Том 7 (Вторая половина XV века, литература эпохи исторических размышлений)

Днем же минувшим, пакы цесарь с патриархом и съ святители, събрав всь священнический чин, также и весь синглит цесарьскый и множество народа, сътвориша литию и молбы, молением дающе хвалу и благодарение всемогущей и живоначалной Троици, Отцу и Сыну и Святому Духу, и пречистые Богоматери. И предаша град и всяк чин людцкый въ руце всесвятей Богородици и Одигитрие,[28] глаголюще: «Ты убо, всенепорочная владычица и Богородица, человеколюбивая естьствомъ сущи, не остави град сей достоания твоего, но яко мати крестьянскому роду заступи и съхрани и помилуй его, наставляа и научая в вся времена, яко человеколюбивая и милостивая мати, яко да и в нем прославиться и возвеличиться имя великолепиа твоего в векы». И вси людие рекоша: «Аминь!» И благодариша цесаря и похвалиша добрый его разум и еже къ Богу желание.

Цесарь же понужааше стратиг[29] и градцких и наказателей храмы святыхъ и домы мирскиа съзидати на исполнения града. Велможам же и мегистаном и всем нарочитым людем тако заповеда: аще кто сподобится коей степени царскаго чина, да сотворит собе память достойну, дом да воздвигнет или обитель славну или ино здание дивно, яко да населиться град преславными делесы. Такоже и по нем царствующеи цесари и цесарици, кыиждо въ свое время подвизаашеся вещь преславну сотворити: овыи бо на взыскание и собрание страстей Господних и пречистые Богоматере ризы и пояса, и святыхъ мощей, и божественых икон, но и того самого богомужнаго нерукотвореннаго образа, иже от Едеса;[30] овыи же на прибавление града и домов великых, ины пакы на воздвижение святыхъ обителей и храмов Божиих, якоже великий Иустиниян цесарь и Феодосий Великий и цесарица Евдокия[31] и ины мнози. И тако наполниша град преславными и дивными вещми, имиже и блаженный Андрей Критцкий,[32] удивився, рече: «Воистинну град сей выше слова и разума есть». К сим же и пренепорочная владычице, мати Христа, Бога нашого, во вся времена бяше цесарьствующий град сохраняюще и покрывающе, и от бед спасающе, и от неисцелных напастей пременяюще. Такыми убо великими и неизреченными благодеянми и дарованми пресвятыа Богородица сподобися град сей, яко и всему миру, мню, недостойну быти тому. Но убо понеже естьство наше тяжкосердно и нерадиво, и яко неистовы, еже на нас милость Божью и щедрот отвращаемся и на злодеяния и безакония обращаемся, имиже Бога и пречистую его матерь разгневаемъ и славы своеа и чьти отпадаем, якоже есть писано: «Злодеяниа и безакониа превратят престолы силных», и паки: «Расточи грьдыя мысли сердца их, и низложи силныя съ престолъ»,[33] — такоже и сий царствующий град неисчетными согрешенми и безаконми от толиких щедрот и благодеяний пречистые Богоматери отпадшеся, тмочислеными бедами и различными напастьми много лета пострада.

Такоже и ныне, въ последняя времена, грех ради наших, овогда нахождением неврьных, овогда гладом и поветреи частыми, овогда же межуусобными бранми, имиже оскудеша силнии и обнищаша людие, и преуничижеся град, и смирися дозела, и «бысть яко сень въ винограде и яко овощное хранилище в вертограде».[34]

Сия убо вся уведев, тогда властвующей туркы безбожный Магумет, Амуратов сынъ,[35] в миру и в докончанье сый съ цесаремъ Костянтином,[36] абие збираеть воя многа землею и морем, и, пришед внезаапу, град обьступи со многою силою. Цесарь же съ прилучившимися велможами и вси людие града не ведяаху, что сотворити, понеже людцкаго собрания не бе и братиям цесаревым не сущимъ.[37] И послаша къ Магумету салтану посланники, хотя уведати бывшее и о миру глаголати. Он же, безверен сый и лукавъ, посланникы отосла, а град повеле бити пушками и пищалми,[38] а ины стенобьеные хитрости нарежати и приступы градцкые уготовляти. Сущие же людие в граде, грекы и фрягове, выеждая из града, бьяхуся с турки, не дающе им стенобьеныя хитрости нарежати, но убо силе велице и тяжце сущи, не возмогоша им никоея пакости сотворити, зане един бьяшеся с тысящею, а два — съ тмою.[39]

Сие же видев, цесарь повеле велможам и мегистаном разделити воином градцкия стены, и овны, и врата, также и всих людей, и клаколы ратные на всех странах изъставити, да коиждо их весть и хранит свою страну, и вся яже на бранную потребу устраяеть, и да бьеться с турки съ стены, а из града не выежчати. Такоже и пушки и пищали уставити по приступным местам на обранение стенам.