Том 17 (XVII век, литература раннего старообрядчества)

ОБРЕТЕНИЕ И ПЕРЕНЕСЕНИЕ ЧЕСТНЫХ МОЩЕЙ НОЯВЛЕННЫЯ ВЕЛИКИЯ КНЯГИНИ-ИНОКИ АННЫ, ИЖЕ БЕ ВО ГРАДЕ КАШИНЕ ЯВЛЬШЕЙСЯ, ВКУПЕ ЖЕ ОТ МАЛЕЙШИЯ ЧАСТИ И ПОХВАЛА СВЯТЕЙ. {77} БЛАГОСЛОВИ, ОТЧЕ

Несть убо лепо светилнику под спудом стояти, но на свечнице, яко да светит всем, иже во храмине суть[3427]. И не токмо иже во храмине, но и паче же, вне изнесен, явлен будет всем зрящим, ту предстоящими. И паки не подобает о нечестивых житиях воспоминати, о благочестивых же и богоугождьших молчати, но достоит писанию предавати и паки всем человеком изъявляти, да не потаенна будут дела Божии[3428]. Тако же и о сей святой угоднице Господни новоявленней чюдотворице благоверной великой княгине-иноке Анне не достоит молчанием утеснитися или леностью отягчитися и в презрение положите таковое велие дарование Господне, но тако же паки довлеет писанию предати и памяти вдати, да не забвена же будет от человек таковая благодать Господня.

И начнем же сице.

Сия убо блаженная великая княгиня-инока Анна родися от благочестиву и велику родителю, глаголют же, яко от великих князей тверских произыти ей[3429]. Рождьшаго ея и рождьшия, и супруга, и самыя мирскаго звания не вемы[3430], утаи бо ся и замедле от многих лет, и писания сему не обретеся, но токмо снайдеся иноческое имя ея, яко великая княгиня-инока Анна[3431]. И живши ей неколико лет, и восхоте взяти на ся ярем Христов и последовати ему, и облечеся во иноческое одеяние. И не вемы же, в коей обители сущи и в коем граде[3432], токмо рещи, работая Христу день и нощ, и труды к трудом, и подвиги к подвигом прилагающи. Якоже чюдеса ея и мощи являют, яко мнози от мощей ея исцелевахуся, яже впред о сем да скажется, ныне же радуемся. И не по колицех же летех по Божию изволению ко Господу отъиде в кровы небесныя[3433]. И не по которому прилучаю[3434] трудолюбное тело ея положено бысть во граде Кашине под церковию древяною ветхою во имя Пресвятыя владычицы нашея Богородицы и Приснодевы Марии, честнаго и славнаго ея Успения, от соборныя и апостольския церкви Воскресения Христова разстоянием якобы вержением каменя или мнея[3435]. И много убо лет честное тело ея землею покровено было, и потом не восхоте Господь угодницы своея весма телу ея в земному боку[3436] быти, но явити благодать свою в Рустей земли нашей, и всем человеком на дивное видение и слышание. И в лета убо осмеричныя сея тысящи вторыя сторицы патьдесятыцы же с седмерицею грядущи[3437] временнаго века сего, и в царьство царя и государя и великаго князя Алексея Михайловича, всеа Русии самодержца и иных земель обладателя и государя, в четверичное[3438] лето благочестивый державы царьства его[3439], и при отце[3440] его и богомолце кир Иосифе, патриархе Московском и всеа Русии, во осмеричное[3441] лето патриаршества его[3442], яви Господь сицевую благодать свою: великия княгини-иноки Анны мощи ея целы и нетленны обретошася, токмо малы части взяты Быша землею, свойствено убо есть земли еже своя взимати. Прочая же уды[3443] ея, яко бисерие драгое, в земли пребыша целы и нетленны, и не токмо же едини мощи не истлеша, но и одеяние иноческое, в няже[3444] оболчена и положена бысть, цело же и не истле, всем зримо и видимо, и совершенное покрытие грехов всем человеком, еже есть схима, цела же и неразрушима. Еще же рещи чюдо дивно и преславно: яко у живы сущи, десница[3445] ея преподобный стоить прямо во гробе, опершися лактем во дно гроба. Левица[3446] же по обычаю пребывает на персех[3447]. И сия убо показа Господь на похвалу самодержцу царю, зде же реку, тезоименну пособителну[3448], и всему его росийскому государьству, и паки всей земли Рустей, и на обогащение и на просвещение граду Кашину, и на исцеления всем болящим и всем же, к ним с верою приходящим и исцеление приемлющим, иже одержими бываху различными болезньми.