Том 7 (Вторая половина XV века, литература эпохи исторических размышлений)

Въ лето 6966. <...> Тое же зимы архиепискупъ Ростовской Феодосей[873] въ Ростове повеле мясо ясти в навечерии Богоявления, еже прилучися в суботу, митрополитъ же Иона въсхоте санъ сняти съ него. Княгиня же великая отпечаловала его у митрополита, а взя у него село Петровское отъ печалованиа. Тое же зимы, месяца февраля 15, родися сынъ великому князю Ивану Васильевичу и нареченъ бысть именемъ Иванъ. Того же лета преставися епискупъ Еуфимей Новагорода Великаго. Того же лета князь великий Василей Василиевичь рать свою послалъ на Вятку, а воевода у них князь Иванъ Васильевичь Горбатой да князь Иванъ Ряполовъской. И не успеша ничтоже: у вятчанъ посулы поимали да им норовили, и ни Вятьки и не взяли, и възвратишася. Того же лета създана бысть церкви камена Москве Введение святыя Богородицы на Симоновскомъ дворе въ городе.[874]

Въ лето 6967. <...> Того же лета бысть Благовещение на Пасху. Писано въ Пасхалии: Братиа, зде страхъ, зде беда велика, зде скорбь немала! Якоже въ распятии Христове, сий кругъ солнцу бысть 23, луны 13. Сие лето на конци явися, въ ньже чаемъ всемирное пришествие Христово. О Владыко, умножишася безакония наша на земли! Пощади нас, Владыко, исполни бо и землю славы твоея, пощади васъ! «Благословенъ грядый въ имя Господне!»[875] Блюдите убо, братиа, известно разумейте, кто хощетъ быти въ то время, бежи неверия, при насъ измаилы. «Господь бо не хощеть смерти грешникомъ, но ожидая покаяния». Рече Господь: «Не весте дни и часа, въ ньже Сынъ человеческий приидеть». И тогоже лета не бысть ничтоже. <...>

Въ лето 6968. Тое же зимы ездилъ князь великий Василей Васильевичь въ свою отчину въ Новгородъ Великий, а съ нимъ сынове его, князь Юрьи да князь Андрей. Ноугородцы же удариша въ вечье и събрашася къ Святей Софеи: свечашася все великого князя убити и сь его детьми. Ста же противу ихъ владыка Иона, река сице: «О безумнии людие! Аще вы великого князя убиете, что вы приобрящете? Но убо большую язву Новугороду доспеете, сынъ бо его большей князь Иванъ се послышить ваше злотворение, а се часа того рать испросивши у царя, и поидетъ на вы, и вывоюеть землю вашу всю». Они же оканнии възвратишася отъ злыя мысли своея. Тогда же Федора Басенка хотели убити шильники.[876] Езди же тогда князь Юрьи во Псковъ, тое же зимы и приехаша. <...>.

Въ лето 6969. <...> Того же лета поставлена бысть церкъви на Москве камена святый Иоанъ Предтеча,[877] иже приделъ имат святаго отца Варлама Новугородцькаго, великим княземъ Васильем Васильевчем. Варлама же оттоле поча празновати на Мосъкве, въспоминая чюдо, еже сътвори над Тумгенем,[878] иже его из мертвых въскресилъ, егда былъ князь великий въ Новегороде. <...>.

О проявлении мощемъ чюдотворцовъ ярославскихъ. Въ лето 6971. Въ граде Ярославле, въ манастыре святаго Спаса лежаху три князи: князь великий Федоръ Ростиславичь Смоленьский и Ярославский, да сын его Констянтинъ, да внукъ его Давыдъ,[879] въ церкви святого Спаса наверхъ земли. Самъ же князь великий Федоръ великъ человекъ ростом былъ, и те у него, Констянтинъ да Давыдъ, подъ пазухами лежали, занеже менши его ростомъ, лежаху же въ одномъ гробе. Свещаху же ся игуменъ и все священницы съборных церквей въ Ярославли, да сшедшеся положити и ихъ съ честию въ землю, туто же въ церкви, на томъ же месте. И старейшине града възвестиша о томъ, князю Александру Ярославскому, онъ же повеле тако сему быти, и гробницу хотяше устроити каменну, и покровом драгимъ окрыти его, и свещи поставити. И егда сшедшеся священницы, и иноки, и мирстии, и князь Александръ, правнукъ их, и егда въсприаша мощи их, тогьда Богъ простилъ первое Богоридцкаго попа и сына его у гроба ихъ, воду свещали с мощей ихъ, от тое воды простило две жены слепы. И оттоле начаша дивитися, и возвестиша всемъ, и начаша звонити, и поидоша вси народи с честию покланяющеся, и целоваху мощи ихъ. И оттоле положиша ихъ на землю, но въ томъ же гробе, на поклонение и лобзание мощей их и на исцеление недужным. И възвестиша епископу Трифону Ростовскому, иже въ его епискупии тъй градъ. Той же невериемъ обдержимъ, не имяше веры, мняше вълшевство быти. Месяца апреля 3 день, Богъ простилъ у их у гроба бесна человека, да слепа, боляща очима, и прозре. Того же месяца 20, гроба чюдотворець Богъ простил отроковицу единемь оком слепу, да мужа съ женою беснуемыхъ. Месяца мая 10 день, Богъ простилъ у гроба святыхъ чюдотворець жену слепу да отрока, болящаго немощию телесною. Месяца июня 25, исцеле у гроба святыхъ чюдотворець четыре жены: три слепы прозрели, а четвертую обеснуема, грызла плоть свою и людей ела. <...>