Том 15 (XVII век)

Прииде же блудницам началный и корчьмит купити Тарсису у разбойников, даде за ню 50 златых, введе же ю в дом свой и причта ко скверным девицам нечистаго ради своего и злаго прибыточества. Тарсиса же, видя прелютое зло над собою, нача, рыдая, горко плакати и глаголати: «О Боже, Боже мой, како мя прегоркую и злосчастную в злых моих оставилъ еси? О случаю злополучный, немилостивый, како на мя испустил еси своя стрелы и злосердым копием пробол еси мое сердце? О Боже, сие ми бысть за еже есмь паче всех согрешила, обаче несть во мне, ни в помысле моем никоего зла хотения, точию молитва и книжное прочитание. Почто ми, Боже мой, родитися попустил и родившуюся почто с материю моею в море не ввергоша мя? О Феофиле, был еси ми страшен, обаче прелюбезен бы был, егда бы главу мою отъялъ. Лутчи ми, окаянней, злая смерть, неже скверный и срамный живот![1410]» Узревши же купившаго ю началника блудницъ, паде к ногама его, плача и моля, дабы на чистоту ея не поощрелся и девство ея при ней оставил, и честь кролевского чада не обругал. Рече ей окаянный блудницам началный: «Престани, не тому предана, дабы ти кая милость была дана. Иди и сяди въ первых блудницах, украсившися. Не точию, яже за тебе дах, хощу возвратити, но и сугубую цену твоею красотою имам добыти». И посадив ю, повеле по граду извещати, блудити хотящим, яко есть у него в блудилище новая: таковая девица, какой не бывало.

Услыша сия того града князь именем Антогор, прииде в дом блудницъ и взем за руку Тарсису, введе ю во особую храмину к любодеянию. Тарсиса же, виде збывающеся над собою, и едина токмо со единым паде к ногам Антигора, рече ему с великим плачем, горко рыдая: «О великий княже, преславнейшая природа, премози, иже по естеству похоти мысль[1411], сотвори нрав славный, не буди гонитель и обругатель крове царския, да Богъ за доброе сие, его же покажеши ко мне, сохранит чад твоих от толикаго злаго случая. Аз есмь бедная дщерь великого краля тирского Апполона, иже в злоключениях своих странствуетъ по свету. Мене же даде воспитати во граде Тарсе, и емуже преда, той мя повеле убити. У убийцы же разбойницы мя отъяша и продаша сему злому чеовеку. Ты же, яко славный и благородный, честь мою, и чистоту, и девство сохрани ради вышняго промысла и всех царей, и кралей, и благородныхъ девицъ, и честных жен, чистоту и честь хранящих». Услыша сия князь Антогор премудрый, умилися к жалосному ея молению и рече ей с честию словеса утешителная: «О славная девица, истинная царевна, яко в толиких бедах сама в себе царствуеши. Поклоняюся ти, буди здрава, буди тебе честь и слава вечная, яко в толиких бедах честь снабдеваеши[1412] и чистоту любиши. Отселе аз, елико могу, буду тебе усердно помогати, да девство твое сохранитца. Приими от мене злата и дай ему блудническому купцу, яко свою мзду у мене приемше. Аз же ему реку, что о тебе творити». И изшедъ из храмины, преславная девица даде своему злославному владыце приемшее злато у Антагара любомудраго. Изыде же и князь Антагор, нача глаголати блудницъ начальнику, да дастъ ему Тарсису на месяцъ, а он ему дастъ 100 литръ сребра, и да ни един кто от мужей не точию коснется, ниже да видит Тарсису, развее Антагора. И скверноприбыточникъ он обещася и сотвори тако.

Апполон же краль, отецъ ея, преходя по морю дванадесять летъ, жалея любезныя жены, приплы ко граду Тарсу видети дщерь и утешитися от печалей. Уведав же сия приемый в соблюдение дщерь его Странгвилей з женою Дионизиею, облекшися в черная, приидоша ко Апполону и рече Странгвилей: «Здрав буди, кралю великий, а нам милостивый государь, извествуем же тебе печали полный случай. Тарсиса, дщерь твоя, о нейже бысть вся надежа наша, умре. Мы же от дне смерти ея доныне сетуем, черно носяще». Слышав сия Апполон, от великия печали горкия и многия слезы пролия и разда скудствующим многое богатство. Сотвори же завет паки десять лет ис корабля не исходити, но странствовати в несносной своей печали. Аще же кто речет ему ис корабля изыти, таковому нога отсещи без милости. Вниде же в корабль, нача шествовати по морю с великою тугою и печалию. Воста же на мори ветръ велий, и по многом плавании принесе корабль к некоему граду, нощию егоже не познаваху; егда же бысть утро, вопросив же и уведаша, яко град Мелхий есть, в немже дщерь его продана блудничнику. Прилучи же ся тогда быти некоему по внешнихъ обычаю торжеству, и рече Апполон слугам своим: «Братия любезная, пристаните ко пристанищу града сего, понеже ныне день торжества, да приимете некое утешение, якоже и прочии человецы». Егда же приближися ко граду и сташа, обретоша множество кораблей, ибо в той день окрестнии вси съезжахуся ко граду торжествовати. Апполон же своим повеле сотворити веселие велие, глаголя: «Аще аз и в печали есмь, но сии да будут во утешении». И начаша слузи его ясти и пити, Апполон же седя во внутренних корабля, сетуя и плача.