Том 17 (XVII век, литература раннего старообрядчества)

Глаголют же нецыи, живуыщии человецы во граде Кашине, и еще инии, ни весма в далекости жителства имеющий от Кашина града, якоже честная обитель преподобнаго отца нашего Макария Калязиньскаго чюдотворца[3449], того маностыря сказують мниси, яко не абие[3450] гроб святыя из земли изыде, но косно[3451] и медленно идяше и человеком видим бываше, яко сокровище драго, казашеся, но из давных убо лет от земную боку вполы бе[3452]. Господу Богу тако изволившу, прославляя свою угодницу, яко да, зряще, человецы дивляся его величию Божию и славе, како святых своих прославляет, и человеком являет, и всех своим чюдотворением удивляет. Яко убо бездушная вещь гроб и, яко одушевлен, сам двизашеся, невидимо человеки, но токмо ему, Творцу нашему и Богу, сведущу, и действующу, и выспрь из земли, яко с бисерием драгим, с преподобныя мощми грядяше. И бысть паки чюдо зримо же и видимо многим в настоящий же сия лета, грядущия ко сторице и к пятдесятице с седмерицею, паче же в самом том сторичном и пятдесятеричном и седмеричном лете[3453], под вышереченное оною церквию Пречистыя Богородицы, честнаго и славнаго ея Успения, тот гроб святыя совершенно весь из земли изыде и верху земли явися. И приходящим к нему с верою многая исцеления начашася болящим быти. В лепоту убо, яко ковчег злат со многоценным камением обретеся некоему и обогати недостаточный[3454] дом его, тако же и сея преподобныя матери иноки Анны честный гроб, из земли изшед с нетленными и праведными мощми ея, обогати ими небогатый град Кашин и одари и́[3455] чюдесным исцелением блаженыя.

И слышано бысть у царя и самодержца сицевая благодать Господня, яко во дни царства его яви Господь таковое велие свое дарование, и яко мнози болящии исцеления прияша в настоящия оны дни, в ниже святыя мощи из земли изыдоша. И священницы, и дияконы, инии мирстии человецы чюдеса блаженыя написаху[3456], и у многих гражьдан Кашина града писанию предано бысть, якоже кождо у кого исцелен бе, сын у отца, или отец у сына, или дщерь у матери, или мати у дщери, или брат у сестры, или сестра у брата, и прочыя ужики[3457] от мощей святыя, и вси объявлени Быша писанием.

И посла царь и патриарх свидетелствовати от архиерейска чина преосвященнаго архиепископа Тверьскаго, емуже звание Иона[3458], и с ним архимаритов и игуменов, да свидетелствуют о мощех и чюдесех преподобныя, да не лош явится ему, самодержцу царю, и великому ерарху, и всем, слышащим чюдеса святыя. Архиепископ же и сущии с ним свидетсвоваху верне и неизменне, яко тако и бысть, якоже сказаху и написаху живущии во граде Кашине и прочии они, и послаша к царю и к патриарху епистолии. И абие прииде к ним писание. Они же повелеста пред собою чести, царь убо пред своим величеством, патриарх же пред своим святителством, и слышаста, яко добре есть, и уверистася обоя, и воспрослависта Бога о велицей его милости и благодати.