Том 17 (XVII век, литература раннего старообрядчества)

Сын же ея, благоверный и великий князь Василий, такожде и той житие свое благочестно и мирно препроводил, и мирно к Богу отъиде того же лета, месяца июния в 24 день[3597]. Бе бо смиренномудрен, и кроток, и милостив до конца, и во всем ревноваше житию родителем своим. О всем мире моляся и ходатайствует о отечествии своем.

Сия тебе моих словес плетения, о, преподобная мати и богоблаженная великая княгиня Анна, приписую, и аще точию твоему равноаггелному иже во плоти житию буди благотворение Богу, того бо есть дар и от его велелепнаго Божества славы его вся сия приносим, якоже и оная вдовица убогая, иже лепту принесе Богу в дар и свидетелствованна бывших паче множества принесших[3598]. Аще ли что и еще недостаточно явися твоему богоугодному пребыванию, обаче по силе принесохом тебе, елико подаде благодать Святаго Духа. Кто бо может по достоинству изрещи ваше иже во плоти аггелское пребывание, иже многия труды и поты, лощение и воздержание, и слезы непрестанныя, смирение же и кротость, и любов нелицемерную, еже и сами аггели удивишася невещественному вашему житию! Ты же молися, преподобная и богоблаженная великая княгиня Анно, о мне, недостойном, ко Христу Богу, и достойна мя сотвори небесныя породы наследника быти и избавитися вечнаго осуждения, и твоими молитвами в настоящем сем житии сохранену быти от многоплетенных коварств вражиих благодатию и человеколюбием Господа нашего Иисуса Христа, с нимъже Отцу, купно и Пресвятому и Животворящему его Духу всякая слава и держава, от всея твари честь и поклонение, ныне и присно и вовеки веков.

Чудо о явлении преподобный матере нашея благоверныя великия княгини-инокини Анны, како явися пономарю Герасиму [3599]

Прешедшим убо многим летом по успении блаженныя и великия княгини Анны, яко двесте и четыредесять и три лета[3600], в неже время всещедрый Бог благодатию своею явил нам источник неизчерпаемый — гроб знаменоносныя матере и великия княгини Анны. И по явлении том неведом бе и небрегом гроб ея, зане сущу времени тогда в Росийском государстве нестройну бывшу от нашествия богомерских латынския ереси восприемников, литовских людей, якоже летописныя книги повествуют.

Царствующу бо тогда в Московском государстве и скиптр Российскаго царства правящу царю Василию[3601], тогда убо окрест Московскаго царства безчисленное воинство бяше литовских людей, на взятие царствующаго града готовляхуся, прочия же грады, окаянни, пленяюще и пожигающе и в запустение полагающе. И многие святые места, и честные монастыри разориша, и крови христианския, окаяннии, множество пролияше: от Москвы даже и Великаго Новагорада и окрест окиана-моря протече необузданное их воинство. Богу тако попущающу за грехи наша, яко да накажемся[3602] и человеколюбие его престанем гневати, яко да научимся пресвятыя заповеди его не преобидети, но всегда угодная пред ним навыкнем творити. Той бо сам глаголет пророком своим: «Аще мене послушаете, благая земли снесте; аще ли не послушаете, оружие вас пояст»[3603]. Якоже речено есть, яко злохищнии волцы, литовстии людие нещадно погубляюще овцы стада Христова, и несть кто возбраняя им или сопротивлялся, понеже царю Василию и самому тогда сущу в велицем утеснении, бывшу елико от литовскаго воинства, паче же от своих присных мятежи и нестроения бяху.

Приразишася[3604] окаяннии литовскаго воинства ратнии и ко граду Кашину не токмо единою, но и дважды и трижды, но ничтоже могоша успети или зла сотворити, Богу его соблюдающу ради молитв благоверныя княгини Анны. Людие же тогда во граде бяху ратнии и простии, видевше милость Божию, иже от нашествия латинския ереси восприемников невредим пребывает град, и разумевше, яко не от своея им силы соблюдается, обаче не ведаху, яко кто по них побарает[3605] и избавляет их от пленения сопротивных, понеже все грады плещи своя вдаша[3606] воюющим. Тогда убо премилостивый Бог восхоте показати рабу свою и явити людем своим целебный источник и сущую помощницу во граде, преподобную и благоверную великую княгиню Анну, сим образом.

По ошествии убо преподобныя к Богу пресвятое тело ея под соборною церковию Пресвятыя Богородицы лежаше, и многи лета прешедше той церкви в ветхость, якоже и помосту церковному обвалившуся до самыя земли и разрушшуся. Тогда гроб великия княгини Анны обретеся на верху земли. Людие же воинстии, иже во граде том учинены бяху на сохранение града, приходяще во храм Пресвятыя Богородицы помолитися и от неведения полагаху шапки свои на гроб блаженныя, инии же неразумнии и саждахуся, мняще быти гробу просту, и никакоже помышляху кого нетлению причастна быти в нем[3607]. Бог же сущую во граде заступницу восхоте абие показати людем своим, яко да не к тому преобидима бывает[3608] благодать его, юже дарова угодником своим, но да прочее яко светило сияет на подсвещнице.