Том 5 (XIII век, литература трагического века)

Се же деяшеть Федоровы недели.[767] Взем же рядъ с братомь, поеха до Володимеря. И приеха Володимерь, еха во пископью ко святе Богородици, и созва бояры володимерьскыя брата своего, а местиче русци и немце, и повеле передо всими чести грамоту братну о даньи земле и всех городовъ, и столного города Володимеря, и слышаша вси от мала и до велика. Епископъ же володимерський Евьсегней и благослови Мьстислава крестомъ воздвизалнымъ на княжение володимерьское. Хотяшеть бо уже княжити в Володимере, но братъ ему не да, тако река: «Моглъ ольны по моемь животе княжити». Мьстислав же пребывъ несколько дний у Володимери, еха во свои городы: в Луческъ и в Дубенъ,[768] и во иныи городы, ихже не псахъ.

Володимеръ же приеха из Раю в Любомль, ту же и лежаше всю зиму в болести своей, росылая слуги свое на ловы. Бяшеть бо и самъ ловечь добр, хороборъ, николиже ко вепреви и ни к медведеве не ждаше слугъ своих, а быша ему помогли, скоро самъ убиваше всяки зверь. Тем же и прослулъ бяшеть по всей земле, понеже далъ бяшеть ему Богъ вазнь не токмо и на одиныхъ ловехъ, но и во всемь, за его добро и правду. Но мы на предлежащее возвратимся.

Наставшу же лету, и услыша Конъдрать князь Сомовитовичь, братъ Володимеровъ, оже далъ землю свою всю и городы, присла к Володимерю посолъ свой, река тако: «Господине братъ мой, ты же ми былъ во отца место. Како мя еси держалъ подъ своею рукою, своею милостью, тобою есмь, господине, княжилъ и городы свое держалъ, и братьи своей отъялъся есмь и грозенъ былъ. И ныне, господине, слышалъ есмь, оже еси далъ землю свою всю и городы брату своему Мьстиславу, а надеюся на Богъ и на тя, абы ты, господинъ мой, послалъ свой посолъ с моимъ посломъ ко брату своему Мьстиславу, абы мя, господине, со твоею милостью приялъ братъ твой подъ свою руку и стоялъ бы за мя во мою обиду, како ты, господинъ мой, стоялъ за мною во мою обиду».

Володимеръ же посла ко брату своему Мьстиславу, тако река: «Братъ мой, самъ ведаешь, како есмь имелъ брата своего Кондрата и честилъ и дарилъ, а в обиду его стоялъ есмь за нимъ, како и за собою. Абы ты тако же мене деля приялъ и с любовью подъ свою руку и стоялъ за нимъ во его зло». Мьстиславъ же обечася тако створити Володимиру, тако река: «Брате мой, радъ тебе деля приимаю с любовью под свою руку, а в обиду его дай ми Богъ голову свою сложити за нь». И по семь присла Мьстиславъ к Володимеру, река ему: «Хотел ся быхъ сняти со Кондратомъ, а докладываю Бога и тебе, како ми велишь». Володимеръ же рече: «Соимися с нимъ». Мьстислав же посла посолъ свой ко Кондратови, река: «Хочю ся сняти с тобою, приедь ко мне». И приеха посолъ Мьстиславль, поведая речь Мьстиславлю Володимеру. И возрадовася о семь.

Посемь поеха Кондратъ ко Мьстиславу. И приеха во Берестий, и посемь приеха в Любомль. Поведаша Володимеру слуги его, рекуче: «Брат ти, господине, приехалъ Кондратъ». Онъ веле ему прити к собе. Кондратъ же приде к Володимеру, идеже лежаше в болести своей, крепко стража. И вшедъ поклонися ему и плакася по велику, видя болесть его и унынье тела его краснаго. Повестивъ же со братомъ речи многии, о нехже переде писахомъ, иде на подворье. Володимеръ же присла конь свой ему добрый. Обедавъ же и поеха до Володимера, из Володимеря же поеха ко Луцку.

Бывшу же ему в Луцки, Мьстиславу же не сущу ту, но близъ города некоемь месте, именемь в Гаи. Место же то красно ведениемь и устроено различными хоромы. Церкви же бяше в немь предивна, красотою сияющи. Тем же угодно бысть князю пребывати в немь. И поеха Кондратъ из Луцка в Гай. Мьстислав же срете с бояры своими и со слугами и прия с честью и с любовью подъ свою руку, по братню слову по Володимерову, тако река: «Како тя имелъ братъ мой, и честилъ, и дарилъ, а мне дай Богъ тако же имети тя, и честити, и дарити, и стояти за тобою во твою обиду». И посемь начаша веселитися. Мьстиславъ же одаривъ Кондрата конми красными и в седлехъ в дивных, и порты дорогими, ины дары многи вдавъ ему, и тако отпусти со честью.

По отъезде же Кондратове из Любомля, пригна Ярътакъ ляхъ из Люблина. И поведаша Володимерови: «Ярътакъ приехалъ». И не веле ему перед ся, но рече княгини своей, иже: «Роспроси его, с чимь приехалъ». Княгини же посла посла по нь. Он же приде вборзе. И нача вопрошати его: «Князь ти молвить: с чимь есь приехалъ, повежь». Онъ же нача поведити: «Князь Льстко мертвъ». Володимиръ же сжаливося и росплакася по немь. «А прислали мя люблинцы, хотять князя Кондрата княжить во Краковъ. А наборзи хочю найти Кондрата. Кде будеть?» Княгини же, вшедши, поведе речь Ярътакову. Володимеръ же веле дати подо нь конь, его бо коне пристали бехуть. И погна вборьзе.