Том 5 (XIII век, литература трагического века)

Бысть же по сихъ Болеславу князю, еще исполнившуся своего безумья, и не престаяшеть злое творя Володимеру князю и Юрьеви. Володимеръ же и Юрьи начаста рать свою наряжати на Болеслава. Володимиръ же пославъ и литву възведе. И тако поидоша вси. И Юрьи князь с ними же идяше на Болеслава. Яко быша в Мелнице, и присла к нему отець его Левъ, река ему тако: «Сыну мой Юрьи, не ходи самъ с литвою, убилъ я князя ихъ Войшелка, любо восхотять мьсть створити». Юрьи же не поиде по отне слове, но посла рать свою. И тако шедше взяша Сохачевъ городъ, и поимаша в немь товара много, и челяди, а прокъ иссекоша и тако ополонишася и поидоша восвояси.

Въ лето 6791. Хотящу поити оканьному и безаконьному Телебузе на ляхы и собравшу ему силу многу, забывшу ему казни Божие, еже сбыся над нимъ во Угрехъ, о немже переде сказахомъ, и приде к Ногаеви. Бяше же межи има нелюбовье велико. Телебуга же посла ко Заднепреискымь княземь, и ко Волыньскимь: ко Лвови, и ко Мьстиславу, и к Володимеру. веля имъ поити с собою на войну. Тогда же бяху вси князи в неволе татарьской. И тако поиде Телебуга на ляхы, собравъ силу многу.

Пришедшу же ему к Горине,[745] и срете и Мьстиславъ с питьемь и з дары. И поиде оттоле мимо Кремянець ко Перемилю. Ту и срете Володимеръ князь с питьемь и с дары на Липе.[746] И посемь угони Левъ князь ко Бужьковичемь[747] и с питьемь и с дары. И пришедшимъ же имъ на Бужьковьское поле, и ту перезреша свое полкы. Князи же надеяхуться избитья собе и городомъ взятья.

И оттоле поидоша к Володимеру и сташа на Житани.[748] Телебуга же еха обьзирать города Володимеря, а друзии молъвять, оже бы и в городе былъ, но то не ведомо. В неделю же минуша городъ по Микулине дни,[749] на завтри день. Богъ и избави своею волею, и не взяша города. Но насилье велико творяху в городе, и пограбиша товара бе-щисленое множьство, и коний. И тако безаконьный Телебуга поиде в Ляхы.

Осташа же татарове друзии у Володимера кормити либывеи коне. Си же учиниша пусту землю Володимерьскую, не дадяхуть бо из города вылести в зажитье:[750] аще ли кто выехашеть, овы избиша, а другия поимаша, а ныя лупяхуть и коне отъимахуть. И во городех изомре въ остою Божиимь гневомъ бещисленое множество.

Идущу же Телебузе в Ляхы, и с нимь идоша вси князи неволею татарьскою: Левъ князь со сыномь своим Юрьемь, а Мьстиславъ со своею ратью, а Володимеръ со своею ратью. И тако поидоша ко Завихвосту и придоша ко реце ко Висле. Река же не стала бяшеть, и не могоша ее переити. И поидоша во верхъ ей к Судомиру, и переидоша Санъ реку по леду. Ту же на Сану Володимеръ воротися от нихъ назадъ. А Вислу переидоша по ледови выше Судомиря и приступиша к городу со все стороне, но не успеша ничтоже. И почаша воевати землю Лядьскую, и стояша на ней 10 дний.

Тебелуга же хотяше ити ко Кракову, и не дошедъ его, воротися во Торжьку. Въсть бо приде к нему, оже Ногай попередилъ его ко Кракову прити. И про се бысть межю има болше нелюбье. И тако не снемавшася с Ногаемь, и поиде назадъ на Лвову землю, на городъ на Лвовъ. И стояша на Лвове земле 2 недели, кормячесь, не воююче, и не дадяхуть ни из города вылести в зажитье: кто же выехашеть из города, овы избиваша, а друзии поимаша, а иныя излупивше, пущаху нагы, а теи от мороза изомроша, зане бысть зима люта велми. И учиниша землю пусту всю.

Се же наведе на ны Богъ, грехъ ради нашихъ казня ны, а быхом ся покаяле злыхъ своих безаконьныхъ делъ. И еще же и на конечь исполни на насъ гневъ, и измре в городехъ во остою бе-щисленое множьство, друзии же изомроша в селехъ, вышедше из городовъ по отшествии безаконьныхъ агарянъ. Но мы на на предлежащее повзратимъся.

Ногай же оканьный не иде с Телебугою в Ляхы одиною дорогою, зане бысть межи има нелюбье велико, но иде своею дорогою на Перемышль. Пришедшу же ему к городу Кракову, и не успевъ у него ничтоже, якоже и Телебуга у Судомиря, но воеваше землю Лядьскую. А с Телебугою не снимася зане боястася оба: сий сего, а сей сего. И тако поидоша назадъ свое веже: Телебуга поиде своею дорогою опять, а Ногай своею дорогою.

Тое же зимы и в ляхохъ бысть моръ великъ. Изомре ихъ бе-щисленое множество.

По отшествии же Телебужине и Ногаеве Левъ князь сочте, колко погибло во его земле людий, што поимано, избито, и што ихъ Божиею волею изъмерло — полъ третьи на десять тысяче.[751]

Въ лето 6792. У Юрья князя у Лвовича умре сынъ именемь Михайло.[752] Младу сущу ему, и плакашася по немь вси людье, и спрятавше тело его, и положиша е во церкви святыя Богородица в Холме, юже бе создалъ прадедъ его великий князь Данило, сынъ Романовъ.

Тое же зимы не токмо и во одиной Руси бысть гневъ Божий моромъ, но и в Ляхохъ. Тое же зимы и в татарехъ изомре все кони и скоти, и овце, все изомре, не остася ничегоже.

Въ лето 6793. Начаша поведати, оже в немцихъ вышед море и потопило землю гневомъ Божиимъ, боле шьстидесять тысячь душь потонуло, а церквии каменых одиннадесять и сто проче деревяныхъ.