Том 7 (Вторая половина XV века, литература эпохи исторических размышлений)

Наутрия же епархъ Николай повеле гражаномъ избьенных туркъ выметати из града и за рвы на показание безбожному, и бысть их числом, якоже рекоша, до 16000. И по совещанию взяша их туркы и пожгоша. Епарху же паки повеле разрушеное место все заставити древом и башту делати, чающе има уже отступити, окааным. Безбожный же Магумет не тако съвеща, но по три дни събрав баши свои и санчакбиев,[62] тако рече имъ: «Видим убо, яко гаурове[63] охрабришася на нас, и тако браняще с ними не одолеем ихъ, понеже о единем месте токмо братися, о разрушимем, многыми людми невместно, а малыми людми — премогают нас и тако одолеют нас. Но да сътворим пакы ягму, якоже и первие, придвинувше туры и лесница къ стенам града на многые места, и, разделившимся гражаном по всем местам на сопротивление, абие приступим крепко къ разрушимому месту». И еже съвеща окаанный Божиим попущением тако и сотвори: туры убо и лесници и ины козни многы приступные повеле уготовляти, а воином паки повеле братися съ гражаны. И тако бьяхуся по вся дни, не дающе гражаном опочивания.

В 20 же первый день маиа, грех ради наших, бысть знамение страшно в граде: нощи убо против пятка осветися град всь, и видевше стражи течаху видети бывшее, чааху бо — туркы зажгоша градъ; и вскликаше велием гласом. Собравшим же ся людем мнозем, видеша у великие церкви Премудрости Божиа[64] у верха из вокон пламеню огнену велику изшедшу и окружившу всю шею церковную на длъгъ часъ. И собрався пламень въедино, пременися пламень и бысть, яко свет неизреченный, и абие взятся на небо. Онем же зрящим, начаша плакати грько, впиюще: «Господи помилуй!» Свету же оному достигшу до небесъ, отврьзошася двери небесныя и, приявше светъ, пакы затворишася. Наутрия же, шедше, сказааше патриарху.

Патриархъ же, собрав боляр и советников всех, поиде къ цесарю, и начаше увещавати его, да изыдеть изъ града и съ царицею. И яко не послуша их цесарь, рече ему патриархъ: «Веси, о царю, вся прежереченная о граде сем. И се ныне пакы ино знамение страшно бысть: свет убо он неизреченный, иже бе съдействуя въ велицей церкви Божия Премудрости съ прежними светилникы и архиереи вселенскими, такоже и ангелъ Божий, егоже укрепи Богъ при Устияне цесари[65] на съхранение святыа великиа церкви и граду сему, въ сию бо нощь отъидоша на небо. И се знаменуеть, яко милость Божиа и щедроты его отъидоша от нас, и хощет Бог предати град нашь врагом нашим». И тако представи ему онех мужей, иже видеша чюдо, и яко услыша цесарь глаголы их, паде на землю яко мертвъ и бысть безгласен на мног час, едва отольяше его араматными водами. Вставшу же ему, рече патриарху и всем боляром, да запретят с клятвою онем людем, да не възгласят сия народом, яко да не отпадуть въ отчаяние и ослабеют делами. Патриархъ же паки начат крепко увещевати цесаря, да изыдет из града, такоже и боляре все, глаголюще ему: «Тебе, цесарю, изшедшу из града съ елицыми всхощеши, паки, Богу помогающу, мочно есть и граду помощи, и ины грады и вся земля надежу имеюще, тако вскоре не предадутся безверным». Он же не уклонися на то, но отвещаваше им: «Аще Господь Богь нашь изволи тако, камо избегнем гнева его». И паки: «Колико цесарей преже мене бывшеи, велицы и славны, тако пострадааша и за свое отечество помроша; аз ли пакы последней сего не сътворю. Ни, господи мои, ни, но да умру зде с вами». И отступи от них. Зустунея же паки, пришедше со инеми боляры, много увещевааху цесаря со слезами и рыданием, да изыдет из града. И не послуша ихъ.