Том 5 (XIII век, литература трагического века)

Тогда же Болеславу князю болну сущу велми. Потом же Болеславъ усторобився, посла посолъ свой ко Шварнови, тогда же Шварнови сущю в Новегородче, тако река: «По што мя еси воевал без моей вины, землю еси мою взял?» Шварно же ся запре ему, тако река: «Не воевалъ язъ тебе, но литва тя воевала». Посолъ же рече Шварнови: «Тако ти молвить князь Болеславъ — я на литву не жалую, оже мя воевала — немирникъ мой, а воевал мя тако и гораздо. Но на тя жалую. А Бог буди по правомъ, тъ то расудить межи нами». И отселе заратишася. И почаша ляхове воевати около Холма. Воеводы же быша с ними Сигневъ, Воржь, Сулко, Невъступъ.[704] И не взяша ничтоже. Избегли бо ся бяхуть в городъ, и зане весть бяхуть подали имъ ляхове украиняне.

Посем же Шварно приеха из Новагородъка вборзе и поча совокупливати силу свою. И Василко князь и сынъ его Володимиръ совокупившеся поидоша в ляхове воевать. Шварно же поча воевати около Люблина, а Володимеръ около Белое. И взяша полона много и тако поидоша восвояси: Шварно поиде к Холмови, а Володимеръ поиде к Червьну — ту бяшеть отець ему Василко. И-Щервена же поиде к Володимерю. Пришедшимъ же имъ домовь, и посемь ляхове почаша воевати около Червьна, тое же недели, и не вземше ничегоже, и тако поидоша назадъ.

И потомъ Болеславъ князь присла посолъ свой к Василкови, Григоря, пробоща Люблиньского,[705] тако река: «Свояче, соимевеся!» Василко рече: «А яз радъ». И порекоша себе снемь в Тернаве.

И по семь Василко поиде к соньмови до Тернави. И бывшу ему у Грабовци,[706] и приде к нему весть, оже ляхове лесть учиниле, к сонмови не шли, но обишедше около, на Ворота,[707] и тако поидоша к Белзу и почаша воевати, и села жечи. Василько же поиде вборзе от Грабовца Шварномъ и сыномъ своимъ Володимеромъ, и придоша ко Червьну, и видиша, оже села горять, а ляхове воюють. Василко же пусти на ня воропъ,[708] идеже бяхуть ляхове розогналися, воюючи по селомъ, и убиша от них многи, а другия изоимаша. Ляхове же убоявъшеся поидоша восвояси.

Василко же посла по нихъ Шварна, сыновца своего, и Володимеря, сына своего, указалъ бо бяшеть има, тако река: «Не бейте же ся с ними близь, но пустите е во свою землю. Олъны поидуть розделившеся, то же бийтеся с ними».

И тако по нихъ Шварно с Володимеромъ поиде во силе тяжьче. Бяхуть бо полчи видениемь, акы борове велицеи. Шварно же бяшеть впереде, идя своимь полкомъ, а Володимеръ идяше назаде своимъ полком. Ляхове же бяху и еще не вошли во свою землю, но токмо и бяшеть Ворота прошли. Се же беашеть место твердо, зане немощно бысть обоити его никудаже, тем же наречахуться Ворота теснотою своею. Ту же и угониша е Шварно, впереде идя своимъ полкомъ. И не помня речи строя своего, не дождавъ полка брата своего Володимера, и устремися на бой. Сразившима же ся челома, и тако поломиша полкъ Шварновъ, а инемъ полкомъ немочно бысть помощи ниоткудаже теснотою. И тако победиша ляхове русь и убиша от нихъ многих, от бояръ и от простыхъ людий. Ту же убиша оба сына тысячкого, Лаврентея и Андрея; немало бо показаста мужьсто свое и не побегоста братъ от брата, ту же прияста победы конець.

Посем же умиришася ляхове с русью, Болеславъ с Василкомъ и со Шварномъ, и начаша быти в любви велице.

Посем же Войшелкъ да княжение свое зятю своему Шварнови, а самъ опять восхоте прияти мниский чинъ. Шварно же моляшеться ему по велику, абы еще княжилъ с ними в Литве, но Войшелкъ не хотяшеть, тако река: «Согрешилъ есмь много перед Богомъ и человекы. Ты княжи, а земля ть опасена». Шварно же не може умолити его и тако нача княжити в Литве, а Войшелкъ иде до Угровьска в манастырь ко святому Данилью,[709] и взя на ся чернечькии порты, и поча жити и в манастыре, тако река: «Се ми зде близъ мене сынъ мой Шварно, а другий господинъ мой отець князь Василко, и тема ся иму утешивати». Григорей же Полониньскый и еще бяше живъ, наставникъ его. Войшелкъ же, вопрошавъ о животе его, радъ бысть, посла по нь, река: «Господине отче, приеди семо». Он же приеха к нему и настави его на путь чернечький.

И в то веремя присла Левъ к Василкови, тако река: «Хотелъ быхъ снятися с тобою, абы туто и Вошелкъ былъ». Василко же посла по Войшелка Страстное неделе, тако река: «Прислалъ ко мне Левъ, а быхом ся сняли. А не не бойся ничегоже». Войшелкъ же бояшеться Лва и не хотяшет ехати, но поеха по Василкови руке. И приеха на Святой неделе в Володимерь и ста в монастыре святого Михаила Великого.[710] Марколтъ же Немечинь зва к собе все князе на обедъ: Василка, Лва, Войшелка. И начаша обедати, и пити, и веселитися. Василко же, напився, поеха домовь спать. А Войшелкъ поеха до манастыря, идеже стояшеть. И посемь Левъ приеха к нему в манастырь и поча молвити Войшелкови: «Куме! Напиемся!» И начаша пити. Дьяволъ же исконей не хотя добра человеческому роду, и вложи во сердце Лвови, и уби Войшелка завистью, оже бяшеть далъ землю Литовьскую брату его Шварнови. И такъ бысть конець убиться его. Спрятавше тело его и положиша во церкви святаго Михаила Великаго.