Том 15 (XVII век)

Имяше же царь той, отецъ мой, у себе мать горду, и неблагородну, завистливу и ненавистну, и тая убо бяше от велмож и от народа презираема за злонравие ея, бяше бо властолюбица. И завиствуя бо на матерь мою, яко почитаема паче ея от народа бысть, имя ея обношашеся во всехъ устехъ паче ея, матере царевы. И искаше времени, да сотворитъ пакость матери моей, и возсмердитъ ея сыну своему, а моему отцу, царю, и народу. И во многое время невозможе обрести вины, всяко злохитръствуеши. Егда же Божимъ изволениемъ отецъ и мати моя зачаста насъ законно, и по времени роди мати наю, мене и другаго сыны, царю, и отецъ нашъ ради рождения нашего радостенъ бысть, иде в церковь Божию молебная совершати. В той часъ мати наша по рождению наю в полате почиваше, от истомления и от напоения спяше крепко. Мати же царева, окаянная баба наю, навождениемъ вражиимъ от зависти умысли, и призва от царевы полаты мужа, доброродна теломъ, а проста нравомъ, часто предстояща цареви. И глагола ему ласковыми словесы, злокозньствуя, ово дары обещевая ему, ово сановство велико, принуди его возлещи к матери моей на одръ без гащь. А сама в той часъ скоро шедша к сыну своему, царю, отцу нашему, в церковь и рече ему: „Что ты радостная, царю, твориши торжество рождения ради чадъ своихъ, а не веси того, что лстивая жена твоя ныне творитъ, в полате с предстоящимъ тебе мужемъ онымъ прелюбодействуетъ. И та рожденная чада не от твоего семени есть, но оного мужа прелюбодейца, иже на одре возлежит с нею. Аще ли не имеши веры, иди и виждь". Отецъ же мой, царь, слышавъ таковая, оставивъ молебная пения, и скоро иде в полату к матери моей. И виде у нея на одре лежаща служащего ему, вземъ мечь, пронзе его. Муж же той вскрича и умре. Мати же моя о сихъ ничтоже веде, возбнувъ от крича того и ужасеся, не могий, что молвити.

Отецъ же нашъ, царь, повеле ю и с нами, с чады своими, в темницу всадити. Опечалися велми, не мня ю такову быти, якову обрете. Ведый же добродетелное нрава ея, ведая бо и жестоту матери своея, вскоре не умертви матери нашей и наю, но повеле ю в темницы хранити и питати. И по мнозем времени хотя ю сожещи и с нами, с чады своими, и советом царскаго сигклита и приятель ближнихъ и молениемъ властинымъ не умори наю, ни сожже. Но повеле отвести в пусто место матерь мою и наю, и сотвориша тако. Мати же наю уведев о беде своей завистную клевету в темнице седя, от стражей и от протчихъ, и возложи надежду на Господа Бога и на Пречистую Богородицу, моляся и благодарне терпящи. Пребываше в пустыни плачущи и питающи нас от плодов земных и отъ сосецъ своихъ. И доиде до некоего потока и места доброплодна, и пребывая ту немало время, и некогда возляже опочинути. И в то время приде на нь зверь лютъ лвица, и восхити у нея младенца, брата моего, и унесе. Мати же моя по следу тому зверску идяше, плакашеся велми, и постиже во острове некоем лвицу в примории. И видя сына своего у нея, брегома и питаема, и зря на него, плакашеся, приближитися не смея. И отиде, скитающися по пустыни, возложи печаль свою на Бога. И многи дни гладомъ томима и жаждею, и зноемъ опаляема, и студению оскорбляема, ведый с собою и нося мене единаго, и доспехомъ некоего града. Из него же азъ ныне приидохъ, слышахъ рать сию, нашедъшую на градъ сей. Мати же моя, егда прииде со мною ко граду тому, обита у некоего мужа благочестива и нищелюбива, и престарела, и богата зело, и до сего времени, иже и мене сподоби бранными орудии». Царь же, слышавъ таковая от юноши, разуме, яко быти ему сынове его, смятеся утробою, облияся слезами. И, помолчавъ, вопроси другаго юношу, рече: «А ты, храбрый юноше, откуду сей, и какова града и отечества?» Он же, воставъ, рече: «Азъ, царю, не могу доволно глаголати, понеже ненавыкновенъ есмь языка совершенно глаголати вашего. И не вемъ града есмь или отечества, но мало распамятствую, яко по пустыни ходихъ с женою некоею и отрочищемъ другимъ, и мню, яко мати ми бысть и братъ, но мало памятствую. Паче же ныне от словесъ его, сего юноши, вразумляюся. Унесе бо мя лвица у матере моея и внесе в пещеру свою. Азъ же от страха изумихся, и егда, отдохнувъ мало, востахъ, хотехъ бежати от нея, она же охапивъ мя, гладяше, ласкаяся, взирающи ко мне любезно, от'емлющи лизаше и не брежаше мя. Азъ же, видевъ, яко не вредитъ мя, но паче утешаетъ и питаетъ мя, и многаши по острову оному хождахъ. Она же во следъ мене хождаше, и никому не дадяше мя вредити. В нощи же в пещеру ону идоша и почихомъ ту. Лвица же она питаше мя от сосцу своею, приноша же и плоды земныя, могущыя мя укрепляти. И тако жихъ с нею в пещере до дне того, егда корабленицы они придоша и поемше насъ, и представиша мя пред тобою, пречестнейший царю, а иного о себе ничтоже вемъ».