ю мног час[3038]яко стонати ми. И посем с трудом двигнух ю, и проглаголах матери своей, и вжегох свещу, и помолшемася нама за церковную службу, и вся сказа матери своей и сестре, яже видех. Богу нашему слава ныне и присно и во веки веком. Аминь».

ЖИТИЕ ПАИСИЯ ГАЛИЦКОГО {72}

СКАЗАНИЕ ВЪКРАТЦЕ О ПРЕПОДОБНОМ ОТЦЕ НАШЕМ АРХИМАНДРИТЕ ПАИСИИ, ГАЛИЧЕСКОМ ЧУДОТЪВОРЦЕ, И О ОБИТЕЛИ ЕГО, В НЕЙЖЕ ОН БЕ АРХИМАНДРИТОМ, И О ОБРАЗЕ ПРЕСВЯТЫЯ БОГОРОДИЦЫ, ИЖЕ ПРИНЕСОША ДВА АНГЕЛА, И ЧЕСО РАДИ ОБРАЗ ТОЙ И ОБИТЕЛЬ ПРОЗВАСЯ ОВИНОВСКАЯ

Сей преподобный отец наш Паисий бяше перъвее игумен, потом архимандрит[3039] во граде Галиче, во обители Божия Матере, честнаго и славнаго ея Успения[3040], во времена благовернаго и христолюбиваго великого князя Василия Васильевича Московскаго[3041] и всеа Руссии, внуке, великаго князя Димитрия Ивановича Московскаго[3042], иже преславну победу над нечестивым Мамаем за рекою Доном показавшаго, и при великом князе галическом Димитрие Георъгиевиче[3043], внуке жь великого князя Димитрия Ивановича, и при сыне великого князя Василия Васильевича Московскаго, при великом князе Иоанне Васильевиче[3044]. От каковых же родителей сей преподобный родися, от велмож или от поселян, и во благочестии ли цветущих, или неверием одержимых (бяше бо в то время еще много неверных), кий же град или страна воспита его, и како прият аньгелский образ, — о сем мы писания не обретохом. Сие же вемы, яко отечество его есть на небесех: аще бо плотию и на земли живите, но духом гоняше небесная[3045] и небеснаго Иерусалима житель, согражданин ангелским ликом быти сподобися. О плотском же его рождении и воспитании и о родителех его аще нами и неведомо суть, обаче несть сие укоризна преподобному. Мы же убо елико обретохом в древних галических летописцех[3046] о сем преподобнем отце нашем Паисие и о обители его написано, сие и вашей любви предложити не обленимся. Точию о сем смиренно молим, да не отягчатся слухи ваша продолжением беседы сея, и да не зазрит сердце ваше худоумию нашему, аще что обрящете погрешено, вы убо, о, христолюбцы, съвоим благоразумием оно погрешение исправляйте, на мя же, окаяннаго, да не изрекут уста ваша слова клятвеннаго, ведяше, яко не ангел писа сие, но человек бренный и всяким мира сего страсьтем подлежащий, вместо же клятвы даруйте мне, грешнику, благословение. И в погрешениих, аще что обрящете, сподобите мя прощению, понеже и сами вси вы, о, христолюбцы, требуете от Спаса Христа благословения и прощения. Прочитающим же убо и послушающим сея повести да будет в ползу и во спасение, благодать же Божия, и мир, и милость да водворяется в сердцах ваших отъныне и до века, такожде и молитвы преподобънаго отца нашего Паисия да будут вам во благо поспешны. То уже время начата ми повесть, о нейже исперва предложих вашей любви слово.

Во времена благовернаго и христолюбиваго государя великого князя Димитрия Ивановича Московскаго и всеа Руссии бысть Московскаго государстъва во граде Галиче болярин некий, именем Иоан, зовомый Овин[3047], жилище имея близ града Галича. Близ же двора его бе манастырь, в немже живяху игумен со братиею особно[3048]. Церковь же бе в том манастыре во имя великаго святителя и чудотворца Николая Мирликийскаго, ветха зело. Вышепомянутый же болярин Иоан восхоте поставити новую церковь вместо ветхие, во имя Николая жь чудотворца. И во время летнее призва древоделей и повеле им уготовати место, на немже хотяше церковь создати. В день же неделный[3049], в онъже церковь святая обыче праздновати Воскресению Христа Бога нашего, вышепомяненный же Иоан, мню, яко от Бога извещен быв о хотящем последовати чудесы, внезапу восътав, изыде из дому своего един и идяше к манастырю тому, идеже хотяше церковь воздвигнути, да соглядает место, на немже быта церкви.