Том 5 (XIII век, литература трагического века)

Княжащю же по Войшелке Шварнови в Литовьской земли, княживъ же летъ немного и тако преставися, и положиша тело его во церкви святой Богородице близъ гроба отня.

Въ лето 6777. Не бысть ничтоже.

Въ лето 6778. Нача княжити в Литве оканьный, и безаконьный, прокляты, немилостивый Тройдей, егоже безаконья не могохомъ писати срама ради. Такъ бо бяшеть безаконькик, яко и Антиохъ Сурьскый, Иродъ Ерусалимъскый и Неронъ Римъскый. И ина многа злейша того безаконья чиняше.

Живъ же летъ 12 и тако преставися безаконьникъ. Бяхуть же в него братья Борза, Сурьпутий, Лесий, Свелкений.[711] Бяхуть же живуще во святемь крещении. Сии же живяхуть в любви, во кротости и во смиреньи, держаще правую веру крестьяньскую, преизлиха любяще веру и нищая. Си же преставишася при животе Тройденеве.

Въ лето 6779. Преставися благоверный князь и христолюбивый великый володимерьскый, именемь Василко, сынъ великого князя Романа. И положиша тело его во церкви святей Богородици во пискупьи Володимерьской.

Въ лето 6780. Нача княжити во него место сынъ его Володимерь, правдолюбьемь святяся ко всей своей братьи, и к бояромъ, и ко простымъ людемь.

А Левъ нача княжити в Галиче и в Холме по брате по своемь по Шварне.

Въ лето 6781. Умиришася с ляхы с Болеславомь князем. Болеславъ же ся тогда заратилъ с воротьславьскимь княземь.[712] Идоша ему в помочь Левъ, Мьстиславъ, а Володимеръ самъ не иде, но посла свою рать со Жилиславомъ. Про то не иде самъ, заратил бо ся бяше со ятвязи.

Посем же сдумавше князи поити на ятвязи. Приспевши же зиме, сами князи не идоша, но послаша воеводы своя ратью. Левъ же посла со своею ратью Андрея Путивлича,[713] а Володимиръ посла со своею ратью Желислава, а Мьстиславъ посла со своею ратью Володъслава Ломоносаго. Ходивъше же и взяша Злину. Ятвязем же собравшимся, не смеша битися с ними. И тако придоша с победою и с честью великою ко своимъ княземь. И посемь приехаша князи ятвяжьсции Минтеля, Шюрпа, Мудейко, Пестило ко Львови и Володимерови и Мьстиславу, мира просяче собе. Они же одва даша имъ и миръ. И ради быша ятвязе о мире и тако поехаша во свою землю.

Въ лето 6782. Тройденеви же еще княжащу в Литовьской земле, живяше со Львомъ во величе любви, шлючи многы дары межи собою. А с Володимеромь не живяше в любви величе про то, оже бяшь отець Володимеровъ, князь Василко, убилъ на войнахъ 3 браты Тройденеви, же про то не живяше с нимъ в любви, но воевашеться с нимь, но не великыми ратми: Тройдени же, пославъ пешце татемь, воевашеть Володимера, а Володимеръ пославъ тако же воевашеть. И тако воевастася лето цело.

Посемь же Тройдений, забывъ любви Лвовы, послав городняны, веле взяти Дорогичинъ. И Тридъ[714] с ними же бяшеть, се же ведашеть о городе, како мочно взяти. Излезъ же и ночью, и тако взяша и на самы Великъ День, избиша и все от мала и до велика.

Се же слышавъ, Левъ печаленъ бысть о семь велми, и нача промышляти, и посла в татары ко великому цареви Меньгутимереви,[715] прося собе помочи у него на литву. Менгутимерь же да ему рать и Ягурчина[716] с ними воеводу, и заднепрескыи князи[717] все да ему в помочь, Романа Дьбряньского и сыномь Олгомъ, и Глеба князя Смоленьского,[718] иныихъ князий много. Тогда бо бяху вси князи в воли в тотарьской.[719]

Зиме же приспевше, и начаша ся пристраивати князи русцеи, и Левъ, Мьстиславъ, Володимерь. Идоша же с ними князи Пиньсции и Туровьсцеи. И бысть идущимъ имъ мимо Турово къ Случку, ту ся сня с татары у Случка. И тако поидоша вси воборзе к Новугородъку. И не дошедше рекы Сырьвяче, ту же сташа на нощь. А заутра рано воставше поидоша и перешедше реку до света, ту же и дождаша света. Восходящю же солнцю, и начаша изряживати полкы. Изрядивша же полкы, и тако идоша к городу. Татаром же идяху по праву своим полкомъ, а от нихъ Левъ идяше своимъ полкомъ, а от Лва Володимеръ идяше по леву своим полкомъ.

Татари же прислаша ко Лвови и к Володимерови, тако рекуче: «Дети наше виделе, оже рать стоить за горою. Пара идеть ис коней. А пошлете люди добрыи с нашими татары, ать усмотрять, что будеть». Они же послаша с ними добрыи люди, и тако ехавше, осмотреша, оже нетуть рати, но паря идяшеть со истоковъ, текущихъ из горъ, зане морозе бяхуть велице.

И тако придоша к городу, и сташа около его. Мьстиславъ же бяшеть не притяглъ, но шелъ бяшеть от Копыля,[720] воюя по Полесью, ни Романъ, ни Глебь, тии князи Заднепресции, но токмо и одинъ Олегъ, сынъ Романовъ, притяглъ. Пришелъ бо бяше напередь с татары. Татарови же велми жадахуть Романа, абы притяглъ.