Том 17 (XVII век, литература раннего старообрядчества)

По истинно рещи, яко несть и человек, но гад есмь или свиния; якоже и она питается рожцы[982], тако и аз грехи. Рожцы бо вкус имущ в гортани сладость, во чреве же бреткость[983]. Тако и аз, яко юнейший блудный сын, заблудих от дому отца моего, пасяхся со свиниями[984], еже есть з бесы, питаюся грехми, услаждая плоть, огорчевая же душу делы, и словесы, и помышлении злыми. С Павлом реку: «Вемы бо, яко закон духовен есть, аз же плотян есть, продан по грехом. Еже бо содеваю — не разумею, не бо еже хощу — сие творю, но еже ненавижду — то содеваю. Еже бо хотети, прилежит ли; а еже содея-ти доброе не обретаю. Но еже бо хощу доброе, творю, но еже не хощу злое, сие содеваю. Аще ли, егоже не хощу, аз сие творю, уже не аз сие творю, но живый во мне грех. Обретаю бо закон хотящу ми творити доброе, яко мне злое прилежит. Сослаждаю бо ся закону Божию по внутреннему человеку; вижду же ныне закон во удех[985] моих, противу воюющ закону ума моего и пленяющ мя законом греховным, сущим во удех моих. Окаянен аз человек: кто мя избавит от тела смерти сея? Благодарю Бога моего Исус Христом, Господем нашим. Темже убо сам аз умом моим работаю закону Божию, плотию же закону греховному. Ничтоже убо ныне осуждение сущим о Христе Исусе, не по плоти ходящим, но по духу. Аз же, плотолюбец окаянный, несть человек, по реченному: сослаждаюся закону греховному»[986].

Человек быст Иев[987], праведен, непорочен, беззлобив; человек бысть Божий Моисей, боговидец[988]; человек бысть Исус Наввин, молитвою постави на небе текущее солнце[989]; человек бысть Давид, царь и пророк, егоже похвали Божие сердце сице: «Обретох Давида, сына Иссеева, мужа по сердцу моему»[990]. Человек бысть пророк Даниил, егоже в Вавилоне, в рове, устыдишася лютыя звери[991], видевше на нем Божий образ непорочен, ради добродетелей в нем цветущих; человек бысть пророк Аввакум, егоже принесе аггел от Иерусалима с пищею в Вавилон, в ров, к Даниилу[992].

Но не аз, Аввакум. Аз и сам сижу в рове, душею и телом обнажився, сам-пят[993], с нагими же.

Добре сотвори во Иерусалиме пророк Иеремия[994], ища в день человека, по граду ходя з горящею свещею. И рекоша ему людие: «Чего ищеши, пророче?» Он же глагола: «Ищу человека». Они же рекоша паки: «Како не видиши? Зри, полна митрополия великая человеков, везде люди». Пророк же к ним глагола: «Вижду и аз, яко много плоти, но несть человека. Человек бо той, иже праведне и богоугодне в заповедех Господних живый, а сии несть человецы, но змии и керасты[995], зверие: волцы и рыси, львы и медведи, понеже презирают повеление Божие и не ходят в заповедех Господних».

И Златоуст пишет, толкуя Деяние святых апостол, во нравоучении, сице: «Егда человек льстит, тогда змий бывает, а егда чюжая похищает, тогда волк бывает, а егда блудит, тогда осел бывает; а егда гневается, тогда рысь бывает лютая; егда же убивает, тогда сам диявол бывает».

Видите, людие, и чюдитеся безобраньству нашему, плачите и рыдайте вси, погубившии в себе образа Господня красоту и доброту, яко древле Иеремия плакаше Иерусалима. Чти Библию, там плач Иеремиин писан пространно. Пачеже ныне нам подобает плакати в настоящее время.

Увы, увы мне! Кого мя мати роди? По Иеву, проклят день, в он же родихся, и нощь она буди тма, иже изведе мя из чрева матери моея, понеже антихрист прииде ко вратом двора, и народилося выбълядков его полна поднебесная. И в нашей Руской земли обретеся чорт болшой[996], емуже мера — высота и глубина — ад преглубокий. Помышляю, яко, во аде стоя, главою и до облак достанет. Внимайте и разумейте вси послушавшии, даст бо вам Господь разум о сем.

БЕСЕДА ПЕРВАЯ

В лета 7160 (1652) году, июня в день, по попущению Божию вскрался на престолы патриаршеский бывший поп Никита Миничь, в черньцах Никон[997], оболстя святую душу духовника царева протопопа Стефана[998], являяся ему яко аггел, а внутрь сый диявол. Протопоп же увеща и царя и царицу, да поставить Никона на Иосифово место[999]. И я, окаянной, о благочестивом патриарсе к челобитной приписал свою руку[1000]. Ано врага выпросили и беду на свою шею! Тогда и я, при духовънике, в тех же полатах шатался, яко в бездне мнозе[1001]. Много о том потонку[1002] беседовать, едино рещи: за что мучать мя, тогда и днесь, болшо и до исхода души.