Том 17 (XVII век, литература раннего старообрядчества)

И таковая в себе помышляху, любовию вперяющеся людии, еже бы дойти в царствующий град Москву и поведати государю царю и великому князю Алексию Михайловичу, всея России самодержцу, о таковых великих и многоразличных чудесех благоверныя и великия княгини-инокини Анны, дабы повелел государь таковому светилу из-под спуда на свещнице поставитися и церкви Божия Матере свою красоту восприяти[3620]. И сему бывшу, вскоре делу касаются, и царствующаго матере градов богоспасаемаго града Москвы достизают, и тамо государю царю и великому князю Алексию Михайловичу, всея России самодержцу, вкупе со святейшими Иосифом, патриархом Московским и всея России, таковый неисчерпаемый источник во своем граде, гроб благоверныя и великия княгини-инокини Анны, супруги благовернаго и великаго страстотерпца Христова Михаила Тверскаго, на верху земли поведают, вкупе же и многая и различная чудеса, бывающая от всечестнаго гроба молитвами преподобныя, яве извещают, яко от лица Божия Матере церкви благочестиваго царя моляще, сице глаголюще: «Даруй, царю благочестивый, мою красоту велелепную и утварь многоценную, и сокровище неистощимое, и светилник пресветлый, источник неизчерпаемый, сосуд, божественнаго мира полный, гроздь истинныя лозы — повели открытися гробу моея дщери возлюбленныя и яве быти мощем преподобныя всем приходящим. Доколе таковому небесному сокровищу под спудом лежати? Не могу бо сия надолзе зрети во гробе затворенну, понеже аки многим облаком, сокрывшим пресветлыя лучи божественнаго солнца, сице и моея дщери во гробе затворенныя мощи никим ведомы. И доколе в поношении есмь от всех ради таковаго презрения? Се бо и Жених мой небесный, иже предобручил мя себе невестою, Сын Божий единородный и соприсносущный Отцу и Святому Духу, иже сый сияние славы Отчи, вопиет во святем своем Еваггелии, яко „неподобно светилнику возженному под спудом быти, но на свещнице полагатися, яко да светит всем, иже во храмине суть”[3621]. Аще ли откровено будет таковое пресвятое селение и божественный сосуд, тогда буду от всех славима и ублажаема, восприимши в себе таковый источник, иже от многих лет сокровенный. Такова слава моя, таково украшение мое, таковою добротою и утварию украсив мя небесный Жених и твой Творец и Владыка. Кроме же таковыя утвари, еже есть мощей святых и образов подобия их написанных, лишенна бываю славы, яко горлица пустынная пребываю».

Сия слышав, благоверный и христолюбивый государь царь и великий князь Алексий Михайловичь, всея России самодержец, вкупе с богомолцом своим и отцем, святейшим Иосифом патриархом, радости многия наполнишася и благодарственныя песни всемилостивому Богу возсылающе, яко таковое сокровище своея благодати во дни благочестивыя державы его открыл есть. Таже вскоре посылает своя царская писания во град Тферь к сущему ту архиепископу Ионе[3622], повелевает ему немедленно доити во град Кашин и мощи благоверныя и великия княгини-инокини Анны со всяким благоговением открыти, и таковое небесное сокровище, источник приснотекущий, не к тому покрывати или в земли положити, яко да, видевше чада церковная и Христова стада словесныя овцы мощи богоблаженныя и великия княгини-инокини Анны, прославят Бога Отца и Единороднаго Сына его, Господа нашего Иисуса Христа, и Пресвятаго и Животворящаго его Духа.