Том 5 (XIII век, литература трагического века)

И начаша собе промышляти о взятьи города. Столпъ бо бе каменъ высокъ, стоя перед вороты города; и бяху в немь заперлися прузи, и не бысть имь мимо нь поити к городу, побивахуть бо со столпа того. И тако приступиша к нему и взяша и. Страхъ же великъ и ужасть паде на городе, и быша, аки мертве, стояще на забролехъ города, о взятьи столпа, зане то бысть упование ихъ.

И начаша думати о своихъ боярехъ, како бы ихъ мочно добыти, но не могоша никакоже. Мьстиславъ же и Володимеръ и Юрьи и докончаша с горожаны, како города имъ не имати, а свое бояры выимати. Бояры свое поимаша, а городу не въспеша ничегоже. Тако возвратишася восвояси.

Въ лето 6786. Тройдени же еще княжа в Литовьской земле. И посла рать велику на ляхы, и брата своего Сирпутья посла, бяху бо и ятвязи тогда, и воеваша около Люблина по 3 дни, и взяша бе-щисленое множьство полона, и тако придоша со честью великою домовь.

Въ лето 6787. Голодъ бысть по всей земле: и в Руси, и в Ляхох, и в Литве, и въ Ятвязехъ. Посем же ятвязе прислаша послы своя к Володимирови, тако рекуче: «Господине княже Володимере, приехали есмя к тобе ото всихъ ятвязь, надеючесь на Богъ и на твое здоровие. Господине, не помори насъ, но перекорми ны собе! Пошли, господине, к намъ жито свое продаятъ, а мы ради купимъ. Чего восхочешь: воску ли, бели ль, бобровъ ли, черныхъ ли кунъ, серебра ль, мы ради дамы».

Володимерь же из Берестья посла к нимъ жито в лодьяхъ по Бугу с людми с добрыми, кому веря. Идущим же имъ по Бугу, и тако возиидоша на Наровь, и поидоша по Нарови. Идущимъ же имъ, и придоша подъ городъ подъ Полтовескъ,[728] ту же сташа на нощь опочиватъ собе. И тако избити быша вси подъ городомь в ночь, жито поимаша, а лодья потопиша. Володимеръ же искашеть сего, велми хотя уведати, кто се учинилъ. А ко Кондратови,[729] брату своему, слашеть, тако река ему: «Подъ твоимъ городомъ избити мое людье, любо твоимъ повелениемь или иного. Ты ведаеши во твоей земле, повежь». Кондратъ же запреся: «Я не избивалъ, а иного не ведаю, кто избилъ». Олны же поведе Володимеру уй его князь Болеславъ[730] на сыновча своего на Кондрата, тако река: «Без лепа ти ся прить, а самъ ти избилъ твои люди». Тогда Болеславъ в нелюбьи живяше со сыновцемь своимъ Кондратомъ. Болеслав же рече Володимерови: «Уведайся с нимь, великъ бо соромъ возложилъ на тя, а сложи с себе соромъ свой». Володимеръ же посла на Кондрата рать свою, и воеваша по сей стороне Вислы, и взяша полона много. Посем же Кондратъ присла ко брату своему Володимеру, мира хотя с нимь. Володимиръ же умирися, и начаста быти во велице любви. Володимеръ же и челядь ему вороти, што была рать повоевала.

Того же лета преставися великий князь краковьский Болеславъ, добрый, тихий, кроткий, смиреный, незлобивый. Поживъ же лета много и тако во старости добре отъиде ко Господу. Тело же его спрятавше положиша е во церкви святаго Франьцишка в городе Кракове.

Въ лето 6788. По смерти же великаго князя Болеслава не бысть кто княжа в Лядьской земли, зане не бысть у него сына. И восхоте собе Левъ земле, но бояре бяхуть силнии, не даша ему земле. Бяшеть бо у Болеслава сыновець 5 — Сомовитовича 2: Кондратъ же Болеславъ, а Казимиричи трие: Лестько, Земомыслъ, Володиславъ. Бояре же Лядьсцеи избраша собе одиного от нихъ — Лестъка, и посадиша и во Кракове на столе Болеславли. И поча княжити Льстко.[731]

Посем же Левъ восхоте собе части в земле Лядьской, города на въкраини. Еха к Ногаеви оканьному проклятому помочи собе прося у него на ляхы. Онъ же да ему помочь оканьнаго Кончака, и Козея, и Кубатана. Зиме же приспевши, и тако поидоша: Левъ радъ поиде с татары и со сыномъ своимъ Юрьемь, а Мьстиславъ и Володимеръ, сынъ Мьстиславль Данило[732] и поидоша неволею татарьскою. И тако поидоша вси ко Судомирю. И пришедше к Судомирю, и поидоша на ону сторону рекы Вислы, ту же и переидоша реку по ледови подъ самимъ городомъ. Первое переиде Левъ своимъ полкомъ и сыномъ своимъ Юрьемь, и по немь Мьстиславъ и сынъ ему Данило. Таже по них татарове. И тако перешедша сташа около города. Стоявше же малъ час, не бишася.

Посем же поиде Лево своими полкы со силою великою ко Кропивници,[733] с гордостью великою, хотя ити ко Кракову.

Володимеръ же бе назаде стоя у города своим полкомъ. И начаша ему поведати: «Осекъ во лесе полнъ люди и товара, не взиманъ бо бе никотороюже ратью, зане твердъ бяше велми». Володимеръ же отряди к нему люди добрыи, и Кафилата с ними же Селезенца.[734] Бысть же пришедшимъ имъ ко осекови, и бишася с ними ляхове крепко, одва могоша и взяти с великимь потом, и поимаша в немь множьство людии и товара.

Якоже переде писахом о Лве, и бысть же идущу ему полкы своими. И начаша росходитися воеватъ, Богъ учини над нимъ волю свою — убиша бо ляхове от полку его многы бояры и слуги добрее, и татаръ часть убиша. И тако возвратися Левъ назадъ с великымь бещестьемь.

Въ лето 6789. Иде Льстько на Лва, и взя у него городъ Переворескъ,[735] исече и люди в нем вси от мала и до велика, и город зажьже, и поиде назадъ восвояси.