Том 7 (Вторая половина XV века, литература эпохи исторических размышлений)

Въ 13 же лето царства его, советом Божиим подвизаем, въсхоте град создати въ имя свое[13] и посла мужей достойных в Асию и в Ливию и в Европию на взыскание и изобрание преславна и нарочита места на создание таковаго града. Онем же возвращающемся, сказаваху цесарю различныя места преславная, а наипаче похвалиша ему Макидонию и Визандию. Он же болма прилежааше мыслию на Трояду, идеже и всемирная победа бысть греком на фряги.[14] И сице умышляюще царю въ дни и в нощи, слыша в сне глас: «Въ Визандию подобаеть Костянтину-граду създатися». И абие цесарь, възбудився от сна, вскоре посылаеть в Визандию магыстров[15] и градцкых делателей готовити место. Сам же цесарь, оставив в Риму кесари два сына,[16] Консту и Констянтина, а сыновца своего Адаманта — в Вретанию, поиде с материю своею Еленою въ Везандию, с нею же взят и жену свою Максимину, дщерь Диоклитияна царя, и сына своего Констянтина[17]... и Ликиния, зятя своего,[18] и два брата своих — Далмата и Констяндиона, и Долматова сына — Далмата же, и Констяноновых два сына — Галу и Улияна.[19] И пришед в Визандию, виде на том месте семь гор и глушиц морских много. И повеле горы рыти и нижняя места наполняти, и на глушицах столпы каменые ставити и на них своды сводити и ровняти место, а сам цесарь пребывааше в Визандию. Егда же уготовиша место, събра цесарь велмож и мегистан[20] и магистровъ, и начат умышляти, како быти стенам и стрелницам и вратам градцким, и повеле размерити место на три углы, на все стороны по семи верстъ, тако бо бе место то межи дву морь — Чернаго и Белаго.[21]

И се змий внезапу вышед из норы, потече по месту, и абие свыше орел, спад, змия похвати и полете на высоту, а змий начат укреплятися вкруг орла. Цесарь же и вси людие бяху зряще на орла и на змию. Орел же, възлетев изъ очью на долгь час, и пакы явися низлетающь и паде съ змием на то же место, понеже одоленъ бысть от змия. Людие же, текше, змия убиша, а орла изымаше. И бысть цесарь во ужасе велицем и, созвав книжники и мудреци, сказа им знамение. Они же, поразсудив, сказаша цесарю: «Се место Седмохолмы наречется и прославиться и возвеличиться в всей вселенней паче иных градов, но понеже станеть межи дву морь и бьем будеть волнами морьскими — поколебимъ будеть. А орел — знамение крестьянское, а змий — знамение бесерманское. И понеже змий одоле орла, являеть, яко бесерменство одолеет христьянства. А понеже крестьяне змиа убиша, а орла изымаша, являет, яко напоследок пакы христьянство одолеет бесерменства и Седмохолмаго приимут и в нем въцесаряться».

Великий же Констянтин о сем возмутися зело, но обаче словеса их повеле написати, а магистры и градцкые делатели раздели надвое, ибо единой стране повеле размерити градцкие стены и стрелници и начати град делати, а другой стране повеле размерити улици и площади на римской обычай. И тако начати делати церкви Божиа, и двор царский, и иные домы славны велможам и мегистаном и всем сановником и воды сладкие приводити. В седмое же лето виде цесарь мало живущих въ граде, зане велик бо бе зело, и тако сотвори: послав из Рима и от иных стран, събрав достославных велмож и мегистан, рекша сановник, съ множеством людей ихъ ту приведе и, домы велиа создав, дасть им жити в граде со устроением великим и царскыми чины, яко и своя домы и отчьства им забыти. Създа же цесарь и полату великую, иподрому предивную и две имполе[22] устрои, рекша улицы покровены на торгование. И назва град Новый Рим.[23]

Потом же созда церкви преславные: Софею Великую, Святыхъ апостолъ, и Святыа Ирины, и Святаго Мокия, и Архангела Михаила.[24] Постави же и пречюдный он столпъ багряный,[25] егоже изъ Рима принесе морем трею леты до Царяграда, зане велик бе зело и тяжек; от моря же до торгу летом единым привезен бысть, цесарю часто приходящу и злато много дающу людем брежения ради. И положи в основаниа 12 кош, ихже благослови Христос,[26] и от древа честнаго[27] и святых мощей на утвержение и сохранение предивнаго и единокаменнаго оного столпа. И постави на нем кумир, еже принесе от Солнечнаго града фругийскаго, имущаго на главе семь лучь. Такоже и ины вещи предивны и достохвалны принесе изъ многых стран и градов. И преукрасив град, възда ему честь велию обновлением, и праздникы и торжествы великими на многые дни. И так устави, да ся зовет град той Цесарьградом. И бысть радость велиа во всех людех.