Том 17 (XVII век, литература раннего старообрядчества)

Благоверный убо князь Димитрий Георъгиевич Галический, якоже выше рехом, велию веру имея ко Пресвятей Богородице и часто во обитель ея к чудотворному образу прихождаше. По времени же некоем князь Димитрий Георгиевич повеле написати со оныя чудотворныя иконы новую икону, мнее[3102] старый, и обложити сребром зело хитро, и позлатити златом, и приложи венец злат з драгим камением. В сребре же оном, что в пожаре венцы и гривны слияшася, повеле сковати киот сребрян и постави в нем той новонаписанный Пресвятыя Богородицы образ. Помысли же князь Димитрий Георгиевич из оставшаго сребра устроити вторый киот оной чудотворной иконе, зовомой Овиновской, юже Иоан Овин от рук ангелских прият. Обаче не благоволит Бог сего во исполнение привести, понеже благоволи Бог пресещи живот его. Егда убо князь Димитрий Георъгиевич в болезнь впаде и начат изнемогати, тогда прииде к нему от обители Пресвятыя Богородицы игумен преподобный Паисий з братиею и рекоша к нему: «Видим тя, государь княже Димитрие, изнемогающа велми и отъходяща во он будущий век званием Бога Вседержителя. Сия убо болезнь вместо вестника прииде ти. Рцы же нам, благородный княже, кому убо поручаеши дом Пречистыя Богородицы, и чудотворный ея образ, и строения своего новую икону Пресвятыя Богородицы, что в сребряном киоте?» Князь же Димитрий Георъгиевич воздохнув вельми из глубины сердцы своего и рече: «Дом Пречистыя Богородицы, и чудотворный ея образ, и строения съвоего новописанную икону, что в сребряном киоте, приказываю государю великому князю Василию Васильевичу Московскому и всеа Русии и тебе, преподобному отцу игумену Паисию з братиею. Егда же благоволит Бог мне от жития сего отъити, молю тя, отче святый, да будет тело мое положено близь гроба отца моего». И тако завещав, преставися. И по завещанию его везоша тело его к Москве, и погребено бысть в церкви архангела Михаила подле гроба отца его князя Георъгия Димитриевича.

По преставлении же князя Димитрия Георъгиевича под градом Галичем бысть бой великому князю Василию Васильевичу Московскому и всеа Руссии и сыну его великому князю Ивану Васильевичу с князем Димитрием Шемякою. И поможе Бог великим князем Московским, а князь Димитрий Шемяка утече в Великий Новъград. Тамо и преставися в Юрьеве монастыре[3103].

После бою же галичского обители Пресвятые Богородицы Овиновския игумен преподобный Паисий новонаписанную икону строения князя Димитрия Георъгиевича, что в сребреном киоте, возил к Москве[3104], к великому князю Василию Васильевичу и к сыну его к великому князю Ивану Васильевичу Московским и всеа Русии. Егда же благоверныя великия князи о пришествии преподобнаго Паисия услышавше, яко со образом Божия Матере близ грядет к царствующему граду Москве, тогда многия радости наполнишася. Вскоре убо великий князь послав к митрополиту, повелевая ему изыти на сретение честнаго образа со всем освященным собором со кресты и с иконы, якоже лепо. Митрополит же по повелению великаго князя вскоре повеле звон учинити и всему освященному собору собратися во святую соборную апосталскую церковь.

Егъда же освященный собор и весь причет церковный в соборную церковь собрашася, тогда преосвященный митрополит со всем освященным собором изыдоша во сретение честнаго образа и преподобнаго Паисия, носяще с собою честныя кресты и святыя иконы, со свещами и с фимиамом, имже последствуя благоверный великий князь Василий Васильевич и с сыном своим великим князем Иоанном Васильевичем и со всем своим государским сигклитом и со всем московским народом всякаго чина и возъраста.

Егда же приближишася на сретение того пречюднаго образа, тогда преосвященный митрополит и благоверный великий князь Василий Васильевич со всяким благоговением приступиша ко оному пречудному образу, и, падше, поклонишася, и любезно лобызающе его. Святитель убо благодарствие от уст своих возсылаше, яко сподобися видети тыковый пречудный образ Божия Матере. Князь же великий прощения прося о согрешении своем, яко напред того дерзновенно сотвори и насилованием образ Божия Матере, а не с молением, взя. И бе видети тогда позор[3105], умиления достойный, како иже многими народы и странами обладаяй, яко един от убогих, со умилением припадая просити оставления, иже первее насилованием (или, просто рещи, пленением) самый чудотворный образ похити и, яко пленницу, хотяше удержати, ныне со многим благоговением и смирением, яко изстинный раб, ко прописанному образу припадая, молится, дабы благоизволила Царица Небесная с пришествием честнаго своего образа и сама внити во град и бълагословити царство его. Таже и к преподобъному Паисию приступив и главу свою к десънице преподобнаго преклонив: «Благослови, — рече, — отче святый, благослови».