Том 9 (Конец XIV - первая половина XVI века, подъем общественного значения литературы)

Таже чада Романова злокозньная багрянородный ухватив царь Констянтин, изметну их,[197] сьтворъ внезаапу острьвени, сиречь въ острове отслав их. И тогда прьвие виде старицу царство, яко отроковицу златоутворну и аки бисероносную, и яко новоодеждну и красну и яко младящуся и смеющуся тихо, и беседующу с ним, и примешающуся невестъски на детородие.

Сьй Варду Фоку[198] военачальника постави, егоже схолом доместика нарицают греци, скопца же Василиа,[199] единаго от изрезаных, родившагося Лакапину из рабыни, паракимумена и хранителя царской постели. А понеже Варде угасе аже на бранех теплота и скорострьмное нападение, увену старостию, в Никифора Фоку[200] военачалие прелагает, якоже аще кто речет, от лва на тогова щенца. Сына же видети получив от своею чреслу, иже из Елены, Романовы дщери, прозябе ему, нарече его Романа. Достигша же его до возраста и жене припряже, и видевъ от сына своего чадо Василия, великаго в победах,[201] и младенца на руку поносив толикаго, и хотя отрешитися от естьственых соуз, греком царя поставляет Романа,[202] сына своего.

ЦАРСТВО РАМАНА, КОНСТЯНТИНОВА СЫНА БАГРЯНОРОДНАГО

Нь сей всю крепость и всю силу злиимъ и худоумным евнухом предав, самъ о ловленыих печашеся и бесовски внима на пьсиа течениа. Тогда Крит[203] злочестивыим аровом приемшим, и крепко убежище положившим остров, и озлобляющим сушу и все пленующим, Никифор Фока, си лют въ бранех, и стремлением искуснъ, и крепок рукама, ратиначальник показася, и предана ему бысть брань. Темь и исполняет море кораблей доброратных и добропловных, и на звери посылается сие водусушные, и рать сьставль крепку, победи супостаты <...> и погрузи разбойнические насади аравом, ухвати же разбоюначальника предръзаго оного и исполинорукаго, яко младенца, объят.[204] Оттуду възвратись светлыми победами многочестными и светлыми позорищи обличает.

Тогда прекрасный град Антиохов,[205] благородный, и благолепный, и яко невеста украшеный, исмаильтяне убийственый оружием вземше, яко прерабу посрамиша и яко напутную блудницу. И паки прехрабрый преемлет Фока оружие, паки подвизается на враги крови ради иноплеменние. И победи иноплеменники, а своаплеменником пособствуя, и паки доброзрачную и доброобразную отроковицу възвращает матери доброчадней.

Еще же тогда Фоце на брани борющуся, царя Романа смерть въсхити, жене своей Феофане[206] власть оставльша и детем ее младородным и сущим. Уведе же сия и Фока, и оттуду востече и к великому граду въскоре достиже, и паки показася восточный чиноначальник, клятвами страшными увязан быв царицею, яко да не будет наветник Романовем детем, и паки послан бывает в Сирию. Нь убо не почину люты зверь вражда, иже земльнородных сердцеснедий медведь. Ибо некый скопец[207] от сущих въ царских, иже тогда вся власть горе и долу обращаи, трьнием враждным уязвився на воеводу и толикий успехъ чести не трьпя зрети Микифору Фоце, вь уриах воюющу, писание кь Цимисхиу[208] доброперо начрьтьвает, — Цимисхиеви же бе имя измлада Иоаннь, — дело оружию Фоку положити подвизающи, самому же въ Византию приити принуждающи, яко быти ему царю и дръжателю греком. Приат же послание оно Иоаннь Цимисхий и прочте написанию образы, и разум злоненавистен ими и благообычен, вьручает сиа Фоце и вещь исповедает. Омрази же убийстьвном оного скопца. Бе же добръ Цимисхий, доброзрачен, доброобразен, доброкос, трьпелив, храбросрьдъ, мужеумен, ратник непобедим, и сьветник непобедим, человекъ великодушен, не храня в себе вражду, целоумен, храбрь, кроток, и копиемъ потрясати научен, и лук тяглити вь тятивах стрелам внушенам, муж простодушен, не храня в себе злобы, ниже злобе гнездо срьдци свое содевая, ниже желае лютейшее велбуда тяжце храмящаго. Подобает же малыми долгаа и многаа явити: и душевлен бе рай благодетнаа садовна храня, ограда многих благъ насаждена овощиемъ, Божиима напояема дланми садорастными, духовными наваждаема водами златоструйнами, в немже ликоваше добродетелей хоро, противным же вещаниемъ въспеваше благодетное ликование.