Том 15 (XVII век)

Егда же таковая ей глаголющи и горко плачющи, возреве Апполон, яко лев воплемъ крепкимъ, горко возрыдав, паде на дщери яко бездушенъ и много вопия и рыдая. Егда же укрепися, зря дщерь, извествуяся о ней, обымая и лобызая, и от радости в познании, от слез же в злоключениях недоумеваяся, что глаголати. Возопи же великимъ гласом: «Приидите, братия моя и друзи и бедъ моих сострадалцы! Возвеселитеся со мною, за еже возлюбленную мою единую дщерь, юже погубих, обретох». Услышаша сия, друг друга предваряюще, ко Апполону течаху. Притече же и Антагор князь, приятель и острегатель его дщери, и вси граждане. И бысть всемъ неизлаголанная радость.

Изыде же ис корабля и со дщерию, радостно слезяще, друг друга объемъше; и приидоша в домъ приятеля своего князя Антагора. Упроси же его Антагор во еже в бани устрабитися[1419], и сетованная пременити, и власы облехчити. И постави всем завет Антогор пиршествовати и веселитися с нима. И по веселии же мнозем преда и град свой и всю державу кралю великому Апполону. Апполон же, видя толикое его премногое добро, по многом благодарении, яко прежде сродства любви показа любовь сына, даде ему дщерь свою Тарсису премудрую и красную в жену. И бысть женитва радости и утешения полна. Купивый же Тарсису без вести погибе.

По радости же поят Апполон царь зятя своего со дщерию и иде к Тиру во свое царство. Прииде же к Тарсу граду, игде остави Тарсису воспитати, и по оповедании Тарсисы и извопрошением Феофила, Странгвилей и Дионизия прияша, яже Тарсисе показаша: по различным мукам главы их отсекоша. Оттуду жъ приплы во Ефесъ град и изыдоша в первую кумирницу, идеже Лучница началница; неведуще же ю. Егда же в храмъ идолский внидоша, узре Лучница своего возлюбленнаго супруга грядуща и позна его; обаче, яко дщерь по руку ему идя, чая, яко жена его есть, и глаголя в себе: «Како такову младу поя?» Не хотяше же себе того ради объявити. Егда же к ней Апполон яко первейше властелине прииде и преда венецъ злат приношение богомъ, глаголя: «Мати великая, помолися, даю сие приношение богомъ, яко дщерь мою возлюбленную обретох сию», указав на Тарсису, — она же восприемши, возложи венецъ на главу свою, сама же с принеможением едва от слез удержися. Прииде же и Тарсиса, подаде другий венецъ златый, глаголя: «Приими сие, честнейшая, в дар, яко даде ми вышний промыслъ обрести прелюбезнаго моего отца». Видевше же Апполон в венце стоящу Лучницу, благородием и красотою сияющу, удивися и непщева ю быти богиню; нача же воздавати хвалу кумиром, глаголя: «Хвалю вас, бози, и тебе богине, яко отраду и утешение ми подаете, во еже обрести возлюбленную мою дщерь. Аще ли же бы сего мне вы, милостивый бози, не подали, во всеконечную пришел убо бых погибель. От младых убо есмь лет краль, оттоле жа и бедник злополучны. Прося убо некогда у Антиоха дщери в супружество, судом его неправедным едва смерти избегох. Бегая же от него, плавая море, едва бедне не утопох, но вашею помощию рыбарем потопления избых и в Кипре того ради замедлевъ. Тамо же мя едина славная девица, дщерь краля Алтистратеса именем Лучница, прияла себе за мужа, и оттоле злочастие мое преумножися. Егда неотторженою ея любовию идохома в мое отечество, от бедъ моря в рождении ея смерти бедне разлучихся, и по смерти ея, любве ея ради, во всегдашнем унынии и печали, и отнюдь и до ныне весел быти не могу». Сия же ему глаголющу и горко слезящу.

Дожда же сего словеси Лучница, к тому терпети не возможе, но возопи гласом велиимъ, з горкими слезами глаголя: «О предражаиший мой свете и прелюбезный государю, кралю Апполоне, аз убо жена твоя Лучница, дщи царя Алтыстратеса!» Нападе же на выю его и многъ час неразлучни плачуще. И егда укрепившеся, рече Апполон: «Во сне ли ми яже о тебе прелюбезная моя или на яве?» Лучница же отвеща: «Во сне убо без вести и яко смерти наведения друг о друзе быхом, ныне же разбудихомся». Извести ему Лучница вся еже о себе, и по многом в познании друг друга плачю приидоша во всерадостное утешение. И изыдоша из храма богов и идоша в дом, идеже пребысть Апполон. Слышавше же граждане, зело возрадовашеся и прославиша Бога всемогущаго. Повеле же Апполон Тиримонуса врача и ученика его Силемонуса призвати и дарова им премногия дары. И по сем в радости неизреченней с кралевою Лучницею, и со дщерию Тарсисою, и со зятем Антагором шествова во свое отечество в Тир град.

Егда же к Тиру приближися, и изыдоша во стретение его мужие во урядстве изящнемъ на конех; девицъ же лики во украшении лепотне полками; такожде и жены, и малейшая отрочата своею особою. И от радости старии и младии плакаху, и бысть приездъ его дивен, и славен, и страшен. Апполон же от великие радости что и чинить недоумеваяся, точию привет и милость являл и обещал. По семъ принесоша ему великие дары и собрание государства, иже по отшествии его собравше, неизчетное принесоша.