ANTOLOGIO

« dharma » (lego kosmal) e cervini pro ke la Buddho komencis predikar

lua doktrino en loko nomata prato dil cervini. En la internajo dil templo

il montras a ni imaji e skulturi di deaji diversa nomata « yidam »-i. Li ne

esas vera enti ma suportili por meditado-temi spirital. Me ne povas

impedesar pensar ke anke en altra religii, la santi e la dei esas suportili

por la mento, ma ico povas igar li tre efikiva danke la liturgio

establisante magiala ligilo kun la deajo, olqua reprezentas energio e

forco interna e nule, quale on povus kredar, povo extera. Pos lua expliki,

ni darfas pozar questioni ad il e Marion Kasper tre astonis me per

questionar kad la venonta Dalai Lama povos rienkarnigesar kom muliero.

Me mem plu astonesis kande la monako respondis, ke : « - Yes, e la Dalai

Lama asertabis ico tre explicite, recente. » Pos kontemplir un

273

« mandala » ni iris a la drinkeyo dil monakeyo e durigis nia exkurso per

vehar a la vilajo Anost por la dineo. Ante la dineo, Hans qua esas kurioza,

forduktas Loïc Landais e me a mikra muzeo pri tradicioni e dialekti dil

regiono Morvan. Me havas la surprizo konstatar ke Hans savas nun tote

fluante (o preske fluante) la Franca, quankam il asertas lernir ol recente.

Forsan lua savo pri Ido e la Hispana esis granda helpilo a lu. Retroveninte,

me iras a la hotelo « Le Lion d’Or » ube me havas mala surprizo, nome

la iracoza patrono asertas ke me devabus venar ye la predio e ke il vartis

me til un kloko matine e ke me devas restar til la fino di mea sejorno

hike pro ke ico esis rezervita de ante da Hans. Me ne savas quon pensar

e, fine, me asentas. Ni certe aranjos l’afero, Hans e me, kun la patroni

di « Ambiance Morvan », me opinionas.

10ma di agosto, saturdie : Dum la matino, me havas plusa desagreabla

surprizo che « Ambiance Morvan », nam kande me anuncas a la patroni,

ke denun me devas lojar che la « Lion d’Or », li ne aceptas ico e dicas

ke me devas retrovenar a lia gasteyo. Me ne savas quale agar, forsan

dum la vespero me negocios kun la hotelestro di « Le Lion d’Or » por

aranjar ico. Por la exkurso di la komenco di ca jorno, Hans irigas ni a la

« foire de la brocante » (brokanto-ferio t.e. ulaspeca « pulco-merkato »)

en Corbigny. Ibe on povas trovar omnaspeca interesiva ancienaji e la

etoso esas tre gaya e festal tra la streta stradi di ta desnova urbo. Fine,

me kompros libro kun interesiva raportaji historial, quin me intencas

tradukar ad Ido (koncerne kelki de li). Me memoras ke ulainstante Hans

e me renkontris charmiva mezevoza damo dil urbo Lille, Francia, qua

anke, quale multa Nederlandani, kompris domo kom duesma rezideyo en

la regiono. Quankam el esas Francino e parolas nur France, pro lua

geografial origino, el esas quaze samlandanino di Hans, quan el ja

konoceskis plura monati antee.

Dum la komenco dil posdimezo ni retrovehas ad Ouroux por dejunar en

la lokacita apartamento di Peter Totten e lua Japoniana spozino Miyuki.

Pose, ni departas itere por irar a loko ube esas la bela lago artifical di

Pennecière kun digi kreita por regulozigar la fluo dil riveri, qui furnisas

aquo a la fluvio Seine trairanta Paris. Ante ita labori e digi, la aquo-flui

produktis ibe dramatatra inundi.

Plu tarde, ni iras a drinkeyo nefore de la dicita lago, quan ni povas

admirar sub la tre brilanta suno. Ibe me komendas tradicionala Franca

drinkajo nomata « diabolo menthe » (diabla minto). Kurioza, Marion

Kasper imitas me e rapide, kande el drinkeskas ol, elu lore anke tre

prizas ica drinkajo nekonocata da elu til nun. Ye la sequanta dio, s-ro

Scholz probinte ol, deklaros ke ol esas agreabla drinkajo ma pensigas pri

absinto, olqua konocesis dum la XIXma yarcento, ma pose interdiktesis

til recenta tempo pro lua danjerozeso debata a lua altanivela alkohol-

274

procento. Fortunoze la « diabla minto » ne kontenas alkoholajo e povas

drinkesar mem da infanti. Plu tarde ni dineas en « pizzeria » e

retrovehas ad Ouroux.

Por negociar kun la hotelestro di la « Lion d’Or », me demandas ad Hans

venar kun me, nam il komendis mea chambro. Fakte, il esas kulpoza pri

nulo, nam il komendis omno en ordino, ma pro ke il esis en Amsterdam,

e ne surloke, il demandis a la hotelestro per e-mesajo e per telefon-

mesajo konfirmar la komendo, ma il recevis nula respondo. Pro ke il ne

savis quon opinionar pri la tacado di la jeranto di ca hotelo, il preferis

komendar chambro che « Ambiance Morvan » por ne havar mala surprizo.

E normale ni ne devabus havar problemi. Ma tote ne-expektite e pro

neklara motivo la jeranti di « Ambiance Morvan » klozis lia gasteyo dum

un dio e sendis la Idisti a la « Lion d’Or » ed ico kreis nia problemo. La

hotelestro restis netransaktema e pro ke me havis mea valizo che la

hotelo e nule povis fugar, pos diskuto en Ido kun Hans, me rezolvis restar.

Hans promisis a me aranjor ica stranja kazo kun lua samlandani jeranta