Том 5 (XIII век, литература трагического века)

Потом же вложи дьяволъ ненависть во два Сомовитовича, во Кондрата и во Болеслава, и начаста вражьствовати межи собою, и воеватися. Кондратови же, живящу со братомъ своимъ с Володимеромъ за одино, а Болеславъ живяше с Лесткомъ и с братомь его Володиславомъ за одино.

Болеслав же совокупивъ рать свою и поя помочь собе у Володислава, и поиде на брата на своего на Кондрата к городу ко ездову. Кондратови же не бывшу тогда в городе, и тако преступлеше взяша городъ. Законъ же бяше в ляхох таков: челяди не имати, ни бити, но лупяхуть. Городу же взяту, и поимаша в немь товара много, и людии полупиша; и ятровь свою облупи, княгиню Кондратовую, и сыновицю свою облупи, и учини соромоту велику брату своему Коньдратови.

Посем же Кондратъ посла посолъ свой ко брату своему Володимерови, жалуяся ему о своей соромоте. Володимиръ же сжаливси и росплакався, рече послу брата своего: «Брате, Бог,— рчи,— буди отместникъ твоей соромоте, а се я готовъ тобе на помочь». И нача наряживати рать на Болеслава. И ко сыновцю своему Юрьеви посла, помочи прося. Сыновечь же ему тако рече: «Строю мой, рад быхъ и самъ с тобою шелъ, но неколи ми: еду, господине, до Суждали жениться. А со собою поимаю не много людий. А се вси мои людье и бояре Богу на руце и тобе. А коли ти будеть любо, тогда с ними поиди».

Володимеръ же нарядивъ рать поиде к Берестью. Ту ся и собра. И холъмляне придоша к нему, бяшеть бо воевода с ними Тюима, И поиде Володимиръ ко Мелнику со множьством вои. Из Мелника же отряди воеводу Василка, князя Вослонимьского, Володимерови, и Желислава и Дуная,[736] а сь Юрьевою ратью бяшеть воевода Тюима. И тако поидоша в Ляхы.

Володимеръ же отрядивъ рать и поеха до Берестья. Послалъ же бяшеть посолъ напередъ передъ ратью ко брату своему Кондрату. Бяхуть бо у него бояре неверни. А быша не дале вести Болеславу, посолъ же Володимеровъ, приехавъ Кондратови, поча ему молвити при всехъ его боярех: «Тако ти молвить братъ твой Володимеръ: радъ ти быхъ помоглъ за твою соромоту, но не лзе мь: замяле нами татарове», Посем же посолъ емь князя за руку и сжа ему руку. Князь же, уразумевъ, выиде с ними вонъ. И поча ему поведати: «Брать ти тако молвить: наряжайся самъ, и лодье наряди возитися на Висле, рать будеть у тебе завътро». Кондратъ же радъ бысть по велику и повеле вборзе изрядити лодье, самъ ся наряди.

Пришедши же рати, извозишася, и почаша изряживати полкы. Изрядивше же ся, и тако поидоша: Василко же поиде своим полкомъ, а Желиславъ своим полкомъ, а Дунай своимъ полкомъ, Кондратъ же князь с ляхы своимъ полкомъ, а Тюима своимъ полком. И тако идяху с великою крепостью усердьно.

Не дошедшим же имъ города Сохачева, и думахуть о взятьи его, абы в землю глубоку не входиле, но возборони имъ Конъдратъ князь, ведя и ко Гостиному,[737] то бо бяшеть милое место Болеславле.

Пришедшимъ же полкомъ к городу, и сташа около города, аки борове величеи, и начаша ся пристраивати на взятье города. Князь же Конъдратъ нача ездя молвити: «Братья моя милая руси, потягнете за одино сердче!» И тако полезоша подъ заборола, а друзии полчи стояху недвижими, стерегучи внезапнаго наезда от ляховъ. Прилезъшимъ же имъ подъ забороле, ляхове пущахуть на ня каменье, акы градъ силный, но стрелы ратьныхъ не дадяхуть ни выникнути изъ заборолъ. И начаша побадыватися копьи, и мнози язвени быша на городе, ово от копий, ово от стрелъ. И начаша мертви падати изъ заборолъ, эки сноповье. И тако взяша городъ, и поимаша в немь товара много, и полона бе-щисленое множество, а прокъ исекоша, и городъ ижжгоша, и тако возвратишася восвояси с победою и честью великою.

Кондрать же князь поеха во свой городъ, вземь на ся венечь победный, и сложивъ с себе соромоту помочью брата своего Володимера.

А Василько князь поиде к Берестью со множествомъ полона, и посла предъ собою весть к осподину своему князю Володимирови. Володимеръ же бяше печалуя по велику, зане не бяшеть вести от полку его. Посем же приде ему весть от полку его, оже вси добре сдорове идуть с честью великою. Володимеръ же радъ бысть повелику, оже дружина его вся цела, а соромови брата своего Кондрата одолевъ.