Том 17 (XVII век, литература раннего старообрядчества)

По некоем же времяни предиреченный Димитрий в болезнь велию впаде. То слышавше, князь Димитрий Георгиевич Галичесъкий и игумен Паисея вышереченныя обители Овиновския приидоша посетити онаго Димитрия Ярцова. Игумен же преподобный Паисий, видев онаго Димитрия Ярцова, вскоре хотяща от жития сего отъити, провиде бо Духом Святым, рече к Димитриеви: «О, чадо мое духовное Димитрие! Вижду аз, яко болезнь твоя тяжка зело, и мню, яко вскоре позван будеши пред лице нелицемернаго Судии Владыки нашего Бога. Точию сего не вем, в кий час смерть посътигнет тя, утаил бо есть сия от нас Владыка наш и Бог, час же смертный, яко тать, приходит, не предсылает вестника пред собою. И сего ради единочадый Сын, Слово Отчее, Господь наш Иисус Христос в присудствии своем на земли заповеда нам, глаголя: „Бдите, яко не весте дне, ни часа, в онь же Сын Человеческий приидет”[3099]. Свидетелствуют о сей Господни заповеди вси евангелисты, ныне же по оной заповеди и аз тебе, духовному своему сыну, советую, донележе не затворишася твоя уста, ни связася твой язык, исповеждь Богу вся грехи своя и не остави ничтоже неисповедано. Потом заповеждь о доме своем и о всем имении своем и стяжании, понеже чад, наследников имения твоего, не имееши, а брат твой Евъстафий, умом несоверъшен и зело препрост, не может быти наследник имения твоего. Рцы же ми и сие, кому поручавши по смерти своей чудотворный образ и обитель Пресвятыя Богородицы, строение деда своего болярина Иоанна».

Он же, из глубины сердца воздохнув и слезы от очию своею изъпустив, рече к нему: «Благодарствую тя, отче святый, яко попечение имееши о душе моей и желавши, дабы в душевном моем хранилищи скверная не осталося ничтоже, еже бы, тебе пред Богом не исповедав, оставих. Обаче несть, отче святый, в душевном моем хранилищи ничтоже сокровенно, о немже бы не явих тебе, свидетелствующу о всем Богу, и яже согреших на убогую мою душу, живущи на земли, вся ти исповедах. А о немже мя, отче святый, вопросили еси, се заповедаю: и дом Пречистыя Богородицы, и чудотворный ея образ, и всю мою вотчину, и дом, и имение поручаю самой Пречистой Богородице и тебе, отцу моему духовному преподобному Паисию. Точию молю тя, отче святый, да будет во святей обители твоим тщанием устроено общее житие»[3100]. Таже[3101] пригласив князя Димитрия Георъгиевича и рече ему: «Благоверный княже! Се аз отхожу от жития сего воздати слово пред нелицемерным Судиею о всех, яже живущи в мире сем содеях. Имею в вотчине моей обитель Пресвятыя Богородицы, юже поручаю со всею моею вотчиною самой Пресвятей Богородице и отцу моему духовному преподобному игумену Паисию. Тебе же молю о сем, да будет дом, и чудотворный образ Пресвятыя Богородицы, и обитель, и вся моя вотчина, юже во ону обитель отъдах, твоею державою сохраняемо всегда, никимже обладана и наветуема да не будет».

И по си умре оный Димитрий Ярцов. По смерти же Димитриеве вотчиною начата владети обители Пресвятыя Богородицы Овиновския игумен преподобный Паисий з братиею. По прошению же Димитрия Ярцова преподобный Паисей устрои во обители своей объщее житие, имея себе помощника князя Димитрия Георгиевича. И от того времени благодатиею Божиею, и милостию Пресвятыя Богородицы, и молитвами преподобнаго Паисия во обители оной общее житие непременно пребывает даже и до сего дне.

О написании с чудотворнаго образа новыя иконы Пресвятыя Богородицы, и о украшении ея, и о хождении преподобнаго Паисия с тою новописанною иконою к Москве