Том 17 (XVII век, литература раннего старообрядчества)

Таже по неколицех летех сыну ея благоверному князю Констянтину отшедшу ко Господу, тогда приходит во Тверь вторый сын ея из града Кашина, благоверный князь Василий Михайловичь и молит матерь свою, преподобную и благочестивую и великую княгиню Анну, яко да приидет от Твери града в господствующий его град Кашин[3563] и яко да посети отечество свое, яко да он тамо выну зрит святое и аггелоподобное лице ея и сладкаго зрения присно наслаждатися. И сице моляше ея: «Елма убо, о, мати моя, преподобная и благоверная великая княгиня Анно! Сице Богу изволившу судбами своими, яко скончавшуся брату моему, твоим пресладким учением присно наставляем, аще бяше тогда скорбно и неутешно, яко лишен тогда сладкаго твоего учения, не восхотех оскорбити брата моего и тебе молити, дабы пришла жити во град мой Кашин. Ныне же не могу терпети, еже быти ми от тебе в далнем разстоянии и еже не насыщатися твоего божественнаго учения. И что живот мой и слава моя, и княжение мое, еже быти ми лишену твоего аггелоподобнаго зрения?» Преподобная же мати его отвеща к нему и рече: «Чадо мое возлюбленное, страшно наше иноческое житие и ложно, некако ко Христу обещание, еже до последняго моего издыхания на единем месте, на немъже обещахомся, терпети всяку скорбь Христа ради, аще не времени коему позываищу, или гонения ради, или частых наносимых ради скорбей бывающих, Христа ради понесшим тяготу и вар дневный, но и сие подобает преобидети любве ради Божия. Или паки смотрения ради некоего подобает бегати в другое место, по Христову словеси: „Аще гонят вы из града, бегайте в другий град”[3564]. Ныне же, помощию всесилнаго Бога, несть во граде сем ни гонения, ни иных скорбей находящих, якоже в прежнее время было при отце твоем великом князе Михаиле Ярославиче от поганых нашествия и своих сродников крамолы и зависти. И аще оставлю град сей и в тот град преселився, буду подобна ищущими славы мира сего. Рече бо Сын Божий: „Никтоже, возложь руку свою на рало[3565] и зря вспять, управлен будет в Царство Небесное”[3566]. Ибо и Авраам, праотец наш, повелен бы был от Бога оставити отечество свое и преселитися в чуждую землю, аще не бы возбранило ему отеческое идолобесие от Божия любве и познания[3567]. И аз како могу оставити град сей, в немъже дарова всещедрый Бог страстотерпца своего и моего князя Михаила, егоже в заступление и помощи имеет и к Богу ходатая весь град сей, и аз имею пред очима моима пресвятое и страстотерпческое тело его и, зря на нь, усердно теку в добром сем подвиге, егоже молитвами, аки некими крилы, вперився умом к Богу. Ни, чадо мое, престани понуждати мя преселитися во град свой Кашин, и прочее не стужай[3568] ми». Они же со слезами моляше блаженную и не хотяше восклонитися от святыя ноги ея. Паки рече к ней: «Веси, мати моя преподобная, яко от младых лет твоей любви привязан и тобою паче братий прочих моих любим бе, и никогдаже повелений твоих преслушахся, и никогдаже хотел отлучитися твоего сопребывания. Но Божиих судеб несть кому возможно постигнути. Зане[3569] по жребию и по благословению святаго отца моего и твоими достася мне в наследие град той, и есть ми любезен ради покорения и послушания боляр моих и велмож и всего народа. Аще бы хотели оставити град той и преселитися семо по смерти брата моего и твоего выну слышати медоточнаго языка и учения, и зрения ангеловиднаго насыщатися, но никакоже оставят мя велможи мои и весь град, ради любве моея еже к ним, оттоле к ним бе преселитися. Сего ради, по совету боляр моих и велможь и всего града, приидох молити тя. Весь бо град желает видети ангелоподобный твой зрак и в себе имети, и сице глаголет, яко „да посетит преподобная и благоверная княгиня Анна отечество свое и да в нем пребывает”. „Того бо града, — рекоша, — таковая благочестивая и святая отрасль израсте от благородну родителю, и есть нами печаль не мала належит, яко лишихомся пресладкаго учения. Иди, благоверный княже, во град Тферь и моли преподобную матерь свою, яко да преселится во град Кашин своего отечества, яко да будет граду нашему Кашину и всей области его вечная похвала тоя пришествием. Граду же Тфери дарова Бог молитвенника тепла и заступника скора, страстотерпца своего, отца твоего, благовернаго великаго князя Михаила Ярославина, нашему же граду всяко дарует всещедрый Бог преподобную матерь твою благоверную и великую княгиню Анну в помощь и заступление во вся роды до века. Токмо потщися усердно доити во град Тферь, умолити матерь свою, и Бог благий исполнит желание сердца твоего”. Сего ради, о, мати святая и блаженная моя, да не оставиши мя тща, ради своего еже к нам преселения, да не презриши моления всего народа, паче же мене возлюбленнаго сына своего, да не печалию снеден буду, еже лишену быти мне твоего медоточнаго языка; лучши есть зде умрети, нежели возвратитися тщу во свой град». Таковыя глаголы благоверный князь Василий ко преподобней матери своей со многими слезами изрече и в себе Бога моляше, яко да получит желание сердца своего. Блаженная