Том 17 (XVII век, литература раннего старообрядчества)

В то время (о, дивна дела твоя, Господи!), яко в неже лета тма богомерских и треклятых литовских людей повсюду обнажашеся, и крови христианския проливахуся, и людие в велицей скорби и печали суще, и страхом сердца их сокрушахуся, тогда убо Господь наш Исус Христос изволи рабу свою явити. Является преподобная и богоблаженная и великая княгиня Анна, в велицем иночестем образе одеяна, пономарю тоя церкви Пресвятыя Богородицы, именем Герасиму, емуже тогда в велицей болезни бывшу и весма ко вратом смертным приближающуся и отнюдь не чаяху ему живу быти. И явлением своим исцеление ему подаде и здрава его сотвори. Таже поведает ему о себе, кто бе[3609]. Потом, поношая им о неразумии их, сице глаголет: «Почто, — рече, — гроб мой ни во чтоже вменяете, и мене презираете, и яко просту помышляете гробу быти? Не видете ли людей приходящих и на гроб мой шапки пометающих и садящихся, понеже от вас невозбраняемы бывают, и отнюдь небрегом бе от вас и преобидима, и несть разумевающаго в вас? И доколе тако быти ми от вас попираема ногами. Или не весте, яко аз молю всемилостиваго Бога и того рождшую Матерь Пречистую Богородицу, дабы не предан был град сей в руки врагов ваших, и от многих пакостей, находящих на вы, соблюдаю вас? Обаче ныне не мози, человече, ослушатися моих словес, да не горшая сих постраждеши. Пойди ко пресвитеру сея церкви и ко всему причту и повеждь им вся, реченная от мене, яко дабы отселе гроб мой честна имели и приходящим бы возбраняли садитися, и шапки класти не велели на него, и свещу бы есте возжгли на гробе моем пред нерукотворенным образом Господа нашего Иисуса Христа». Той же пономарь от видения в себе быв и скорому пременению еже от болезни здрава себе видев, велми дивляшеся и Бога прославляше, яко безчисленное богатство благости своея открыл есть и от врат смертных возведи, и великую княгиню Анну немолчными усты похваляше.

Таже нимало замедлив, бояся прещения[3610], но скоро приходит ко пресвитеру и с ним всему причту тоя церкви поведает вся реченная от преподобныя[3611], и яко здрава сотворила от недуга и отнюдь к смерти приближающася явлением своим от смертных врат возведе. Они же слышавше таковая и онаго ведяху всема болезненна бывша и неначаема[3612], видевше исцеление получивши, благодарственными песньми всесилнаго Бога и Пречистую Богородицу воспрославиша, яко неистощимое богатство и небесное сокровище и крепкую помощницу явил им, блаженную и великую княгиню Анну прославляюще, таже и всем людем поведаша. И оттоле вси людие града Кашина, яко стяжавше крепкую во граде побарательницу[3613], никтоже не имеяху скорби еже от нашествия безбожных и латинския ереси восприемников, скверных и преокаянных литовских людей, ведуще, и непобедимую во бранех помощницу, яко не оставит преподобная отечества своего в руки нечестивых предану быти. Таже по повелению преподобныя на гробе ея пред нерукотворенным образом Господа нашего Иисуса Христа свешу неугасимую возжгоша, и мнози приходяще с верою помолитися Пресвятой Богородице и гробу богоблаженныя честне, якоже подобает святым покланятися и почитати. И вси, иже многоразличными болезньми содержими, прикасахуся честному гробу ея и неоскудную благодать от преподобныя почерпающе, отхождаху в домы своя здравы, славяше и благодаряще Христа Бога нашего и того рождшую Матерь Пречистую Богородицу, и благодать велию исповедающе благоверныя и великия княгини Анны, яко молитвами ея здравы бываху. Но тогда аще и многим чюдесем, бывающими от гроба преподобныя, и мнозей благодати, изливающейся от живоприемнаго гроба, обаче в простоте ума своего, или тако Богу изволившу судбами своими, не попущающися таковый светилник, иже под спудом сокрытый, пресвятое и нетленное тело богоблаженныя и великия княгини Анны, на свещнице поставите[3614], сиречь яве быти мощем, дабы видим были таковый источник неисчерпаемый всеми приходящими. И Бог сие сотвори смотрения[3615] ради некоего, яко да покажет всем яве таковое неистощимое богатство, древния своея благости источники неисчерпаемыя во свое время, когда они весть судбами своими. И от того времени явлен бысть гроб преподобныя, тако почитаем бе и покланяемся честне и велелепне. Аминь.

Месяца июлия 21 день. Обретение честных мощей святыя преподобныя благоверныя и великия княгини-инокини Анны Кашинския чудотворицы