Том 15 (XVII век)

Царь же, слыша от юноши таковая, смущашеся сердцемъ. Князи и людие, слышаху таковая, распыхахуся сердцы в любовъ к ним, зряху бо ихъ подоболична отцу своему, царю, и глаголаху молкомъ другъ другу: «Что се хощетъ быти?» И паки царь вопроси перваго юношу, рече: «Да где ныне обитаетъ мати твоя?» Он же рече: «Царю, рекохъ ти, яко во ономъ граде у онаго благочестиваго и христолюбиваго мужа. И вем, яко ныне ожидаетъ мя по вся часы слезно, понеже обещахся к ней скоро возвратитися. Аще о царе своем, отце нашемъ, и о царствии, и о сродницехъ, и отечестве всегда болезнуетъ, слезящи, и о детище своемъ плакаше, но о мне веселящеся по вся дни, и от тоя скорби и печали утешение приимаше мене ради и онаго благочестиваго мужа и утешителныхъ словесъ. Азъ же согрешихъ ныне, умедлихъ во упокоении своемъ при державе твоей и наведохъ на ню такову скорбь, яко по вся дни и часы, слезящи, умирати ей, не токмо первых ради бедъ, но моего ради отшествия. И не вемъ, жива ли есть ныне или ни от таковыя надсады». Сам же, глаголя, плачася о матери своей.

Царь же, слышавъ от обою юношу таковая, воставъ, возопи гласомъ великимъ: «О возлюбленнии мои князи, и боляри, и велможи, и весь царьский сигклитъ, и вси православные христиане! Днесь радость моя исполнися!» И рече юношамъ: «Вы есте благороднии юноши, во истинну есте моя чада возлюбленная, законная, и от семени моего рожденная, и от матери вашей благочестивой и добродетелной, царицы моей, возлюбленной и избранной. А отлучены со благочестивою материю вашею ненависти ради вражия, завистию бесовскою». И падъ на выя ихъ, коемужъдо[1444] плакася доволно[1445]. Плакаху же ся князи, и боляре, и велможи, и народи радостным плачемъ, и возглашаху победная Богови. Промче же ся слово от того часа по весь градъ, и слышашеся по торжищамъ и улицамъ великая гласования радостная. Глагола же царь: «Азъ ради вас, чада моя, и матери ради вашея и до сего часа скорбях сердцемъ, печаловахъ же, во царствии живя и многая благая пред собою зря, богатство безчисленное, и славы велики, и всехъ предстоящихъ с трепетомъ покланяющихся, никогда же совершенно возвеселихся, но утроба моя велми болезнова матери ради вашея и васъ. И до сего дни и часа иныя себе царицы-супружницы не пояхъ, то ради надеяхся на всещедраго Бога, милость и упование на него возлагахъ. Имите ми веру, Бог свидетель, не осквернихъ себе по вся дни своя блудомъ. И ныне, чада моя возлюбленная, вас ради возвеселихся душею и сердцемъ». Они же, храбрии юноши, слышавше таковая, падше, поклонишася царю, отцу своему, со слезами и радостию великою, облобызающе нозе его, и славяху Бога, благодарствующе, яко сподоби ихъ видети отца своего во царствии и славе велицей. И в томъ часе бысть у царя того во всемъ царствии томъ радость велика и торжество о обретении чадъ своихъ, паче же храбрыхъ и мудрыхъ, и о одолении сопостатъ. И тогда убо целова царь чада своя во уста и в главы. И поиде с ними в церковь Божию, последствующе имъ князи, и боляре, и весь сигклитъ и народи. И сотвориша молитвенное благодарственное пение. И учинишася во граде томъ звоны велицы и ликования страшна и велика зело. И повеле царь вскоре написати грамоты, и приписа своею рукою ко царице своей умилно, и посла сына своего, иже ею воспитанный, и даде ему и боляръ своихъ, и князей, и сигклитъ со многою силою и богатствомъ. И тако вскоре поидоша со тщаниемъ.

Слышано же бысть матере царевы сия, яко обличися злоба ея, и паче ея прославися невестка ея, царица, и противъ ею бысть, по мысли ея, и срама ради и зависти невозможе стерпети, испивъ зелия люта и умре. Царь же, проводивъ, погребе ея по чину, якоже подобаетъ.

Царевичь же, храбрый юноша, и с полкомъ своимъ, дойде до града, идеже мати его пребываетъ. Вда ей грамоты царевы, отца своего, и положи пред нею дары велики. Она же паде на выю его, плакашеся, едва от радости не умре. Сказаша же ей, яко вторый сынъ ея, иже восхищенъ бысть зверемъ лютымъ лвицею, ныне живъ обретеся во царствии отца своего, у царя, и о победе такожде сказа. Она же прочте грамоты царевы, и виде сына своего и слыша о другомъ, отдохнувъ, наполнися радости. И воздавъ благодарение всесилному Богу, поклоняшеся душею и телом, и сердцемъ, благодарствивъ, скоро воставъ съ сыномъ своимъ, идяше къ царствию с полцы своими с великою радостию, благодарствивъ же и одаривъ онаго мужа, у негоже пребываше в дому.