же и преподобная княгиня Анна таковое моление от сына своего слышаше и веру его видевше, не без Божия промысла, разсуди, сему быти, но яко от Бога послан бысть к ней, преклоняется на моление и обещевается преселитися во свое отечество и тамо пребыти до дне исхода своего еже к Богу. И сице рече к нему: «Буди, сын мой возлюбленный, по твоему повелению, и якоже Господу угодно, тако и будет». Благоверный же князь, сын ея, слышав таковая глаголы, радости многия наполняшеся и всесилнаго Бога прославляше, яко не презре моление. Тогда преподобная и великая княгиня созва к себе постницы, еже в монастыре том, и поведает им свое еже от них отшествие. Они же, яко услышавше от преподобныя сицевыя глаголы, слез исполнившеся, глаголаше к ней: «Камо[3570] грядеши, госпоже наша? И чесо ради разлучение твое от нас хощет быти? Еда в чем прогневах тя, или неправдовах[3571] пред тобою, или скорбь кую наведох твоему непобедимому и терпеливому смиренномудрию? Еда гражане гонят тя от нашего пребывания? Повеждь нам, преподобная мати, вину[3572] отшествия своего». Она же: «Не плачите, рече, сестры мои, видите, яко сын мой прииде из Кашина града, благоверный князь Василий, и той понуждает мя и молит со многими слезами еже преселитися отсюду во свой ему град. Аз же много отрицахся, дабы не отлучитися от вашего постническаго пребывания. Он же не престанно моля мя, дабы поити ми в Кашин град. Аз же разсудила в себе: не без Божия промысла сему быти, но яко от Бога послан прииде ко мне и моля мое смирение, дабы преселитися отсюду, и Богу хотящу, и молитвам вашим поспешествующим мне во благое, хощу итти во град к сыну моему, благоверному князю Василию. Вы же, сестры мои, оставайтеся зде с Богом и в молитвах своих поминайте мое смирение». Они же реша к ней: «Аще, госпоже наша, отходиши от нас, на кого воззрим и кто нам путь смирения и безмолвия покажет? Кто же ли нам без тебе учение прострет, да яко возможем ловления дияволя преити?» Блаженная же рече к ним: «Бог благий благодатию своею да сохранит вас от многоплетенных сетей вражиих. Токмо молю вас, яко да имеете попечение о душах ваших и красоту девства вашего храните без всякаго вреда и свещу вашего течения добраго соблюдите неугасиму, дондеже приидет жених, Христос, Бог наш. И аще обрящет ны в перве нашем воздержании и добром течении иноческаго жития, тогда введет ны на брак своего Небеснаго Царствия со всеми святыми. Аще ли не таковых нас обрящет, всяко и нам возглаголет, яко и буим девам: „Отъидите от мене, яко не вем вас”[3573]. И тогда плакати имамы во веки веков, яко погубихом труд чернечества нашего. Но подобает нам со всяким смиренномудрием и кротостию духа молити человеколюбиваго Бога, Господа нашего Иисуса Христа, дабы сподобил нас с мудрыми девами небеснаго своего чертога наследницам быти и дабы доброе течение соблюл по своей ему благости цело и непорочно, яко тому подобает всякая слава вовеки. Аминь». Они же слышавше учение ея, вельми дивляхуся безмерному смирению и реша к ней: «О, госпоже наша, преподобная мати! Кто убо виде твое безмерное смирение и любовь, послушание же и терпение, кротость и незлобие, и милосердие ко всем, успех своему житию не приимаше и всемилостиваго Бога прославляше! Мы же, видевше твое постническое житие, пост и воздержание и непрестанную любовь, яже к Богу, зело успех своему житию приимахом. Ныне же отходиши от нас, како не сетование нам будет твое разлучение, и како нам не плакать: еже дарова Бог, и сего лишаемся. Молим тя, госпоже, не оставляй нас, сирых, но пребуди с нами». И сицевыми словесы хотяще удержати неудержимую, мняще, яко послушает тех, паки пребудет с ними. Но блаженная и преподобная мати утешаше их сладкими учении и рече им: «Не скорбите, сестры мои и госпожи, аще и отхожду от вас, но и тамо вы со мною есте, и аз с вами буду духом. И аще всеблагий Бог союзом духовныя любви совокупил нас, кое тех разлучение или разстояние приимем?» И мир дав им, и лобза коюждо[3574] святым целованием, и отходит в соборную церковь, и тамо на мног час Богу моляшеся покрыти ю́ своим человеколюбием, идеже аще изволил ей быти[3575]. Паки же припадает со многими слезами ко гробу супруга своего, страстотерпца Христова, благовернаго и великаго князя Михаила, яко да и тамо помогает ей молитвами своими. «Понеже, — рече, — велика стяжах тебе к Богу ходатая и молитвеника». И сице помолившеся и приимши благословение от епископа, пути касается, всем людем плачущимся о отшествии преподобныя, яко мнети им тогда и глаголати, яко «прогневася на нас Бог тоя ради отшествия и, аще не бы согрешихом пред Богом, не бы попустил когда отъити преподобней от града нашего». Благоверный же князь Василий многу милостыню подав сущим тамо постницам, и пищею удоволив, и все убогим, яже во граде, многу милостыню подав и благословение приим от епископа, отходит во свой град, поим с собою и матерь свою, преподобную и благочестивую великую княгиню Анну, велми прославляше в сердце своем всемилостиваго Бога и Пречистую Богородицу, яко получил желание своего благохотения.