ANTOLOGIO

do retrovenis, ma esis nulu qua respondis. Pos informir la policani en la

skopo retroirar aden ca chambro e trovar sua klefo, il saveskis ke la

koncernata domo ne plus lojesis e ke la personi pri qui il parolis vivabis

en 1840 cirkume. Komence, on kredis ke la studento esis jokachero o

dementulo, ma pos trovir lua klefo en la chambro klozita depos multa

yardeki, on egardis seriozamente lua raporto. La afero divenis tre

famoza en la jurnali di ta epoko e la granda fizikisto Einstein deklaris ke

« forsan esas eskaleri-gradi en la tempo e ke la yuna viro eroris pri un

eskalero-grado kande il suriris ol ». Plu bona explikon, til nun, onu ne

havis.

Multe plu stranja fakto mem esas la raporto da Latina kronikisti qui

skribas pri viro ofrinta glaso, qua ne povis ruptesar ne esis ek vitro e

povis modifikesar relate lua formo, ad imperiestro Nero. Questionita e

tormentita pro ica objekto, il respondis ante mortigesar, ke il venas de

tre fora epoko futura kande la Imperio Romana ne plus existos depos

longa tempo. La policani tote ne trovis traci di lua origino ed on nur

saveskis ke il aparabis subite en Roma. Malgre la mala fino, ico povas

revigar… Posible la homi dil futuro esas ja inter ni e ni frequentas li sen

savar lo.

( Segun artiklo da JEAN MARTIGNON publikigita en la n°3/2002 di LETRO

INTERNACIONA)

41

VOYAJO A KRETA

Dum la lundio 23ma di septembro 2002, me arrivis a la Franca aerportuo

di Roissy cirkum Paris. Ibe me trovis rapidamente mea voyajo-kompani,

qui esis preske omna, membri di mea laboreyo-administrerio, nam ica

voyajo organizesis po chipa preco da mea samprofesionani. Ni vartis dum

longa tempo nia aviacilo, qua kelke tardesis (quale ofte por avioni). Pos

desfacila departo, ni ne havis tranquila aviacado nam en la proximeso di

Macedonia ni subisis « aerala petulaji » tre forta, ma fine ni atingis la

aerportuo di arivo en Iraklio, chefurbo di Kreta, lor la vespero kande ja

nokteskis. Pose ni eniris interurba autobuso, olqua duktis ni a nia hotelo

« Alexandros » jacanta en l’urbeto Georgopolis, ube ni arivis ye 23 kloki.

Quankam ni arivis tarde, ni povis repastar e ni vizitis kelke la cirkumajo

dil hotelo ante irar a lito. Me sucesis telefonar a mea familiani e pagar

mea kurtatempe durinta advoko telefonal po moneto-peco di 50

cent(imi) en nia nova pekunio komuna.

Dum la sequanta dio, 24ma di septembro – Me enskribigis me dal vakanco-

klubo, qua jeras la hotelo, por exkursi per interurba autobusi dum la

semano di mea sejorno. La unesma exkurso komencis lor la posdimezo di

ca dio ipsa. Nia autobuso duktis ni al urbo Khania (pronuncez la –kh quale

la Hispana jota o la Germana ach-laut). Ante atingar Khania, ni vizitis

monakerio ortodoxista, qua tamen ne esis en pura ortodoxista stilo, nam

la Veneziani okupis l’insulo Kreta dum quar yarcenti (del XIIIma yarcento

til fino dil XVIIma yarcento) e li influis forte la lokala arkitekturo ed arto.

La pregeyo ipsa dil monakerio esis tre bela e pure Greka-ortodoxista,

nam esis belega ikoni e splendida ‘ikonostasio’ (loko ornita per ikoni,

dop qua la sacerdoto izolesas por la kulto). Nia guidistino, nomata

Ariadne quale la heroino Kretana di la legendo pri la Minotauro, explikis

a ni abundante per tro multa detali (quale pos elu nia omna guidisti) la

historio e la apartaji di ca monakerio e dil ortodoxista religio, talmente

ke me memoras nur poke la explikaji. Plu tarde ni vizitis, nefore, loko

superpendanta la maro e qua aspektis quale tranquila gardeno, ube

enterigesis la granda Greka viro politikal Eleftherios Venizelos (1864-

1936) naskinta en Khania e qua pleis importanta rolo en la politiko Greka

dum la komenco dil XXma yarcento. Pose l’autobuso arivis en Khania e

la guidistino vidigis da ni marveloza e charmiva stradeti di qui la domi

konstruktesis precipue dum la Veneziana epoko. Fine ni havis libera

tempo por vizitar la merkato-halo qua havis etoso tipalmente

mediteraneal ed ube multa vari lokal : legumi, frukti, kuki, saponi e

maxim diversa mestieraji, kelkafoye tre bunta e spicizita e qui ne esas

42

trovebla en West- o Mez-Europa, expozesis. Fininte la vizito che la halo

ante itere sidar en la turismala vehilo por retrovenar al hotelo, me vizitis

ortodoxista kirko ube la popo celebris deala servo. On kantis tradicionala

kantiki sen irga akompano da muzikilo. La kirko ipsa ne tre dessimilesis

Romana-katolika kirki ecepte la prezenteso dil ikonostasio. En la hotelo,

me havis l’okaziono gustar lokala frukti, precipue oranji e vitberi, qui

esis delicoza e tre saporoza, extreme dominacante per lia qualeso le

sama, quin ni gustas en nia nordala landi.

Dum merkurdio 25ma di septembro – Me exkursis tra Kretana vilaji. Nia

guidisto, viro cafoye, savigis ni en l’autobuso ke esas mult olivieri en

Kreta. Omna rurala posedanti havas olivieri qui esas la richeso dil insulo,