Том 8 (XIV - первая половина XVI века, переводная литература)

«Не просто бо спаслъ есть жизнодавець Христосъ, сшедъ въ адъ, всехъ, но речеся, яко тамо веровавъшихъ, иже суть отци и пророци, судья и царье, с ними и местни князи, и инии неции от людей жидовескых бесчислени и предъявлени всем. Мы же сия противо речемъ сде сущим, яко: ни даръ или богатство, слава, ниже чюдно и славно сие, еже спасти Христу преже веровавшая, елма ссуди праведенъ есть единъ, и всяк иже тому веровавый не погибнет. Достояше бо сим спастися всем и от адьскых узъ избавитися схожениемь Бога и Владыкы, еже и бысть того промышленьемь. А иже паки человеколюбия ради спасъшеся суть, якоже и сии, житие честнейше имяху и деяние добро всяко свершаху, тонце живуще, въздержателне и целомудрьне, веру же истинную и божественую не достигоша, не объучени быша всяко, но ненаучени пребывше отнудь. Сих всепромысленик Владыка всех привлече и улови мрежами божествеными, и тех преклони веровати ему, восиявъ на ня божественыя луча и показавъ имъ истинны свет; не бо суди, милостивенъ сы естеством, втоще тех труды быти, стяжаша бо труднейшее житие, болезньно же и тесно паче слова, самодержьци страстемъ бывше и сласти оплевавше, вкупе нестяжанье же всяко исправлеше, вздеръжанье же со бдениемь паки, и всяко просто изрядно жителство, не благочестивне убо, но обаче прошедше, вышнии промыслъ, якоже мняху, изрядне чтуще, обаче погрешне. Суть же неции иже божественую славу всемощныя достигоша Троица тонце и темне, но не прославиша обаче. Ини же воплощенье рекоша Слова, страсти честныя и встанье его. Друзии же рожество, еже от Девы, имя же тоя пронарекъше, Мария бо, рече, имя некое отроковици. Паки неции предначтоша вся преестественая Христова чюдотворенья, мерътвых же и слепых, и гугнивых, прокаженых, и глухых, и огничавых, трудоватых, вкупе и сухорукых, и морское хоженье, отсюду хлебом благословенье и рыбам, преложенье воде в вино паки, кровоточивыя и слукыя вкупе здравье предрекъше со инеми многими. Сих божественая Слова сила не стерпе презрети погибающихъ, ниже погубити делания изрядных. Заимствованый бо темъ слова конець, якоже рехом, не помрачаеться, но схраненъ одеваеться всемъ иже добре пожившимъ с прилогом. А иже не жившеи право житие, семя или плод никакоже стяжавше, и ниже дождя божественаго, съ небесе излиявшася на них, възрастивша всяко, ни бо, яко же варивъ рех, вложиша семя, ниже, восиявшю солнцю славы, съзреяша, яко бесплодни отнудь. Сих не ползова Христосъ спроста, совъздвигь, якоже мню, падшихъ, яко недостойны всячьскы спасенью, ниже бо вероваша ему, мниться мне. Ослепи бо тех помыслы и, увы мне, и очи сердца тмы взятие, первый змий, емуже служителе исперва, яко да, видяще, не видят вправду и разумеют отнудь. Ини же вси, семя имуще, и съзреяше, солнцю явлешюся, и взрастоша же, дождю бывшю. Сих спаслъ есть, якоже мню, Христосъ мой, егда сниде въ адъ хотеньем».

Душа: Вся добре сказала ми еси, учителнице и рабыне, и истинна и известъна. И не пререкую отнудь, но имам еще възыскание, недоуменье велико. Рци и се явлене, аще можеши рещи.

Плоть: Да что есть и каково и которое есть, скажи.

Душа: Како, оставльши убо тленно и нетленно же обретши, тело убо свое душа како познает? Ова бо оставила есть слепо и безъ очью то, ова же глухо и немо, скудоумна же другая, скопьца же и иная, и тонко, и сухонаво, дебело, полно и тучно же, чревато другая, другая же безъ брады, космато же ти о другая; иная паки женьско, черно иная и смядо, бело же пакы другая; без руку и безъ ногу остави паки иная, и младенца иная несвершена и малейша зело, и старца; и иная съгнивша зело, и черно власы другая, бело же иная паки. Во вскресенье убо, якоже глаголеши и учиши мя, рабыне, ино от иного бывъшее, якоже варивъ рекла еси, по подобию Адамову, — како убо познает то и не имущее знаменья, ни образы, ни меры?