Том 17 (XVII век, литература раннего старообрядчества)

Глагола Господь ко пророку Ионе с повелением: «Иди и проповеждь нивеввитяном, да покаются, понеже грехи их внидоша во уши моя; аще ли ни — погибнут пагубою». Иона же, ведав Божие милосердие, яко милостив бывает кающимся, не восхоте в Ниневию итти, но седше в корабль и в Фарсис побежа, да же не солжется пророчество. Став же корабль недоступно[1228] на пучине морьстей, ветру велию дышущу. Иона же навклиром, еже есть корабленикам, рече: «Вверзите мя в море, понеже мене ради не поступит[1229] корабль». Егда же ввергоша и́, повеле Бог киту великому, да пожрет его. И бысть три дни и три нощи во чреве китове, прообразуя Христово тридневное погребение в сердцы земли. И принесе его кит жива к Ниневии, граду великому, емуже обхождение седмь дний. В Книгах Ионы пророка в Библеи писано. Егда же испусти его зверь, он же проповеда людям, глаголя: «Аще не покаетеся, — тако глаголет Господь, — в три дни погибнете». И изыде на поле, седе под смерчием, ожидая граду погубы. Людие же умилишася[1230] и с сущими младенцы сосцы материи три дни постишася, и плакавше грех своих, во вретище[1231] облекошася, и перьстию[1232] главы своя посыпавше, и скоту не даша пищи и пития. Много их бысть, иже не познаша десницы и шуйцы, болши двунадесяти темь[1233], — сиречь робят тех столко, а старых тех и гораздо много. И виде Бог умиление и покаяние их, разкаявся Владыко и помилова их.

Пророк же оскорбися, яко не збысться пророчество его, и уснув, сидя под смерчием, — сиречь древца некакие, — и он, милой, с кручины взвалился под куст и уснул. И взыде об нощ тыков над главою его, красна и леп. Он же возрадовахся и возвеселихся о ней. И повеле Господь червю нощному подгрысти: и изше[1234] ис корени. Пророк паки оскорбися о ней. И глагола ему Господь: «Како ты, Иона, ни садил, ни поливал тыковь сию, — обь нощ возрасте, об нощ и погибе, — а скорбию великою оскорбился еси о ней? Кольми же в Ниневии людии мои, иже не знаша десницы и шуйцы, болши паче нежели двунадесяти тем, вси оскорбишася и притекоша ко мне».

Виждь, человече, како любит Бог покаяние грешников, понеже праведника пророка тешит; а грешных милует. Прибегнем к нему, милостивому Богу и Спасу нашему, и не отчаем своего спасения, якоже Каин сотворил, или царь Озия[1235] во Израили. Добр человек был, и милостив, и правдолюбив, но впаде в недуг гордости, сицевым образом: разгордевся, вниде во Святая Святых, взем кадило и приступи к жертвенику, начат святая кадить; архиереи же умолчаша ему за величество сана его. Но токмо един священник Азар приступи к царю и рече, как бы то я, бедной, тебе ворчу, — архиереи те не помогают мне, злодеи, но токмо потакают лишо тебе: «Жги, государь, крестьян тех! А нам как прикажешь, так мы в церкве и поем, во всем тебе, государю, не противны; хотя медведя дай нам в олтар-ет, и мы ради тебя, государя, тешить, лише нам погребы давай да кормы з дворца». Да, право так, — не лгу. И глагола Азар: «Озия! Не подобает ти святая кадити, но токмо единем иереом, сыном Аароним». Он же, не устыдевся гласа священническа, своя совершая. И порази его Господь язвою на челе, еже есть Бог проказу наведе. И изгнаша его ис церковь по закону Моисееву, понеже закон повелевая прокаженных вне сонма[1236] и из града изгоняти, дондеже исцелеет и паки по свидетельству священническу приемлется и прощен бывает. Людие же, устыде вся сана царьска, не изгнаша его из града. Он же, Озия, живяше в дому своем неисходно, не прииде в покаяние греха своего и до смерти. Бог же о сем прогневася на люди, удержа пророчество за их согрешение и за пророческое ослабление, яко не изгнаша прокаженнова царя вне града. И молча пророк Исаия до смерти Озиины, понеже Дух Святый не сниде на пророка к недостойны людямъ глаголати, яко прогневаша Господа удержанием прокаженнаго во граде. И в лето, в неже умре Озия-царь, виде Господа, седяща на престоле, высоце и превознесение, и окрест его херувимы, шесть крыл единому и шесть крыл другому, двема убо летаху, двема очи закрываху, двема же — ноги, и вопиюще друг ко другу: «Свят, свят, свят Господь Саваоф! Исполнь небо и землю славы Его!» «И един от предстоящих, взяв клещи и от престола угль горящий, и прикоснуся устом моим», — рече пророк и возопив: «О, окаянный аз, провидех воплощаема Бога, света невечерня и миром обладающа!» И нача паки пророчествовать.

Виждь и разумей, колики беды гордость раждает: сам погиб и людям охриту[1237] наведе и тщету дарования Божия. Тако и ныне от гордости вниде во Церковь нестроение и дахматное[1238] пременение. Лют есть недуг сей во человеке, и велик подвиг — по Василию Великому — надобе человеку измените обычеи свои. Беда от гордых Церкви Божией! Тот — сяк, а ин — инако. Я помышляю: недостаток ума большей в человеке том, иже гордость содержит, и чается ему, мнится — хорошо, а все розвалилося! Якоже и дьявол сам за недуг сей извежен и-среды огня и отриновен от лица Божия, иво тму осужден, а таки величается: «Я, де, велик! Я обладаю всем!» А и над свиниями не имат власти!